Mu gihe intambara ihanganishije Iran, Isirayeli na Leta Zunze Ubumwe za Amerika ikomeje gufata indi ntera, ijambo ry’amahoro rikomeje kumvikana riturutse mu bayobozi b’amadini, cyane cyane Umushumba wa Kiliziya Gatolika ku Isi, Papa Léon XIV.

Mu misa yayoboye ku wa 29 Werurwe 2026 muri Bazilika ya Mutagatifu Petero mu Butaliyani, yagaragaje ko Imana itumva amasengesho y’abashoza intambara, anashimangira ko Yezu Kristo atakwifashishwa mu gutanga ishingiro ry’intambara.

Aya magambo yaje mu gihe amakimbirane hagati y’ibi bihugu akomeje gufata indi ntera, aho ibitero by’indege n’intwaro zikomeye bikomeje gutwara ubuzima bw’abantu benshi, barimo abasivile n’abayobozi bakuru.

Raporo zitandukanye zigaragaza ko iyi ntambara imaze guhitana abantu bagera ku bihumbi, abandi ikabasigira ibikomere bikomeye, ibintu byatumye isi yose ikomeza guhangayikishwa n’ingaruka zayo.

Papa Léon XIV, mu butumwa bwe, yavuze amagambo akomeye agaragaza uko Kiliziya ibona intambara. Yagize ati: “Ni Imana yacu, Yezu, Umwami w’Amahoro, ntiyemera na busa intambara ndetse nta we uyifashisha ngo ahe ishingiro intambara.”

Yakomeje ashimangira ko n’abasenga basaba gutsinda mu ntambara batumvwa n’Imana, agaragaza igice cya Bibiliya kivuga ngo: “nubwo mwasenze cyane nta bwo nzabumva, ibiganza byanyu byuzuye amaraso.” Ibi byerekana ko, mu myumvire ya gikristo, intambara itari mu bushake bw’Imana.

Iyo usesenguye aya magambo, usanga afite imbaraga mu rwego rw’imyemerere n’umuco, ariko ikibazo gikomeye kiba mu kuyashyira mu bikorwa ku rwego rwa politiki n’umutekano mpuzamahanga.

Ibihugu nka Iran, Isirayeli na Amerika bifata ibyemezo bishingiye ku nyungu za politiki, umutekano n’ubukungu, aho amagambo y’amadini atajya agira ijambo rikomeye mu byemezo bya gisirikare.

Nubwo bimeze bityo, ubutumwa bwa Papa Léon XIV bufite uruhare runini mu gukangurira isi kwibuka agaciro k’amahoro.

Iyo avuga ko Yezu atigeze yitwaza intwaro cyangwa ngo arwane, aba agaragaza urugero rw’ubuzima bwa gikristo rushingiye ku kwihangana no gukunda abanzi. Ibi bihura n’inyigisho za Bibiliya zishishikariza abantu gushaka amahoro no kwirinda urugomo.

Ku rundi ruhande, hari ikibazo cy’uko bamwe mu bayobozi b’ibi bihugu bakoresha imyemerere mu gusobanura ibikorwa byabo bya gisirikare.

Urugero rwatanzwe ni Minisitiri w’Intambara wa Amerika, Pete Hegseth, wavuze amagambo asaba guhana bikomeye abo yise ko badakwiriye imbabazi. Ibi bigaragaza uko imyemerere ishobora gukoreshwa nabi, igahindurwa igikoresho cyo gushyigikira intambara aho kuyirwanya.

Bityo, nubwo ubutumwa bwa Papa Léon XIV bufite ukuri gukomeye mu rwego rw’umwuka, ntibyoroshye ko bwahita buhagarika intambara. Icyakora, bushobora kugira uruhare mu guhindura imyumvire y’abaturage n’abayobozi, bukabatera gutekereza ku ngaruka z’intambara no gushaka ibisubizo binyuze mu biganiro aho gukoresha intwaro.

Ikindi kandi, Papa yakomeje gusaba ko impande zihanganye zahagarika imirwano zigakoresha inzira y’ibiganiro, agaragaza ko ibitero byo mu kirere bikomeje kwica abantu benshi bidakwiriye gukomeza. Ibi ni ubutumwa bushyigikira amahoro, bushobora gutuma amahanga n’imiryango mpuzamahanga yinjira mu biganiro byo gushaka igisubizo kirambye.

Ubutumwa bwa Papa Léon XIV ni ijwi rikomeye ry’amahoro mu isi yuzuyemo amakimbirane. Nubwo bushobora kudahita buhagarika intambara ihanganishije Iran, Isirayeli na Amerika, bufite ubushobozi bwo guhindura imitima y’abantu, bukabibutsa ko amahoro ari yo nzira yonyine irambye.

Iherezo ry’intambara ntirishingira ku ntwaro, ahubwo rishingira ku bushake bw’abantu bwo kuganira no kubana mu mahoro.