Umuramyi Umugwaneza Honorine ahamya ko ubwo yatangiraga urugendo rwe rw’ubuhanzi yifuzaga kuzamera nka Umutesi Carine Tracy afata nk’indorerwamo yireberamo muri Gospel.
Mu minsi ishize ubwo yatumirwaga mu kiganiro Inkomezabugingo kuri Televiziyo ya BTV kiyoborwa n’umunyamakuru Didace, Umugwaneza Honorine yabajijwe ikibazo cyiza cyane n’umunyamakuru wa Paradise.rw ukunze kwifashishwa nk’umusesenguzi wa BTV.
Yamubajije umuhanzi afata nk’ikitegerezo, nta kuzuyaza, Umugwaneza Honorine yahise asubiza ati"Icyitegerezo cyanjye ni Tracy. Nakuze nkunda uburyo aririmba, uburyo yambara ndetse n’ubutumwa atanga, kubw’ibyo nifuza gushinga ikirenge mu cye".
Carine Tracy Umutesi, ni umuhanzikazi mu muziki wo kuramya no guhimbaza Imana uzwi cyane mu ndirimbo ’Ntamahitamo’, ’I am in love with Jesus’ n’izindi.
Umutesi Carine Tracy yatangiye gukora umuziki tariki 21 Nzeli 2016, icyo gihe hari ku munsi w’isabukuru ye y’amavuko. Indirimbo ‘I am in love with Jesus’ (Ndi mu rukundo na Yesu) niyo yabimburiye izindi gusohoka.
Nyuma yaho yakoze izindi ndirimbo zinyuranye zirimo na ’Ntamahitamo’ yigaruriye imitima ya benshi. Mu kiganiro aherutse kugirana na Paradise.rw, Tracy yatangaje ko mu bahanzi ba Gospel akunda cyane harimo Patient Bizimana na Aline Gahongayire, Savant ndetse n’itsinda rya True Promises.
Nyuma yo kugezwaho ubutumwa bumubwira ko Honorine amufata nka Role model we, Tracy yasubije Paradise.rw ati" Ni ukuri byandenze pee byanshimishije cyaneeeee ndifuza nanjye guhura nawe rwose tukamenyana".
Ikindi, yatangarije abakunzi be ko mu minsi iri imbere yitegura gushyira hanze izindi ndirimbo nyinshi kandi nziza. Yagize ati"Nyuma yo guhugira mu nshingano z’urugo, ndatangariza abakunzi ba Gospel ko Tracy agiye kugaruka mu mbaraga nyinshi nkasohora indirimbo nyinshi kandi nziza. Munyitege rero".
Honorine Umugwaneza akaba ari umwe mu bahanzi beza barimo kuzamuka. Nyuma yo gukora indirimbo "NJE GUKORA" yakozwe na Producer w’umuhanga witwa Niyitanga Honore (Oreni), umwe mu basore barimo kuzamuka neza ndetse bivugwa ko yaba agiye gushinga imwe muri label ikomeye mu mujyi wa Kigali.
Homorine Umugwaneza impano nshya yo gushyigikirwa
Carine Tracy yateguje indirimbo nshya nyinshi
NTA MAHITAMO YA TRACY CARINE IKURYOHERE
NJE GUKORA YA HONORINE UMUGWANEZA IKURYOHERE
