Itsinda ryo kuramya no guhimbaza Imana rya Holy Entrance Ministries ni itsinda rifite icyicaro mu mujyi wa Kigali ndetse n’amashami mu karere ka Kayonza no mu gihugu cya Kenya. Kuri ubu iri tsinda ryasohoye indirimbo nziza cyane yiswe "I Nyabihanga."

Mu kiganiro na Paradise.rw, Bwana Rugenerwa Ivan ushumbye iri tsinda yatangaje ko iyi ndirimbo yashibutse mu ihishurirwa ry’ijambo ry’Imana riboneka mu rwandiko Pawulo yandikiye Abaroma igice cya gatanu.

Yagize ati: "Tuvuga ko i Nyabihanga cyagwa se i Gorogota twahaherewe agakiza tukahabonera imbabazi ze tukanahabonera urukundo ruhebuje".

Akomoje ku cyerecyezo bafite dore ko uyu mwaka bakoze ibikorwa by’indashyikirwa harimo ibitaramo cyabo bise "Good News" cyabaye le 02/07/2023, yagize ati: "Icyerekezo dufite ni ugukomeza kwamamaza ubutumwa bwiza binyuze mu bihimbano byiza biteguranywe ubuhanga".

Yakomeje atangaza ko bateganya gutegura imigoroba yo kuramya no guhimbaza Imana bakaba bazakomeza kubimenyesha abakunzi babo mu minsi iri imbere.

Yavuze umusaruro wavuye mu gitaramo cyiswe Good News, ati: "Igitaramo duheruka gukora cya Goodnews season 1 ni igitaramo cyagenze neza. Icyo kwishimirwa ni uko abakunzi bacu bitabiriye igitaramo bahagiriye ibihe byiza cyane byo kuramya Imana no guhimbaza. Ikindi ni uko indirimbo ziri gusohoka nizo zakoreshejwe muri icyo gitaramo".

Rugenerwa Yvan yaboneyeho no gushimira abakunzi babo n’abakunzi ba Gospel muri rusange bakomeje kubagaragariza urukundo abasaba gukomeza inzira yo kubashyigikira kugira ngo ubutumwa bwiza bugere ahantu hose indirimbo.

Indirimbo za Holy entrance ziboneka ku ma platform atadukanye nka YouTube, Sportify, Amazon, Deezer, Apple Music, iTunes, Boom play nizindi.

Holy Entrance Ministries yasohoye indirimbo nsha "I Nyabihanga"

RYOHERWA N’INDIRIMBO NSHYA "I NYABIHANGA" YA HOLY ENTRANCE