"Rwanda Komera" ni indirimbo ya gatatu iboneka ku murongo wa Youtube witwa "Abasaruzi Choir ADEPR Bweramvura’’. Ni indirimbo igaruka ku mateka ya Jenocide yakorewe Abatutsi mu 1994.

Muri iyi ndirimbo aba baririmbyi bagira bati: "Rwanda warababaye, Jenoside yakorewe Abatutsi mu 1994 yatumye ubura abawe ariko Imana yaragutabaye urongera ubona ubuzima, humura, humura, humura."

Muri iyi ndirimbo banagaruka ku ruhare rwa FPR Inkotanyi mu guhagarika Jenoside yakorewe Abatutsi mu 1994. Bagira bati: "Imana yaraturokoye ikoresheje Inkotanyi, abanyarwanda tubona igihugu turongera tubona ubuzima."

Aganira na Paradise, Bagaza Jean Damascene umuyobozi w’iyi korali yavuze ko iyi ndirimbo yanditswe hagamijwe guhumuriza imitima y’abarokotse Jenoside yakorewe Abatutsi mu 1994.

Ati: "Amateka y’igihugu cyacu ni maremare, Jenoside yakorewe Abatutsi yasigiye benshi intimba aho bamwe bagizwe imfubyi abandi bahinduka intwaza mu gihe hari n’imiryango yazimye burundu".

Ati: "Nk’abanyarwanda twatekereje ibi byose havamo ishimwe dushima Imana ndetse na FPR Inkotanyi yahagaritse Jenoside yakorewe Abatutsi, inagarurira abanyarwanda ubuzima aho kuri ubu turi mu gihugu cyiza cy’amata n’ubuki cyuzuyemo amahoro n’umutekano".

Yavuze ko nka Korali Abasaruzi bifuje gutanga ihumure ku banyarwanda bashegeshwe n’ayo mateka kandi biteguye gukomeza gutanga umusanzu wabo nk’abanyarwanda bagakomeza kwiyubaka.

Abasaruzi ni korali y’ubukombe yatangiye ivugabutumwa mu mwaka wa 2007 mu itorero rya ADEPR Bweramvura ikaba yaratangiranye abaririmbyi 7 (abasore 5 n’abakobwa 2).
Kuri ubu igizwe n’abaririmbyi 130 bahuje intego yo kwamamaza ubutumwa bwiza bwa Yesu Kristo.

Imaze gusohora indirimbo eshatu harimo ebyiri z’ubutumwa bujyanye no kwibuka Jenoside yakorewe Abatutsi mu 1994 arizo: "Umuhoza’’, "Rwanda komera" ndetse na ’’Hanura’’.

Korali Abasaruzi yashyize hanze indirimbo "Rwanda Komera"