Uwanyana Assia, umugore wa nyakwigendera Pastor Theogene Niyonshuti wari uzwi ku izina ry’inzahuke, yashimiye abamufashije mu gihe yibukaga ku nshuro ya mbere umugabo we umaze umwaka apfuye, ibyamweretse ko atatereranywe.
Nk’uko Assia yongeye kubisubiramo, umwaka wari ushize kandi mu kumwibuka byari ngombwa ko abantu bamuherekeza na we akitwaza indabo. Yagize ati: “Umwaka wari ushize, byari ngombwa ko njya kwibuka ngashyiraho n’indabyo, byari bikwiriye cyane.”
Assia uvugwaho kugira umutima mwiza utuma agira inshuti nziza kandi nyinshi, ubwo yajyaga kwibuka umugabo we ntiyagiye wenyine, ahubwo inshuti ze zamuteye ingabo mu bitugu. “Najyanye n’abantu nari nabwiye baramperekeza, tujya gushyiraho indabyo, mboneraho no gushimira umuntu wese nabwiye ko yamperekeza tukajyana akumvira ubutumire, nkabona tujyanye kwibuka.”
Assia yifuriza n’abandi bose bagira ibyago kugira abantu bababa hafi, kuko bituma babasha gukira vuba kuko baba bumva ko batasigaye bonyine. “Hari ukuntu umuntu agira ibyago abantu bakaba bamutererana, ariko nge ntibanteranye. Byanyeretse ko ntari ngenyine, binyereka ko mfite amaboko, mfite abantu banshigikiye.”
Yongeyeho ati: “Biba byiza iyo ugize ibyago mu buzima busanzwe, ukagira abantu bakuba hafi kuko bikongerera imbaraga, ukumva utari wenyine.” Kuba abantu baramubaye hafi mu bihe byose byatumye yumva agaruye imbaraga, ndetse ubu akaba ahamya ko amaze gukomera. Yabivuze agira ati: “Ubu nange narakomeye.”
Ku wa 22 Kamena 2023, inkuru mbi y’urupfu rwa Pasiteri Théogène Niyonshuti wamenyekanye ku izina ry’Inzahuke’ wazize impanuka y’imodoka ava i Kampala muri Uganda yatangiye kumenyekana, bigera mu rukerera rwo ku wa 23 yabaye kimomo mu Rwanda.
Impanuka yabaye ari kumwe n’abandi bantu batatu mu modoka, bose hamwe ari bane. Pasiteri Théogène n’abantu babiri bahise bapfa, umuririmbyi w’indirimbo zihimbaza Imana, Ntezimana Donath, wari inshuti ye magara, we akomereka bikabije.
Pasiteri Niyonshuti Théogène yari umushumba muri Paruwasi ya ADEPR Kamuhoza mu Itorero rya Muhima. Ivugabutumwa rye rya nyuma ryagutse yarigaragayemo ku wa 17 Kamena 2023, ni igiterane yatumiwemo cyiswe “In his Dwelling”, bisobanuye “Mu buturo bwe’’, cyahuriranye no kwizihiza isabukuru y’imyaka itanu ya Zion Temple Ntarama.
Yashakanye na Uwanyana Assia, apfa babyaranye abana bane ndetse bari bafite abandi benshi bareraga biganjemo abo yakuye mu buzima bwo ku muhanda.
Assia yibutse umugabo we Theogene umaze umwaka apfuye
