Alex Muyoboke uzwi ku izina rya Manager akaba umuyobozi wa VOXA Group itegura ibitaramo na Reagan Rugaju usanzwe ari umunyamakuru wa siporo, bavuze impamvu bashyigikiye umushinga w’igitaramo "Easter Jubilee" cya Ben na Chance.
Tariki ya 04 Mata 2026 abaramyi Ben na Chance bakoze ikiganiro n’itangazamakuru (Press conference) kigamije gusobanura byimbitse ibyerekeranye n’igitaramo cyo kwizihiza pasika giteganyijwe tariki ya 04 Mata 2026 mu nyubako ya BK Arena.
Iki kiganiro cyitabiriwe n’abahanzi bose bazaririmba muri iki gitaramo ni ukuvuga couple ya Papi Clever & Dorcas, Alicia & Germaine ndetse n’abafatanyabikorwa batandukanye barimo Alexis Muyoboke ufatwa nk’umujyanama w’abahanzi w’ibihe byose barimo na Tom Close.
Mu bandi bitabiriye iki kiganiro barimo Alexis Sharangabo Ushinzwe iterambere ry’ubucuruzi muri BK ARENA; Philbert Mutumishi umuyobozi wa Dove Investment Ltd icunga Dove Hotel. Mu bandi bitabiriye harimo Samsung 250, Tekno Market n’abandi…
Iki kiganiro kikaba cyari kiyobowe na Reagan Rugaju umunyamakuru w’imikino wa RBA akaba umwe mu banyamakuru b’ibyamamare ndetse bakunzwe cyane.
Pastor Benjamin Serugo (Ben) yatangiye ashimira abitabiriye iki kiganiro anavuga ku myiteguro, ati: "Turimo gutegura iki gitaramo kinini, twese twizihize gupfa no kuzuka kwa Yesu Kristo".
Ikindi tuzabasha kugaragariza abantu Imana yacu bwite atari iy’abandi uburyo tugendana nayo". Yakomeje agira ati: "ibyerekeranye n’ubuzima tumeze neza ibitureba turimo kubishyiraho akadomo ka nyuma, imyiteguro imeze neza, nta wemerewe kurwara muri twe mbere y’igitaramo cya Pasika."
Alexis Muyoboke umuyobozi wa Voxa Group ifasha abahanzi bakomeye gutegura ibitaramo akaba amaze imyaka irenga 25 ari Manager w’abahanzi, yavuze imvano yo gushyigikira Ben & Chance ndetse na Gospel muri rusange.
Ati: "Bwa mbere bajya muri studio gukora indirimbo ya mbere narabaherekeje, rero ubwo bajyaga gukora iki gitaramo baratwegereye twemera gukorana bitewe n’uburyo dusanzwe tubazi nk’abahanzi bafite izina muri Gospel.
Kuba barahisemo BK ARENA yavuze ko ibi bibagira abahanzi badasanzwe, ati: "Umuntu natekereza gukorera muri BK ARENA jya umufata nk’umuntu udasanzwe."
Yavuze urukundo akunda Gospel. Ati: "Nkunda umuziki wo kuramya no guhimbaza Imana (Gospel) kurusha umuziki wa Secular no mu rugo usanga nshuranga indirimbo za Gospel gusa".
Yvuze urwego umuziki wa Gospel umaze kugeraho ati: "Ntiwabona umuhanzi wa Gospel aririmba Playback’’.
Reagan Rugaju waruyoboye iki kiganiro yabajijwe n’umunyamakuru wa Paradise uburyo akoresha izina rye nk’umunyamakuru w’icyamamare mu mikino mu gukururira abantu biganjemo abakunzi b’Imikino mu kuzitabira igitaramo cya Easter Jubilee cya Ben & Chance.
Rugaju ati: "Ni ubwa mbere MC abajijwe! Tumenyereye ko MC abaza, ndi gufasha Ben & Chance gusharinga uko nshoboye kose ntako ntagize niba ureba page yanjye ni byo byuzuyeho nta handi nkwiye kuba nawe nta handi ukwiye kuba kuko Gospel bivuga spreading Godnews!" Yashimye Ben & Chance avuga ko ari abahanzi bafite indirimbo nziza zifite ubutumwa bwiza.
Alicia na Germaine itsinda rishya rizaririmba muri iki gitaramo, bashimye Imana ndetse na Ben & Chance ku bwo kubagirira icyizere bakaba bagiye gukorera igitaramo cya mbere muri BK ARENA. Bavuze ko ari cyo gitaramo cya mbere bagiye kuririmbamo mu mateka yabo.
Easter Jubilee Music Gathering ni igitaramo cy’amateka kizaba kuri Pasika, ni ukuvuga tariki ya 05 Mata 2026 muri BK ARENA.
Amatike akomeje kugurishwa ndetse hakaba hasigaye amatike atarenze 30% nk’uko Alexis Muyoboke yabitangaje. Gura itike unyuze ku rubuga rwa www.ticqet.rw cyangwa se wifashishe MoMo *513*01*01#.
Ikiganiro n’abanyamakuru cyabaye kuri uyu wa Gatanu muri BK Arena
