Iyo bavuze Naioth Choir, abakunzi ba Gospel bahita binjira mu ijuru mu buryo bw’umwuka ku bwo kwibuka indirimbo nka "Ntajoro ridacya" yibutsa abantu ko nta kigeragezo kitagira iherezo kuko n’ijoro rya Hana ryacyeye, Mwuka wera ikumbuza abantu ibihe by’intumwa;

"Hari uburuhukiro" yibutsa abantu umumaro wo gutura muri Kristo, "Nzahimbaza" indirimbo ikoze mu njyana ya Zulu yibutsa abantu gushima Imana ku bw’Imirimo myiza Imana yakoze, "Niwe wabanje kunkunda" ivuga ku rukundo Yesu yadukunze mbere y’uko tuvuka, "Sinakuvaho" ishishikariza abantu komatana na Christo na "Bimuharire" yasohotse mu minsi yashize ikaba yaranitiriwe iki gitaramo.

Aganira na Paradise, David Nsengiyumva kuri ubu ushumbye iyi korali yagize ati: "Intego y’igiterane twayise bimuharire dushingiye ku ijambo ry’Imana riboneka muri Matayo 6:25 ritubuza kwiganyira iby’ubuzima bw’ahazaza kuko Kristo ariwe ubigenga tubimuharire.

Yakomeje agira ati: "Igitaramo twacyitiriye indirimbo nshya duheruka gukora yitwa Bimuharire."

Avuga ku butumwa bashaka gutambutsa, yagize ati: "Twifuza guhumuriza abantu tubabwira ko ubwo Imana Imenya ubuzima bw’ibiguruka cyangwa ikambika uburabyo, ibasha no gutunga abayizera bityo badakwiye kubaho ubuzima burimo kwiganyira no kutizera ejo habo heza."

Kuri ubu Chorale Naioth ubu igizwe n’abaririmbyi barenga 130. Usanga iyi korali yararenze urwego rwo kwitwa itsinda ahubwo ari umuryango biturutse ahanini ku gihe kirekire aba baririmbyi bamaranye. Ibi bishimangirwa n’urukundo rurangwa n’abaririmbyi bayiririmbo.

Mu minsi ishize, iyi korali wasangaga igizwe n’Urubyiruko ahanini rwaririmbanye muri Maranata choir, Korali y’abana babarizwa mu ishuli ry’icyumweru. Usanga harimo abaririmbyi bamazemo imyaka irenga 15.

Urugero President David Nsengiyumva wanayibereye umutoza w’amajwi, Mwalimu Hakizimana Claude umugabo w’umuramyi Mathouscellah Uzanywenayesu bombi bayirambyemo, Claire, Esther uzwi cyane mu itsinda rya New Melody n’abandi.

Aba baririmbyi bakaba baragiye biyongeramo abandi bagiye bava ahantu hatandukanye bakisanga muri iyi korali kubw’isezerano ry’Imana. Kuri ubu, uyu muryango mugari ukaba uyobowe na David Nsengiyumva mu gihe bwana Pivot Gwiza Bertin ari umutoza w’amajwi.

Iyi korali izwiho kugira abacuranzi b’abahanga n’abaririmbyi bafite amajwi meza, ikaba izwiho kugira uruhare mu bindi bikorwa by’umurimo w’Imana n’ivugabutumwa rishingiye ku mirimo. Abaririmbyi b’iyi korali ni bamwe mu bagize uruhare rukomeye mu kubaka urusengero rujyanye n’icyerekezo rw’itorero rya Sgeem.

Iyi korali izwiho kwitabira ibiterane hirya no hino mu gihugu bigamije gushakira Kristo iminyago kuri ubu ikaba ifite umushinga munini ukiri mu bitekerezo ni uwo kugura Imodoka

Utumiwe mu giterane ’Bimuharire Live Concert’