Iki gitaramo cyabaye kuwa Gatanu tariki 24 Werurwe, cyatangiye saa kumi n’ebyiri n’iminota 15. Cyaranzwe n’udushya twinshi, nk’uko bisanzwe mu bitaramo bitegurwa n’uyu muhanzi.

Cyatangijwe na Worship Team ya ADEPR Nyarugenge yasusurukije abakitabiriye mu majwi meza ndetse n’indirimbo zo mu ndimi zitandukanye zifite ubutumwa buvuga ku gaciro k’amaraso ya Yesu Kristo ndetse n’umusaraba. Binjije neza abari bitabiriye iki gitaramo mu gihe cy’isaha bamaze Ku ruhimbi.

Saa Moya n’iminota 15 ni bwo uyu muramyi yatunguranye agera ku ruhimbi. Uyu muramyi wagaragazaga ibyishimo ku maso, yahise afata micro yakira imbaga y’abaje kumushyigikira mu ndamukanyo ivuga ngo "Mwakoze kuza".

Byagaragaraga rwose ko yari akumbuye gutaramana n’abakunzi be. Nyuma yo kubasuhuza, yafashe umwanya uhagije wo kubakira.

Yahereye Ku Mushumba witwa Mutoni aramuhagurutsa amushimira ko mu minsi yashize yagize uruhare mu kumukomeza ubwo yamubwiraga ngo "Hagarika Ibyo urimo wongere ugaruke".

Yakomeje uwo mwanya ahagurutsa abandi bakozi b’Imana batandukanye barimo Past Desiré, Apostle Dani biganye Primary, Aloys umutoza wa Jehovah Jireh n’umuryango we, Jado Sinza, umuryango wa Bosco Nshuti ndetse n’abandi bantu batandukanye bafitanye isano y’amaraso na Gospel.

Nyuma yo kubasuhuza ndetse no kongera kumva ijwi rye, abakunzi be bahise buzura amarangamutima nk’uko byagaragaraga mu maso.

Benshi batangiye gusakuza bamusaba ko yaririmba nawe ntiyabatenguha atangirana n’indirimbo ya 149 mu gushimisha Imana ivuga ngo "Mbes’urukundo rw’Imana yacu". Iyi ndirimbo yayiririmbanye na Korali yazamukiyemo yitwa Maranatha.

Nyuma y’iyi ndirimbo, yaririmbye "Ari kumwe natwe", imwe mu ndirimbo yahereyeho kandi ifite igikundiro.

Yakurikijeho indirimbo y’umuhanzi Mani Martin yitwa "Gitare cyanjye", ikoze mu njyana y’ikinimba. Mbere yo kuyiririmba, yabajije abitabiriye igitaramo niba bazi kubyina, Ntibamutengushye kuko bamufashije guhamiriza bateze amaboko bya Kinyarwanda.

Nyuma y’iyi ndirimbo, yakiriye itsinda ryaturutse i Burundi ndetse na Olivier wari waturutse mu gihugu cy’u Bubirigi aje gushyigikira uyu muramyi.

Uyu muhanzi uzwiho gutebya yanyuzagamo akabaza abakunzi be niba bamurambiwe ngo asoze igitaramo, bakamusubiza ko bifuza ko aririmba.

Yahise aririmba indirimbo "Ari kumwe natwe" ndetse na "Ashimwe" yumvikanyemo uruhuri rw’amajwi y’abamufashaga kuyiririmba bamwe bavuza ibikobwakobwa.

Saa Mbiri n’iminota 15 yahamagaye Pastor Desiré Habyarimana abwiriza ijambo rw’Imana riboneka muri Zaburi 103:1 rifite intego ivuga ngo "Mutima wanjye himbaza Uwiteka".

Saa Mbiri na 55 Dominic yagarutse ku ruhimbi yahinduye imyambaro, ibintu byatunguye bikanashimisha abitabiriye igitaramo.

Aha nibwo hinjiye umuhanzi ngo mu bwana bwe Mani Martin wagaragaye mu isura nshya dore ko yananutse ndetse akaba yarogoshe umusatsi asigarana mukeya. Yahise amuhamagara ku ruhimbi amuvuga imyato nk’umuhanzi wamufashije kugera ku ndoto ze

Aha yakomeje guhagurutsa abandi bahanzi barimo Alexis Dusabe, Aime Uwimana na Famille Neema Marie Jeanne, abashimira uruhare rwabo mu kubaka Gospel.

Saa 09:15 yahamagaye umuramyi Bosco Nshuti abantu biterera mu bicu batangira gusaba Bosco kubaririmbira.

Mbere yo kuririmba, Bosco yashimiye Dominic kuba ariwe wamuhaye amahirwe yo kuririmba mu gitaramo cya mbere cyabereye kuri New Life Bible Church. Bosco Nshuti yaririmbye indirimbo imwe.

Dominic Ashimwe yakomeje aririmba izindi ndirimbo zirimo "Nemerewe kwinjira", N"thinduka" yahagurukije abantu bose ndetse n’izindi.

Nyuma y’igitaramo, Dominic Ashimwe yabwiye abanyamakuru ko iki gitaramo ari intangiriro yo kongera gukora umuziki dore ko yavuze ko afite indirimbo nyinshi yitegura gushyira hanze.

Yakomeje atangaza ko ateganya gukora ibindi bitaramo birimo n’icyo azamurikiramo Album ye nshya kizaba muri uyu mwaka. Iki gitaramo kindi ari kwitegura gukora, ni cyo twagereranyije n’agaseke gapfundikiye azapfundura muri uyu mwaka.

Uyu muramyi avuga ko bitazamugora rwose na cyane ko imbogamizi yari afite zirimo iz’umuryango ndetse n’amasomo byashyizwe ku ruhande.

Igitaramo cye kitabiriwe mu buryo bukomeye

Dominic Ashimwe yeretswe urukundo rwinshi

Dominic hamwe na Aime Uwimana

Dominic hamwe na Alex Dusabe

Bosco Nshuti hamwe n’umufasha we

Dominic yashimiye cyane Mani Martin