Iki giterane cyitabiriwe n’abakozi b’Imana batandukanye barimo Pastor Rebecca waturutse muri USA, Rev Pastor Francine Uwimana, Pastor Uwurukundo Genevieve, Rev Pastor Didace Munyaribanje, Dr Josaphat waturutse i Kampala ndetse na Apostle Claude Kamuhanda Umushumba mukuru w’iri torero.

Wari umunsi w’umunezero, umunsi w’ibyishimo, umunsi w’ubuhanuzi muri iri torero ubwo iki giterane cyasozwaga. Pastor Uwurukundo Genevieve akaba n’umuyobozi w’ababyeyi wari wuzuye umwuka w’ubuhanuzi, yafashije abitabiriye iki giterane kuba mu bihe by’umwuka.

Uyu mubyeyi wuje amagambo y’ubwenge yavuze imyato abakozi b’Imana batandukanye. Ubwo yakiraga Dr Josphat yagize ati ’’Dr Josaphat, uri mwiza, uri umukozi w’Imana mwiza, uzakandagire aho Papa na Mama batakandagiye, Imana izakuzamure mu buryo bw’umubiri n’ubw’umwuka, Imana izaguhe ihumure kandi izaguteteshe.’’

Muri ibi birori binogeye amaso Dr Josaphat yahawe n’impano ashimirwa ko aba hafi itorero rya Blessing Miracles. Yagize ati ’’Uyu mushumba yatubereye umugisha, amaze kuza hano inshuro enye, iyo umuntu akoze neza aba agomba gushimirwa, yanejeje imitima yacu".

Saa munani n’iminota 40 nibwo mu byishimo byinshi bakiriye Apostle Claude Kamuhanda na Madamu we. Uyu muyobozi w’ababyeyi wari uyoboye gahunda yagize ati’’Appostle Claude ni igitangaza Imana yatwiihereye, uyu muryango ni beza imbere n’inyuma, bafite imico myiza, bakorera Imana neza".

Yongeyeho ati’’MPORA NSENGERA URUKUNDO RWABO. Reverand wacu natwambikire Madamu we zahabu, ni ubuhanuzi bw’amadorari, twari tumenyereye ko zicukurwa muri Kongo, ariko twamenyanye n’abakongomani."

Ubwo hakurikiyeho umuhango wo kwambika imirimbo ku maboko ikozwe muri zahabu ndetse n’amapeti. Uyu mubyeyi yongeyeho ati’’Ngwino nguhe amadorari, ubundi utangire kwakira amafaranga y’amahamga. Amadorali Arahari?cyangwa ntahari? Nari naramubwiyebko ngiye kumuramira amabokobariko ntabwo yari azi ko agiye kwakira amadorali".

Hanabayeho umuhango wo guhana impano bashimirana urukundo n’imibanire myiza muri iri torero. Insanganyamatsiko y’iki giterane iboneka mu gitabo cya rusi 1:16 handitswe ngo ’’Bukeye ahagurukana n’abakazana be kugira ngo ave mu gihugu cy’i Moabu, asubira iwabo kuko yari yumviye mu gihugu cy’i Moabu y’uko Uwiteka yagendereye ubwoko bwe, akabaha ibyo kurya. Iri jambo ryari rigamije gushimangira ubutwari bwa Naomi ndetse no kumwigiraho.

Mu kiganiro n’itangazamakuru, Pastor Genevieve Uwurukundo uhagarariye abagore muri iri torero yavuze ko umugore ari umunyembaraga, yongeyeho ko umugore Imana imukoresha imirimo idasanzwe, akabera umugisha umuryango we.

Apostle Claude Kamuhanda uyobora iri torero rya Blessing Miracle Church yagize ati ’’Kuki hari abantu bumva ko ibintu bikorwa n’abandi? Birakwiye kwiyumvamo inshingano zo gukorera Imana". Yongeyeho ko abantu baharanira kubaka ingo zitarangwamo amakimbirane ndetse bakirinda gusaba gatanya bagaharanira kubana akaramata bakazatandukanywa n’urupfu.

Pastor Rebecca KATUNGU waturutse muri Amerika yavuze ko muri Amerika umugore afite uruhare runini mu iterambere. Yavuze ko hari inyungu eshatu zo gukorera Imana arizo kuyoborwa n’Imana, guhembwa nayo ndetse n’ubugingo buhoraho.

Blessing Miracles Church ni itorero kuri ubu rimaze imyaka 12 dore ko ryatangiye mu mwaka wa 2011. Ni itorero rimaze kuba ubukombe dore ko ryagabye amashami 12 mu mujyi wa Kigali ndetse n’amashami 3 muri Uganda, rikaba ryitegura gushinga andi mashami mu gihugu cya Uganda.

Intego y’iri torero ni ugusakaza ubutumwa bwiza, kwirukana imyuka mibi, gukangurira abantu kwihana ibyaha ndetse no kwigisha abantu kubaho mu buzima bwejejwe no kwamamaza kugira neza kw’Imana, hakiyongeraho kwitunganya nk’abakristo kugira ngo bazaragwe ubwami bw’Imana.

Apotre Claude Kamuhanda (uri hagati) yahanuriwe imigisha y’amadorali