Benshi bamukunze mu ndirimbo "Umuyoboro" bibabera inzira ibakura mu mwijima ibageza ku Mana"! Ntawakwibagirwa radiyo zo mu bigo by’amashuli zajyaga zicuranga indirimbo ze imitima isobetse amaganya n’amarira igashira ikiniga.

Indirimbo "Ibyiringiro" (abize muri internat hagati ya za 2004-2010 barabizi) yatumye amagana y’abanyarwanda bakizwa. Indirimbo z’uyu mupapa Alexis Dusabe abanyeshuli bize mu bigo by’abihaye Imana by’umwihariko abize muri Groupe Scholaire Saint Joseph Kabgayi na Saint Leon baziguhaho ubuhamya.

Ni ndirimbo zatumye bareka kwiba amashu, karoti ndetse n’ibibiringanya by’abafurere b’abayozefiti ndetse n’abapadiri (Abo kwa Gahima Gaspard mu bishyimbo n’abo kwa Rukanga mu bihaza barabyibuka.

Ni ndirimbo abazi Nagiriwubuntu Dieudonne (Dione) yajyaga atera abanyeshuli bagashira intimba n’agahinda (Kuri ubu ni Umuyobozi w’urwibutso rwa Kigali akaba na Mwalimu mu itorero rya ADEPR nyuma yo gushumba korali Amahoro ya ADEPR Remera.

Alexis Dusabe arateganya igitaramo gikomeye umwaka utaha cyo kumurika Album yambukiranya imipaka:

Amakuru Paradise icyesha umwe muri bari mu itsinda riri gufasha Alexis Dusabe aravuga ko mu 2025 afite igitaramo gikomeye ndetse kugira ngo wumve uburemere bwacyo ni cyo cya mbere gikomeye cyane azaba akoze ndetse kizaza no ku isonga mu bitaramo uzi byabayeho i Kigali.

Iki gitaramo mbaturamugabo kizaba kigamije kumurika Album idasanzwe kuri ubu irimo gutegurwa na kabuhariwe Producer Niyitunga Aaron (Tunga wa Tunga) umaze iminsi mu Rwanda mu ibanga rikomeye. Izaba igizwe n’ndirimbo 6 ndetse bakaba bageze kure bayikoraho.

Muri iki Gitaramo bakaba bazamurika album idasanzwe yo kugarura Alexis Dusabe mu isura nshya (Kongera Gukora) mbese abantu bagiye kubona Alexis Dusabe udasanzwe nk’uko byatangajwe n’itsinda riri kumufasha muri Gala Dinner yabereye muri M-Hotel.

Iyi album bari gutunganya ni album yambukiranya imipaka. Paradise yabashije no kubona amwe mu mafoto bari muri studio. Amakuru yizewe ni uko kuri iki Cyumweru kuri Pentekote, Alexis Dusabe na Aaron Niyitunga bakora imwe mu ndirimbo iri kuri Album idasanzwe ya Alex Dusabe.

Icyakora uwaduhaye aya makuru yizewe wanze ko tumuvuga mu izina, yatubujije no kuvuga izina ry’iyi ndirimbo. Imikoranire ya Alex Dusabe n’itsinda rigari riri kumufasha, ni umushinga washowemo amafaranga menshi cyane.

Alexis Dusabe bamubonyemo umunyempano udasanzwe kandi ni ko kuri ntasanzwe!!

Amakuru atariho ivumbi avuga ko mu kumurika iyi Album idasanzwe ya Alex Dusabe y’indirimbo 6 hateganyijwe kuzazana umuhanzi mpuzamahanga kandi ukomeye cyane ku Isi, bakazafatanya mu gitaramo karundura. Amasezerano yamaze gukorwa, uretse ko bikiri ibanga.

Iyi album azamurikira muri icyo gitaramo, iriho indirimbo nziza zimwe buri muntu wese uzayumva n’uwangaga urunuka umuziki azawukunda. Uwaduhaye amakuru yagize ati: "Mbega indirimbo nziza we!" Si ikinyarwanda gusa kuko iyi Album izaba iriho n’indirimbo z’igiswahili ndetse n’iz’igifaransa.

Uyu mugabo wahaga Paradise amakuru yagize ati: "Niba yarandikaga indirimbo kuriya muri iriya myaka zigakundwa kuriya ikoranabuhanga riri hasi, ibaze uko iyi ndirimbo ukozwe kuri ubu zimeze!"

Ndetse kugira ngo mwumve neza ko Paradise ifite amakuru atari amatsindirano, mu ndirimbo Alex Dusabe ahugiyeho muri iyi minsi harimo indirimbo idasanzwe ngo abari kumufasha bumvise bararira!!

Ngo Alex Dusabe arayiririmba abantu bose bakarira mbese ni indirimbo zujuje ibyangombwa byo kuramya. Halleluya!!!! Ku gifaransa cyo muri iyi ndirimbo, yagize ati: "Twakoze igifaransa cy’abafaransa apana gukora translation".

Alex Dusabe agiye kwiharira umwaka wa 2025

Bamwe mu bari mu itsinda rigari riri gufasha Alex Dusabe

Producer Aaron Niyitunga amaze iminsi mu Rwanda mu ibanga rikomeye aho yaje gukora ku mishinga ya Alex Dusabe