Iyi korali ibarizwa muri CEP ikaba igizwe n’abasoje kwiga muri iyi kaminuza b’abapentecote (Post Cepiens) ndetse n’abanyeshuri bakiga muri iyi kaminuza babarizwa mu Muryango wa CEP.

Nyuma y’amasaha makeya iyi ndirimbo igeze hanze, Paradise.rw yaganiriye na bwana Micomyiza Sylvain akaba Umuyobozi w’iyi korali aduha amakuru asukuye kuri iyi ndirimbo ndetse aha umugisha amwe mu makuru amaze iminsi avugwa muri iyi korali arimo igikorwa cyiswe Horeb Special Week ndetse n’umusangiro.

Yahereye ku ndirimbo nshya, ati" Yesu Kristo ashimwe. Iyi ndirimbo Tuzahurirayo ikubiyemo ubutumwa bwo kwihanganira ibibazo n’ibigeragezo duhura nabyo mu rugendo rugana mu ijuru."

Yongeyeho ati: "Nubwo byaba byinshi ariko umukristo agomba kubyihanganira agakomeza urugendo adacitse intege ahubwo agatumbira ururembo Yerusalem nshya (ijuru) aho Itorero tuzaruhukira turi kumwe na Kristo."

Yavuze ko iyi ndirimbo yibutsa abakristo kureba kuri destination (icyo batumbiriye) bakirengagiza iby’isi by’akanya gato.

Korali Horeb ikomeje kugaragaza imbaraga mu bikorwa bitandukanye bikubiyemo iby’urukundo, ingendo zigamije iyogezabutumwa ndetse no gusohora indirimbo nziza ndetse no gukorana n’itangazamakuru.

Nyamara iyo ugereranyije no mu minsi yashize usanga harashyizwemo imbaraga z’umurengera. Abajijwe imvano y’izi mbaraga nk’iza Samusoni yagize ati: "Ni byiza ko dukora cyane umurimo wa Kristo."

Yunzemo ati "Nawe ari mu isi (Kristo) yaravuze ati: "birankwiriye gukora umurimo w’Uwantumye hakiri ku mwanywa."

"Natwe nyuma ya COVID-19-twabonye iki aricyo gihe cyacu cyo kwamamaza ubutumwa bwiza bwa Kristo nta kindi turebyeho."

Ntiyari kutugendana atabwiye abakunzi b’iyi korali bimwe mu bikorwa bitandukanye bikomeje gutegurwa ku bwo guhuza imbaraga ku rwego rwiswe Advisory Council Committee ruyobowe na Bwana Niyigena Louis, Ubuyobozi bwa Horeb choir ndetse na n’ubuyobozi bwa CEP.

Yavuze ku musangiro wiswe Horeb-Day ndetse no kuri Horeb Special Day. Yavuze ko mu bikorwa biteganyijwe muri Horeb Special Week harimo gukorera ivugabutumwa muri CEP UR Gikondo. Iki cyumweru kidasanzwe cyatangiye kuwa 5 tariki 03/11/2023 kikazasozwa kuwa 05/11/2023.

Kuwa 03/11/2023 habaye ijoro ryo kuramya no guhimbaza Imana (overnight) ryabereye muri iyi kaminuza aho abasoje muri iyi kaminuza bifatanyije n’abaririmbyi bakiri abanyeshuli.

Ni igikorwa cyatangiye kuva saa mbiri z’ijoro kugeza saa yine z’ijoro aho korali Horeb yifatanyije na Korali Salem ndetse n’itsinda ryo kuramya no guhimbaza Imana ryiswe El Elohe worship team.

Muri iki cyumweru kidasanzwe, nta gahunda ihari yo kwicisha abantu umwuma mu buryo bw’umwuka. Abagabura b’Ijambo ry’Imana ni bwana Iyamuremye François Umuyobozi w’umurenge wa Rutunga akaba n’umwe mu baririmbyi ba Korali Horeb ndetse na Bwana Kagenza Ernest.

Ntibisanzwe kuri iki cyumweru muri CEP UR Gikondo Campus ahabera iteraniro ridasanzwe riri busohorerwemo indirimbo nshya ku mugaragaro nk’uko twabitangarijwe n’umuyobozi w’iyi korali.

Ku italiki ya 26/11/2023 Korali HOREB yateguye umunsi w’imbonekarimwe wiswe umusangiro. Ku bufatanye na rwa rwego rwa Advisory Council Committee hateguwe igikorwa cyiswe "UMUSANGIRO".

Ni igikorwa giteganyijwe kuwa 26/11/2023 kikabera muri Great Hotel Kiyovu. Mu rwego rwo gutegura neza uwo munsi ndetse no guhuza umutima n’imbaraga, Abaririmbyi muri iyi korali bashyiriweho urubuga rubahuza hagamijwe gukomeza guhuza ibitekerezo.

Umuyobozi wa kori yagize ati"Dufite ubusabane aho tuzaba turi kumwe n’abantu bose baririmbye muri Korali Horeb".

Yasoje ikiganiro yagiranye na Paradise avuga ko mu minsi iri imbere bafite indirimbo nyinshi zigiye gukorerwa amashusho hakaba hateganywa igiterane kinini kizafatirwamo amajwi n’amashusho (Live Recording).

RYOHERWA N’INDIRIMBO "TUZAHURIRAYO" YA HOREB CHOIR