Mu gihe aba Kristo bo ku isi yose bitegura umunsi wa Pentecote, korali Abaragwa y’abanyamwuka ibarizwa mu itorero rya ADEPR Paroisse ya Kicukiro shell yasohoye indirimbo "Umwuka Wera" ikumbuza abizera ibihe by’intumwa.

Aganira na Paradise, Bwana Iranzi Eric Umuyobozi mukuru w’iyi korali yatangaje imvano y’ubutumwa bukubiye muri iyi ndirimbo ya Pentecote. Yagize ati: "Ni isengesho twashatse gusengana n’abizera ngo Imana itwuzuze Mwuka Wera aze atuyobore mu rugendo".

Iyi ndirimbo nshya "Mwuka Wera" ya Korali Abaragwa, itangirana n’ituze ku baririmbyi bose b’iyi korali igira iti: "Mwuka Wera w’Imana ngwino wemeze imitima yacu utubwire iby’ubwiru bw’Imana,utwuzuze Imbaraga zawe".

Iyi ndirimbo nziza cyane mu myandikire no mu miririmbire yatunganyijwe na producer Leopord uzwiho kugira ukuboko kwiza mu gutunganya amajwi mu gihe amashusho yatunganyirijwe muri Bless World Music.

Ku ba Kristo, Pentecote ni umunsi ushamikiye ku byanditswe byera dusanga mu gitabo cy’Ibyakozwe n’intumwa 2:2 hagira hati "Nuko umuriri ubatungura uvuye mu ijuru umeze nk’uw’umuyaga uhuha cyane, ukwira inzu bari bicayemo. "

Mu cyumweru kibanziriza umunsi mukuru wa Pentecote ufatwa nk’ibihe byo kwiyunga n’Imana no kuyegera mu buryo budasanzwe. Ibi bituma benshi mu basobanukiwe ubutumwa bwa Kristo ku itorero barangwa no kwicisha bugufi, gusengera mu kuri no mu mwuka no gusoma ibyanditswe byera.

Korali Abaragwa rero ikaba yasohoye iyi ndirimbo ikomeje gushyira mu bihe byiza abizera Kristo muri iki cyumweru kizasozwa kuwa 19/05/2024.

Korali Abaragwa yatangiye nyuma gato ya Jenoside yakorewe Abatutsi mu 1994, itangira ari korali y’abana bo mu ishuri ryo ku Cyumweru, nyuma iza kwitwa izina Abaragwa mu 1998. Kugeza ubu igizwe n’Abaririmbyi barenga 80.

Kugeza ubu Korali Abaragwa imaze gushyira hanze Album z’amajwi 3 n’iz’amashusho eshatu

RYOHERWA N’INDIRIMBO NSHYA YA KORALI ABARAGWA