Iki gitaramo cyiswe “Let it Shine Powerful Concert” cyateguwe na New City Family Choir, kizahuriramo abaririmbyi n’abaterankunga b’iyi korali barimo n’ababarizwa mu Mujyi wa Kigali.

Mu kiganiro na Paradise, Bwana Fikiri Jayden Uwimana yagize ati: “Iki ni igitaramo cy’amateka kuri New City Family Choir. Turasaba abanyarwanda, by’umwihariko abatuye mu Mujyi wa Kigali, kuzaza kwifatanya natwe mu gitaramo. Twiteguye kwamamaza ubutumwa bwiza bwa Yesu Kristo no kubohora imitima.”

Hateganyijwe gutangiza igikorwa cyo gushaka inkunga yo kubaka inzu y’itorero izajya yakirirwamo abashyitsi (Guest House) ndetse n’inyubako y’urusengero rujyanye n’icyerecyezo (etaje).

Bwana Fikiri Jayden yavuze ko muri iki gitaramo kizitabirwa n’abantu batandukanye batuye mu Mujyi wa Kigali n’ahandi, bazahuriza hamwe imbaraga hagatangizwa igikorwa cyo gukusanya inkunga izifashishwa mu kubaka inzu izajya yakira abashyitsi (Guest House) ndetse n’indi nyubako y’urusengero rugezweho rwa etaje. Izi nyubako zizubakwa aho uyu mutwe w’abaririmbyi ukomoka, ni ukuvuga ahabarizwa Itorero rya Ruhanga.

Yagize ati: “Ibi bikorwa bikomatanyije rero New City yabiteguye bitewe n’uko twiyemeje gufatanya n’itorero kurimbisha Ruhanga kugira ngo aho ibarizwa haganze ibyiza gusa.”

New City Family Choir izifatanya n’amakorali akomeye

Muri iki gitaramo cyo ku wa 30 Kanama 2025, New City Choir ntabwo izaba iri yonyine, dore ko izafatanya n’andi makorali akomeye ariyo: Adonai Family Choir, Abahamya ba Yesu Choir, Abanyamugisha Choir, Halleluiah Family Choir ndetse na Ababwirizabutumwa Choir. Kwinjira ni ubuntu.

Chorale New City ni chorale ibarizwa ku itorero ry’Abadiventiste b’Umunsi wa Karindwi rya Ruhanga (Ruhanga SDA) mu Ntara y’Amajyaruguru.

Yavutse mu mwaka wa 2002, ikaba yarashinzwe n’urubyiruko rw’abasore bagera kuri batandatu gusa. Nyuma y’igihe gito aba basore baje kwivanga n’urundi rubyiruko rw’abana b’abakobwa nabo baririmbaga muri chorale yitwaga Abajyana na Yesu.

Abanya-Kigali bagiye gutaramana n’iyi korali ikunzwe kubi

Ifite abakobwa n’abamama bacyeye bambaye ubwiza bw’Imana

Mu mwaka wa 2004 iyi korali yahinduye izina iza kwitwa New City Family Choir. Yakomeje kuririmba ikorera umurimo w’ivugabutumwa mu itorero cyane binyuze mu byiciro bitandukanye byaryo nka JIA, MIFEM Ubutabazi, Temperance n’ibindi.

Aba bagabo ni abanyamugi, zina ni ryo muntu

Bakomeje gukora umurimo mu bihe bitandukanye aho ibihangano byinshi byayo byandikwaga n’umuririmbyi wayo witwa Ntare Ismael.

Kuri ubu New City Family Choir ikaba ibandanyije mu gukora umurimo w’ivugabutumwa ndetse n’ibindi bikorwa bifasha itorero n’igihugu birimo n’iki gitaramo cyo kuwa 30/08/025 kizabera kuri Kigali Bilingual Church Remera.

New City Family Choir ni umutwe w’abaririmbyi uzwiho kuririmba neza. Yamamaye mu ndirimbo nka "Bucece", "Biremera", "Igitambo", "Impanda", "Igihugu" n’izindi.