Michael Tesfay ukoresha amazina ya Prophetic ku mbuga nkoranyambaga ze zimwe na zimwe nka Instagram, yatangaje ko iyo atekereje kuri Miss Nishimwe Naomi bitegura kubana, mu mutwe we hahita hazamo amagambo yo muri Bibiliya, mu gitabo cy’Imigani 18: 22.
Uyu murongo muri Bibiliya ikoresha ururimi rw’Ikinyarwanda ugira uti: “Ubonye umugore mwiza aba abonye ikintu cyiza, akaba agize umugisha ahawe n’Uwiteka.”
Ng’uko uko Michael Tesfay abona uyu mukobwa watsinze amarushanwa y’ubwiza ya Miss Rwanda 2020, Miss Nishimwe Naomi, amubona nk’ikintu cyiza, umugisha yahawe n’Uwiteka.
Nk’uko yabigaragaje ku ifoto yashyize ku rukuta rwe rwa Instagram, iyo yitegereje Miss Nishimwe Naomi akamuhuza n’iki cyanditwe cyo mu Migani 18: 22 ahita agira ati: “Warakoze Mana.”
Prophetic (Michael Tesfay) ufite inkomoko muri Etiyopiya nyuma y’igihe akundana na Miss Nishimwe Naomi, Umukristo mu Itorero rya Noble Family Church riyoborwa na Apostle Mignonne Alice Kabera, yamwambitse impeta ya Fiancaille ku wa 1 Mutarama 2024.
Nk’uko babitangaje, itariki bazabaniraho nk’umugabo n’umugore mu rugo ruhesha Imana icyubahiro nk’uko bakunze kubyivugira, yamaze kumenyekana, kuko buzaba ku wa 29 Ukuboza 2024.
Kuri wa Gatatu tariki ya 28 Kanama 2024, ni bwo Miss Nishimwe Naomie afatanyije n’umukunzi we bitegura kubana nk’umugabo n’umugore, Michael Tesfay, bifashishije Instagram batangaje amagambo agira ati: “Tunejejwe no kubamenyesha ko itariki y’ubukwe yafashwe, si twe turose tuyibabwiye. Mube mwiteguye, kuko muzi ibyo ari byo. Ubutumire buri mu nzira.”
Miss Naomie n’umukunzi we bazakora ubukwe mu mpera za 2024
