Mu kiganiro Ally Soudy yagiranye na InyaRwanda, yatangaje ko adahwema gutekereza ku kongera kubyutsa Salax Awards, ashimangira ko kuba ibi bihembo bidatangwa ari igihombo gikomeye ku muziki nyarwanda muri rusange, harimo n’uwo kuramya.
Ibihembo bya Salax Awards, byatangijwe mu 2008, byagize uruhare runini mu guha icyubahiro no kumenyekanisha impano nyinshi z’abahanzi, kugeza bihagaritswe burundu mu 2019.
Ally Soudy yavuze ko Salax Awards byafatwaga nka Grammy Awards yo mu Rwanda, bityo kubura kwayo bikaba byaratumye umuziki ubura urubuga rukomeye rwo guhemba no guha agaciro abahanzi bitwaye neza.
Salax Awards iramutse yongeye guhabwa imbaraga, byagira akamaro kanini ku muziki wo kuramya no guhimbaza Imana, umaze imyaka myinshi ukura ariko ugakomeza kubura ibihembo byihariye byawuha icyubahiro gikwiye.
Abahanzi baramya Imana bakunze gukora umuziki ugamije ubutumwa bwiza ku neza, ariko akenshi bakabura urubuga rubaha ishimwe rishingiye ku bwiza bw’ibihangano byabo, ku bwitange no ku ngaruka nziza bagira ku muryango nyarwanda.
Salax Awards isubukuwe ishobora gushyiramo ibyiciro byihariye by’indirimbo zo kuramya, amakorali, n’abahanzi ku giti cyabo, bigatuma uyu muziki ufatwa nk’igice cy’ingenzi cy’umuziki nyarwanda aho gufatwa nk’uwihariye gusa wo mu nsengero.
Ally Soudy yibukije ko ikibazo cyatumye Salax Awards igabanya imbaraga ari uko hari abahanzi bayifashe nk’amafaranga aho kuyifata nk’icyubahiro. Iyi nyigisho ifite isomo rikomeye ku muziki wo kuramya, kuko wo usanzwe ushingiye ku butumwa n’ishimwe, kuruta inyungu z’amafaranga.
Ibi byatuma uyu muziki uba urugero rwiza rwo gusubiza agaciro ibihembo, ukerekana ko Awards ari ishimwe rishingiye ku murimo wakozwe neza no ku ruhare wagize ku bantu.
Gusubukura Salax Awards byanafasha umuziki wo kuramya kubona urubuga mpuzamahanga, kuko byatuma indirimbo zo kuramya z’u Rwanda zimenyerwa nk’igice cy’umuziki ufite ireme, amateka n’abahanzi b’abahanga.
Ibi byashishikariza urubyiruko rufite impano mu muziki wo kuramya gukora kinyamwuga, ruzi ko hari aho umurimo warwo ushobora kugera ukagenerwa ishimwe n’icyubahiro.
Mu gihe Ally Soudy yagaragaje ko yiteguye kuzaharanira kongera kubyutsa Salax Awards igihe azabona ubushobozi n’umwanya, benshi mu bakurikirana umuziki nyarwanda babona ko gusubira ku murongo kw’ibi bihembo byaba ari intambwe ikomeye, by’umwihariko ku muziki wo kuramya, ushobora kongera guhabwa agaciro, icyubahiro n’umwanya ukwiye mu iterambere ry’umuziki w’u Rwanda.
Ally Soudy yarahiriye kuzabyutsa Salax Awards, kandi byabaintambwe nshya yo guha agaciro n’umuziki wo kuramya no guhimbaza Imana
