Korali Sauti Hewani Ministries, imaze kuba ubukombe mu buvanganzo bw’indirimbo z’ivugabutumwa, yashyize hanze indirimbo nshya y’amashusho yitwa “Ngaho Baho”, ikubiyemo ubutumwa bukomeye bwuzuye ihumure, icyizere, n’ukwemera ku mukristo.

Rwibasira Rachel, umuririmbyi akaba n’umwanditsi w’iyi ndirimbo, “Ngaho Baho” imaze amasaha macye igiye ahabona, yabwiye Paradise ko iyi ndirimbo yibanda ku buzima bwa buri munsi bw’umukristo, ibimwugarije, n’uko Imana imuha imbaraga zo gukomeza kubaho, ayihamiriza no muri byose.

“Ni indirimbo ivuga ubuzima, imvune n’amaherezo y’ubwiringiro dushingira ku Mana. Twashakaga ko abantu bumva ko bari kumwe n’Imana, mu bihe byose,” Rwibasira Rachel yabwiye Paradise.

Amashusho Aryoheye Ijisho, Ubutumwa Burimo Umuriro

Iyo ndirimbo ikozwe mu buryo bugezweho, ifite amashusho y’icyerekezo ashimangira ubutumwa buyirimo, nk’uko bigaragara kuri YouTube channel ya Korali. “Ngaho Baho” ije ikurikira “Nimushime”, indirimbo iherutse gusohoka mu byumweru bibiri bishize, nayo yakiriwe neza n’abakunzi ba Sauti Hewani.

Korali Sauti Hewani Ministries, yavukiye mu Itorero Bethesaid Holy Church riyobowe na Bishop Rugamba Albert, ariko ubu irigenga. Yamenyekanye kubera ubuhanga n’ubutumwa bwimbitse busanzwe buranga ibihangano byabo, ndetse ikomeje kwigaragaza nk’umutima w’ivugabutumwa ryifitemo impano, ubuhanga n’umwuka.

Ubutumwa Burenga Imipaka: Korali Igaruriye Imitima y’Isi

Uko iminsi igenda ishira, Sauti Hewani Ministries ikomeza kwagura imbago z’ivugabutumwa by’umwihariko ku mbuga nkoranyambaga, aho ibikorwa byabo bigera mu Rwanda no hirya no hino ku migabane y’isi.

Bateguje abakunzi babo kwitega indirimbo nshya. Bati: “Abakunzi bacu bategereze umuzingo w’indirimbo nshya, kuko ubutumwa bwiza bugiye gukomeza gutambuka ku bwiza n’ubuhanga.”

RYOHERWA N’INDIRIMBO NSHYA "NGAHO BAHO"