Umusizi witwa Umurizabageni Nadia uzwi cyane mu kuriza abageni mu bukwe yasohoye igisigo yise "icupa" gikebura abakobwa biyandarika.
Mu minsi ishize mu itangazamakuru hacicikanye inkuru y’umukobwa washyize icupa mu gitsina cye, byamaganwa na benshi by’umwihariko.
Itsinda ry’abantu 9, abahungu 3 n’abakobwa 6 bahurira ku rubuga rwa WhatsApp bise ‘Rich Gang’ bafashwe n’Urwego rw’Ubugenzacyaha, RIB, bakurikiranweho ibyaha birimo gusakaza amashusho y’urukozasoni aho 7 muri bo bafashwe bashinjwa uruhare mu gufata no gusakaza amashusho bakora imibonano mpuzabitsina.
Umurizabageni Nadia yavuze ko abakobwa bashyize amacupa mu gitsina cyabo bakoze ibihabanye n’umuco nyarwanda n’amategeko y’Imana. Yanakebuye umwe mu bakobwa bazwi ku mbuga nkoranyambaga wise abagabo ngo "Amagweja".
Aganira na Paradise, Umurizabageni Nadia yagize ati: "Imvo n’imvano y’iki gisigo yaturutse ku ishyaka ryo gukomeza gusigasira amahame shingiro y’umuco nyarwanda."
Yakomeje agira ati "Ubusanzwe umucu n’iterambere ry’igihugu bishingiye ku rubyiruko, birababaje kuba imbuga nkoranyambaga zarahindutse indiri yo kwiyandarika no gucuruza umubiri aho kwifashishwa nk’ishingiro ryo gutanga umurimo".
Yavuze ko biteye agahinda kuba umukuru w’igihugu aherutse kugaragara mu mbwirwaruhame agaragaza agahinda aterwa no kwiyandarika kwa bamwe mu rubyiruko ku mbuga nkoranyambaga.
Yagize ati: "Kuba nifashishije icupa ni kimwe mu bimaze iminsi bisiragira ku mbuga nkoranyambaga". Yavuze ko nawe ubwe hari aho asigaye atambuka abantu bamwe bakamubaza niba nawe akoresha icupa.
Nadia ati: "Ese Imana yaremye igitsina gabo iyobewe ko hariho amacupa? Kuki ? Ntabwo byumvikana. Rubyiruko mwe mureke twininire twisuzume twe gushukwa n’imyaka turimo ndetse n’amafaranga, duhange amaso umurimo unoze nk’uko abayobozi b’igihugu cyacu babidukangurira."
Ku ngaruka zo kwiyandarika, yagize ati: "Tekereza igihe uzaba ugize imyaka 80 umwuzukuru wawe akajya akwereka video ushyira icupa mu gitsina cyawe akakubaza ubwoko bw’urumogi wanywaga. Uzamusubiza gute?"
Yanaboneyeho gusaba abantu kwibuka ko ibi biri mu bishobora gukongeza umujinya w’Imana "tukazisanga nk’i Sodomu n’I Gomora cyangwa i Los Angeles."
Umurizabageni Umurerwa Nadia ni umukobwa ukiri muto dore ko yasoje amashuli yisumbuye mu mwaka wa 2024. Akunze kugaragara mu mashusho yo mu bukwe arimo kuriza abageni akaba ari naho iri zina ryavuye. Avuka i Nyagatare ariko kuri ubu akaba aba i Musanze.
Umurizabageni Nadia yakoze igisigo cyuje impanuro ku rubyiruko
