Iki kibazo gikomeje kugibwaho impaka n’abantu batandukanye, barimo abayoboke b’amadini, abapasiteri, n’ababishop ku isi hose.

Impande zitandukanye z’izi mpaka
Hari abemera ko ubutunzi ari impano ituruka ku Mana, bakemeza ko kuba Umukristo akize ari ikimenyetso cy’imigisha.

Aha ni ho usanga inyigisho za Prosperity Gospel (Gospel y’uburumbuke) zihagaze, aho bamwe mu bapasiteri bakomeye nka Joel Osteen na Creflo Dollar batangaza ko Imana ishaka ko abayoboke bayo bagira ubuzima bwiza, butunganye mu buryo bw’umwuka no mu butunzi.

Joel Osteen yigeze kuvuga ati: "Imana ntidushakira ubuzima bwo kurira no kubabara, ahubwo idushakira kugubwa neza mu buryo bwose."

Ku rundi ruhande, hari abavuga ko ubutunzi bushobora kuba ikigeragezo, kuko bushobora gutuma umuntu yibagirwa Imana. Aba bavuga ko ubukene atari ikibazo, ahubwo ko ari inzira yo gusabana n’Imana nta kintu na kimwe kikubangamiye.

Pope Francis, umwe mu bayobozi bakomeye ba Kiliziya Gatolika, yigeze kuvuga ati: "Ubukire butuma benshi bibagirwa abakene, ariko Yesu adusaba kwita ku batishoboye kurusha kwiyumvamo ko turi abanyamigisha kurusha abandi."

Ijambo rya Bibiliya kuri iyi mpaka
Bibiliya na yo igaragaza impande zombi. Hari aho igaragaza ko Imana igira abo iha ubutunzi, nk’uko byagenze kuri Aburahamu, Yobu na Salomo, ariko inagaragaza ko ubutunzi bushobora gutera ibishuko, nk’uko Yesu yabwiye umusore w’umukire ko byari byiza ko agurisha ibyo yari atunze akabiha abakene (Matayo 19:21).

Nubwo izi mpaka zidashobora kurangira mu buryo bumwe bwemeranyijweho na bose, hari ibintu bibiri bigaragara: Imana ishobora guha umuntu ubutunzi ariko ikamwibutsa ko bugomba kwifashishwa mu gukorera abandi.

Icy’ingenzi si ubwinshi cyangwa ubuke bw’ibintu umuntu atunze, ahubwo ni ukuntu abukoresha mu guhesha Imana icyubahiro no gufasha abandi.

Ubwo rero, ntibikwiye kuvugwa ko Umukristo mwiza agomba kuba umukire cyangwa umukene, ahubwo icy’ingenzi ni uburyo ukoresha ibyo Imana yaguhaye kugira ngo ukore umurimo wayo ku isi.