Uko iminsi igenda ishira, ni ko ubuyobe n’ibishuko bikomeza kwiyongera mu Itorero ry’Imana. Ni na ko benshi bagenda badamarara, bakibagirwa ko Kristo azagaruka. Ibi ni byo byatumye Minisiteri y’Urubyiruko rwa ADEPR SGEEM yiyemeza gutegura igiterane cy’amateka kigamije gukangura abasinziriye mu buryo bw’umwuka.

Parousia Live Concert ni igiterane gifite intego yo kwibutsa abantu bose ko Kristo azagaruka, kikibutsa Itorero ibyiringiro rifite byo kuzabana na we iteka.

Mu gihe bamwe mu bahoze mu nzu y’Imana bagiye batera umugongo ukwizera, abandi bagatangira gucyerensa ubutumwa bwo kugaruka kwa Yesu, Kanuma Evode, uyoboye iyi Minisiteri, yabwiye Paradise ko nta gushidikanya Yesu azagaruka agatwara Itorero rye yakoye ikiguzi cy’amaraso.

Yagize ati: "Yesu azaza. Yesu ari bugufi kuza gutwara Itorero rye yakoye ikiguzi cy’amaraso. Iyi ni inkuru y’ibyiringiro ku bamwizeye bose, ariko kandi ni ubutumire ku bataramwizera ngo bihane, bamwakire, bazabane na we mu Bwami bw’ijuru."

Hari abibaza bati: "Ni iki cyerekana ko Kristo azagaruka? Ni ibihe bimenyetso bibihamya?"
Asubiza iki kibazo, Kanuma Evode yavuze ko Bibiliya yamaze kugaragaza ibimenyetso byinshi.

Yagize ati: "Yesu yabivuze muri Matayo 24:37-39, agereranya kugaruka kwe n’iminsi ya Nowa, aho abantu baryaga, banywaga, bashyingiranwaga kandi ntibamenye igihe umwuzure wabageragaho. No muri iki gihe, kimwe mu bimenyetso bikomeye ni uko abantu benshi bagenda batera Imana umugongo, bakadamarara mu buryo bw’umwuka."

Yakomeje avuga ko nubwo ibyo bimenyetso bishobora gutera ubwoba abatizeye, ku bakristo ari inkuru y’ibyiringiro. Ati: "Ku bamwizeye si ibihe biteye ubwoba, ahubwo ni ibyiringiro, kuko Kristo ni we uzaza kurangiza imibabaro yose no kujyana abe mu Bwami bwe."

Ku bijyanye n’uko abantu bakwiye kubaho muri ibi bihe, Evode yavuze ko abakristo badakwiye guhagarika imirimo yabo bavuga ko Yesu agiye kuza.

Yagize ati: "Kuvuga ko Yesu ari bugufi ntibivuze ko tugomba kureka imirimo yacu tukicara tumutegereje. Nta muntu uzi umunsi cyangwa isaha azaziraho."

Yakomeje agira ati: "Nubwo ibimenyetso bikomeza kugaragara, tugomba gukomeza gukora, gutera imbere no kubaho ubuzima busanzwe, ariko buri gihe tukabaho turi maso, twiteguye guhura n’Umwami igihe cyose yazazira."

Yongeyeho ati: "Kwitegura neza ni ukubaho muri Kristo no kwirinda icyadushyira kure ye. Abo azatwara ni abari muri we, yaba abakiriho cyangwa abapfiriye muri we, nk’uko tubisanga muri 1 Abatesalonike 4:14-17."

Iki giterane kizaba ku Cyumweru, tariki ya 12 Nyakanga 2026, ku rusengero rwa ADEPR SGEEM.

Mu batumiwe harimo Impanda Choir, izwi cyane mu ndirimbo "Itorero", yibutsa abantu ko n’ubwo Itorero rya Kristo risa n’irisuzugurwa muri iyi si, hari umunsi rizahabwa icyubahiro n’Umwami waryo. Iyi korali iherutse no gusohora indirimbo "Iwacu", iri mu zikunzwe cyane muri iyi minsi.

Hazitabira kandi Jehovah Jireh Choir (Post Cepiens ULK), izwi cyane mu ndirimbo zirimo "Iw’Abandi", ishishikariza abantu kureka ibikorwa bihakana Imana no gukomeza kwizera amasezerano yayo, ndetse n’indirimbo "Amateka", yibutsa abakristo kudasibangana n’ibyo Imana yabakoreye.

Benaiah Worship Team na yo izafatanya n’abitabiriye iki giterane mu mwanya wo kuramya no guhimbaza Imana.

Hatumiwe kandi abigisha b’Ijambo ry’Imana bazwiho kuribwiriza mu buryo bwimbitse, barimo Pastor Mugabowindekwe na Pastor Aimable Nsabayesu.

Igiterane kizatangira saa 7:30 za mu gitondo, habanze amateraniro abiri azarangira saa 13:00, nyuma hakurikireho igiterane nyamukuru kizageza saa 19:00. Kwinjira ni ubuntu.

Impanda Choir mu makorali azaririmba muri iki giterane

Jehovah Jireh Choir yamaze gufata bugwate imitima ya benshi