Indirimbo "Mana urera" yakunzwe cyane mu bihugu bitandukanye ikaba ikomeje kwifashishwa n’amatorero atandukanye, amatsinda n’abahanzi batandukanye mu mwanya wo kuramya no guhimbaza Imana.

Kuri ubu rero iri tsinda ryongeye gutereka icyansi cy’amata y’Inshyushyu binyuze mu ndirimbo "Gologota" yibutsa abatuye isi yose kuzirikana umurimo wo gucungurwa bahawe ubwo Kristo yazukaga nyuma y’urupfu rw’agashinyaguro rwabereye i Golgota ku musaraba.

Muri iyi ndirimbo, uyu mutwe w’abaririmbyi babwirisha inanga n’amajwi meza bagize bati: “I Gologota Yesu yarababajwe, I Nyabihanga yarashenjaguwe, yabambwe mu ruhame ku bwanjye umunyabyaha ngo ntazarimbuka."

Iri tsinda rikomeza rishimangira ko Yesu yatwaye ibyaha by’abari mu isi maze akabambika ukwera kwe nk’umunyembabazi.

Ubutumwa bukomeza bugira buti: "Iyo ataba wowe nari kuba uwa nde? Yesu warakoze, amaraso yawe ni yo yampinduye kuba umwana w’Imana."

Itsinda rya True Promises, rimwe mu matsinda amaze kuba ubukombe ku isi yose nk’ubwami bwa Ahasuwerusi bwaheraga mu Buhinde kugeza Etiyopiya.

Indirimbo Gologota ije yiyongera ku zindi nyinshi iri tsinda ryashyize hanze zigakundwa na benshi zirimo nka Nzamutegereza, Umwami Ni Mwiza, Yesu Ni Mwiza, Iraduhetse, Narababariwe, Mana urera Imana Yacu, Uwiteka Ni We Mugabane n’izindi. Kugeza ubu True Promises imaze gushyira hanze alubumu 5.

Kuva mu 2009, Itsinda rya True Promises ryakoze ivugabutumwa mu duce dutandukanye mu gihugu cy’u Rwanda no mu bihugu byo mu Karere ari nako yaguye imikorere igatangiza amashami mu bihugu bitandukanye nka Kenya, Burundi, Ubwongereza na Amerika.

Usibye umurongo wa Youtube ‘True Tunez’ banyuzaho ibihangano by’aya mashami yose, True Promises ikoresha imbuga nkoranyambaga zitandukanye isakaza ubutumwa bwiza bwa Yesu Kristo.