Korali Bonheur ikorera umurimo w’lmana mu karere ka Kamonyi kuri ADEPR Runda ni korali ifite abaririmbyi bagera 113.
lyi korali yatangiye umurimo wo kuririmba mu 1983 itangirana n’abaririmbyi 6 aribo: Nshimiyimana Emmanuel, Mukandamage Viliginie, Musenyimana Vastia, Ruhingura Jean, Bapfakwandika Daphrose na Rangira Leopord.
Amakuru Paradise yamenye ni uko muri aba baririmbyi harimo babiri batabashije gukomereza urugendo rwabo ku isi kuko baje kwitaba Imana, abo akaba ari Bapfakwandika Daphrose na Rangira Leopord.
Korali Bonheur yatangiye yitwa “Korali y’icyumba” ikorera umurimo w’Imana muri Paroisse ya Nyarugenge mu mujyi wa Kigali, buri cyumweru niho bateraniraga. Baje kuva i Nyarugenge bimurirwa i Karama, aha i Karama bahateraniye kugeza mu mpeshyi mu 1986.
Bavuye i Karama boherezwa mu cyahoze ari Gitarama, bahabwa umudugudu wa Runda. Kuva icyo gihe Korali yahise ihindurirwa izina yitwa “Korali Runda”. Korali yakomeje gukora umurimo w’Imana ari nako ikomeza kwaguka yakira abaririmbyi.
Mu mwaka 1997 Korali Runda yahinduriwe izina yitwa "Bonheur" ari naryo zina ifite kugeza ubu. lyi korali yaje gushyira hanze indirimbo yabo ya mbere mu 1998 ku buryo bw’amajwi “Audio”, akaba ari indirimbo bise "Amavi Yose azapfukamira Imana".
Nyuma yo gusohora iyo ndirimbo korali Bonheur yaramenyekanye yifuzwa n’abatari bake ndetse itangira kujya hirya no hino mu ivugabutumwa ahantu hatandukanye harimo: "Rubonobono, Kiruhura, Mucyahafi, Gitarama, Ruhengeri, Nyarugenge, Butare, Mu mutara, Muruturusu, Gikongoro, Galiraya (mu Gatsata), Bugesera n’ahandi.
Muri 2015 iyi korali yashyize hanze amashusho y’indirimbo (video ). Kuva icyo gihe kugeza ubu korali yakomeje gukora ibikorwa bitandukanye harimo aho bubakiye umuririmbyi bamukura mu manegeka; bafasha abana bafite ibibazo mu buryo bwo kubishyurira amafaranga y’ishuri (School fees) ndetse no kwishyurira abantu ubwisungane mu kwivuza n’ibindi.
Iyi korali kandi imaze kuyoborwa n’abayobozi 6 (President) aribo: Nshimiyimana Emmanuel, Niyomwungeri Marcel, Tuyisabe Jonathan, Nzabonitegeka Eduard (witabye Imana), Twagira Marc na Ahizampera Alphonse uyiyoboye kugeza ubu.
Muri uyu mwaka wa 2023 mu kwezi gushize Korali Bonheur yafashe amashusho (Video recording) y’indirimbo zabo zitandukanye. Korali Bonheur ikataje mu ivugabutumwa ikorera hirya no hino mu gihugu kandi bakarikora mu ndirimbo ndetse no mu bikorwa by’ubugiraneza.
Korali Bonheur ifite amateka akomeye mu murimo w’ivugabutumwa
RYOHERWA N’INDIRIMBO "WITINYA" YA KORALI BONHEUR
