Mu mateka ya Leta Zunze Ubumwe za Amerika, hagiye habaho ibihe bikomeye aho abaperezida bamwe bagabweho ibitero byo kubica, ariko bagasimbuka urupfu mu buryo butangaje, aho bamwe bavuga ko ari ibitangaza Imana yashatse kwikorera ngo ibongeze indi minsi yo kubaho. Abenshi babyemera nk’amahirwe, abandi bakabibonamo ukuboko kw’Imana kwabakingiye mu bihe bikomeye cyane.

Kuva kuri Andrew Jackson kugera kuri Donald Trump

1. Andrew Jackson

Bagerageje kumwica mu 1835. Imbunda zombi zananiwe gukora neza igihe umwicanyi yashakaga kurasa. Uwo mugabo (Richard Lawrence) yari afite imbunda ebyiri za kera (pistols), ariko zombi zarapfubye (misfire) bitewe n’ikoranabuhanga ry’icyo gihe ryari ridakomeye, powder ntiyafata neza, mbese flint/primer ntiyakora. Ibi byatumye nta sasu na rimwe risohoka, bityo Andrew Jackson arokoka nta nkomere.

2. Abraham Lincoln

Mu 1861, yarokotse umugambi wo kumwica witwaga “Baltimore Plot” ahindura inzira y’urugendo rwe mu ibanga.

Abraham Lincoln yari amaze gutorerwa kuyobora Amerika, agiye kujya kurahira i Washington, D.C. Mu rugendo rwe anyuze mu mujyi wa Baltimore, hamenyekanye amakuru y’uko hari itsinda ry’abantu bashakaga kumwica igihe gari ya moshi ye yari kuhagera. Uyu mugambi waje kumenyekana nka “Baltimore Plot,” aburirwa mbere n’umutekano wari uyobowe na Allan Pinkerton.

Kugira ngo barinde ubuzima bwe, hafashwe icyemezo cyo guhindura gahunda y’urugendo rwe mu ibanga rikomeye. Ntiyakomeje inzira yari yateganyijwe ku mugaragaro, ahubwo yafashe indi gari ya moshi mbere y’igihe, agenda yihishe ndetse yambaye imyambaro itamugaragaza nk’umukuru w’igihugu. Ibi byatumye agera i Washington amahoro, umugambi wo kumwica urapfuba.

3. Theodore Roosevelt

Mu 1912 yarasiwe mu bikorwa byo kwiyamamaza. Isasu bamurashe ntiryamwivuganye kuko ryanyuze mu bintu yari afite mu mufuka, birimo impapuro n’agatabo k’ijambo rirerire yari agiye kuvuga.

Ibyo byatumye igikomere kitaba igikomeye nk’uko byari byitezwe. Nubwo yaviriyemo amaraso, Roosevelt ntiyigeze areka ibikorwa bye ako kanya; yakomeje ijambo rye ry’iminota myinshi imbere y’abaturage mbere yo kwemera kujya kwa muganga. Ibi byagaragaje imbaraga n’ukwihangana bye.

4. Franklin D. Roosevelt

Mu 1933, igihe yari i Miami avugira abaturage, umugabo yarashe amasasu atanu agambiriye kumwica. Nubwo yari ari hafi cyane, Franklin Roosevelt ubwe ntiyakomerekejwe n’ayo masasu.

Ariko ayo masasu yakomerekeje abandi bantu bari kumwe na we, harimo n’umuyobozi w’umujyi waje kugwa muri icyo gitero nyuma. Ibi byari ibintu bikomeye cyane byerekanye ko igitero cyari gifite intego yo guhungabanya ubuyobozi bushya bw’igihugu, ariko nticyageze ku ntego yacyo.

5. Gerald Ford

Mu 1975, Gerald Ford yahuye n’ibitero bibiri bitandukanye mu gihe gito cyane cy’ukwezi kumwe. Ibi bitero byombi byabereye muri California.

Ku nshuro ya mbere, umugore witwaga Lynette “Squeaky” Fromme yagerageje kumurasa ariko afatwa mbere yo kurasa.

Ku nshuro ya kabiri, undi mugore Sara Jane Moore yarashe amasasu abiri, ariko yombi ntiyamugeraho. Abashinzwe umutekano bahise bamufata ako kanya. Ibi byagaragaje urwego rwo hejuru rw’umutekano ariko bigaragaza n’ukuntu Ford yari mu kaga gakomeye.

6. Ronald Reagan

Mu 1981, Reagan yarashwe ari mu mujyi wa Washington D.C. ubwo yari avuye mu nama. Isasu ryamukomerekeje bikomeye cyane, ryamugeze mu bihaha hafi cyane n’umutima.

Abaganga bahise bamujyana mu bitaro vuba, aho yakoze operation ikomeye. Nyuma y’iminsi mike, yagarutse mu buzima busanzwe, akomeza imirimo ye. Ibi byatumye agaragara nk’umuyobozi ufite imbaraga no gukira vuba ku mpanuka ikomeye.

7. Donald Trump

Mu 2024, Trump yarokotse igitero cy’amasasu cyamukomerekeje ku gutwi mu gikorwa cyo kwiyamamaza.

Umuntu wari wihishe yararashe, ariko amasasu amwe amukomeretsa byoroheje ku gutwi, abashinzwe umutekano bihutira kumukuramo.

Nyuma yaho, hari n’indi migambi yo kumwica yaburijwemo mbere y’uko ishyirwa mu bikorwa, kubera ibikorwa by’inzego z’umutekano zamurindaga.

Ibi byose byerekana ko nubwo bari mu kaga gakomeye, hari uburyo batabarwaga ku munota wa nyuma, ibyo benshi bafata nk’ikimenyetso cy’uko hari ukuboko kwabarindaga mu buryo budasanzwe.