Izina Aime Frank ni rimwe mu mazina yitezweho muri uyu mwaka aho bitarenze iminsi 15 amaze gushyira hanze indirimbo ya 2, bivuze ko buri cyumweru arimo gusohora indirimbo.

Muri iyi ndirimbo ye nshya yashimagije Imana ku bw’ubunyangamugayo bwayo. Yagize ati: "Ntujya uhemuka, ntujya ubeshya, ntujya wivuguruza, nakomejwe n’amasezerayo yawe. "

Ndakwizeye ni imwe mu ndirimbo zizaba zigize album ye ya kabiri. Aime Frank afite uburyo aririmbamo by’umwihariko aramya Imana yerekeza amaboko ye i Yerusalemu, intekerezo ze zose azerekeza ku muremyi we, atumbira ijuru nk’uzaritahamo, dore ko mbere yo guhamagarirwa gukusanya ibisarurwa yaminjagiweho amaraso ya Yesu Kristo.

Ibi bituma akora umurimo w’uwamutumye adafite umutima umucira urubanza kuko yizeye ijambo ryiza ry’umusaraba. Abibazaga imvano yo gushira amanga kwe nk’ukwa Paulo nizeye ko musubijwe.

Aganira na Paradise, Aime Frank yagize ati: "Iyi album ifite umwihariko w’indirimbo nziza cyane zihimbaza Imana. Yunzemo ko amaze igihe ahugiye kuri iyi album mu agamije kuzirikana abakunzi b’Umusaraba, kugirango bazanyurwe n’ubutumwa burimo."

Ni album uyu muramyi yise “Imana Mu bantu”, ikaba yarabimburiwe n’iyiswe “Ubuhamya bw’ejo”.

Aime Frank kuri ubu aherereye muri Leta Zunze Ubumwe za Amerika, aho akomeje kuzamura ibendera rya Yesu Kristo no kubera amahanga inyenyeri biturutse mu mpano yo kuramya no guhimbaza Imana Rugaba yamugabiriye Ubuntu.

Yahawe ikaze mu ruhando rw’abaramyi bafite igikundiro biturutse mu ndirimbo nka “Ubuhamya bw’ejo”, “Umugisha”, “Yaratwibutse” n’izindi. Si izina ry’inzaduka dore ko kuri ubu amaze imyaka 8 mu muziki wo kuramya no guhimbaza Imana.

Ni icyitegerezo mu muryango we, doreko aherutse kugaragara mu ndirimbo ‘Nzahora ngushima’ yakoranye na murumuna we Mazimpaka Patrick n’umuryango we mugari. Ni indirimbo ikubiyemo ubutumwa bwibutsa abantu ko umuntu wizera Yesu Kristo atazakorwa n’isoni.

Aime Frank ni umwe mu baramyi bazwiho guhuza imbaraga n’andi mazina aremereye. Mu mwaka wa 2023 yahuje Imbaraga na Tumaini Byinshi wamamaye mu ndirimbo "Abafite Ikimenyetso", bahumuriza abatuye Isi bari mu bibazo binyuranye bibatera kwiheba, bababwira ko Imana ihindura amateka ndetse bavuga ko ari abagabo bo kubihamya.

Mu bitaramo ni umutaramyi dore ko akunze gutumirwa mu bitaramo by’akataraboneka. Ni umwe mu bataramanye n’abandi mu gitaramo "One Year Church Anniversary" cyo kwizihiza Isabukuru y’Umwaka umwe y’Itorero Christ-Centered Church ryo muri America muri Leta ya Arizona; mu Mujyi wa Phoenix, rikaba riyobowe na Pastor Jean-Claude Simbandushe.

Insanganyamatsiko y’Iki gitaramo yari "Vessels of Honor" cyangwa se "Kuba Ibikoresho by’icyubahiro". Ni igitaramo yahuriyemo na Bishop Prof Fidel Masengo umushumba w’itorero rya CityLight Foursquare Gospel Church na Gentil Misigaro.