New Melody choir iri mu matsinda akomeye azifatanya na Bosco Nshuti mu gitaramo gikomeye agiye gukora mu minsi micye iri imbere.
Ni igitaramo cyo kumurika kumugaragaro Album ya gatanu (Album Launch) no gufata amashusho y’indirimbo (Live Recording) giteganyijwe ku wa 19 Nyakanga 2026 muri Kigali Serena Hotel guhera saa kumi n’imwe z’umugoroba (5:00 PM).
Nk’uko bigaragara ku itangazo ryashyizwe ahagaragara na Bosco Nshuti Ministry, New Melody izaba ari yo korali yatumiriwe kuzafasha muri iki gitaramo gitegerejwe na benshi, kikazahuza abakunzi b’umuziki wo kuramya no guhimbaza Imana baturutse hirya no hino.
New Melody Choir ni itsinda ry’abaririmbyi ba Gospel rihuza impano zituruka mu matorero atandukanye mu Rwanda, rifite intego yo kwamamaza Ubutumwa Bwiza bwa Yesu Kristo binyuze mu ndirimbo zo kuramya no guhimbaza Imana. Ryashinzwe na Josue Shimwa.
Kuva ryashingwa, rimaze kubaka izina rikomeye mu muziki wa Gospel nyarwanda binyuze mu ndirimbo zifite ubutumwa bwimbitse, amajwi meza n’ibitaramo by’ivugabutumwa. Mu bagize iri tsinda harimo abaririmbyi bazwi nka Bosco Nshuti, Neema Marie Jeanne, Jado Sinza, Emelyne Penzi n’abandi.
New Melody rimaze gusohora indirimbo nyinshi zakunzwe zirimo Yarambabariye, Ndakwiringiye Imbabazi Uhembuwe Haleluya,Ndashimira Umwami Soko y’Ibyishimo ,Nuzuye Ibyishimo, na Yego. Izi ndirimbo zikomeje guhindura ubuzima bw’abantu benshi muri Kristo
Uretse umuziki, New Melody ikora ibikorwa bitandukanye by’ivugabutumwa birimo ibitaramo byo kuramya no guhimbaza Imana, amahugurwa y’abaririmbyi, gusura abarwayi no kugeza ubutumwa bw’ibyiringiro ku baturage.
Intego yayo ni ugukomeza kwamamaza Kristo mu Rwanda no ku rwego mpuzamahanga, ikoresheje impano z’umuziki nk’igikoresho cyo kugeza abantu ku Mana.
Bosco Nshuti ni umwe mu bahanzi ba Gospel bamaze kubaka izina rikomeye mu Rwanda no hanze yarwo, aho indirimbo ze zakomeje gukora ku mitima ya benshi. Iki gitaramo kizaba ari umwanya wo kumurika album nshya ndetse no gufata amashusho y’indirimbo zizayigaragaraho imbere y’abitabiriye.
Abifuza kuzitabira iki gitaramo bashobora kugura amatike anyuze ku rubuga Ibitaramo.com, aho amatike asanzwe ari 10,000 Frw mu gihe aya VIP ari 20,000 Frw. Abifuza ubufasha ku bijyanye n’amatike cyangwa invitation bashobora guhamagara kuri 0727 927 204
Paradise.rw izakomeza kubagezaho amakuru yose ajyanye n’iki gitaramo ndetse n’ibindi bikorwa bitandukanye bibera mu muziki wa Gospel mu Rwanda no hanze yarwo.
Bosco Nshuti ari mu myiteguro y’igitaramo gikomeye
Reba indirimbo aheruka gusohora kuri YouTube
