Itorero rya ADEPR Kamuhoza Paroisse ya Kamonyi, ryateguye igiterane cy’ivugabutumwa ndetse no kwitangira inyubako, kizitabirwa n’amakorali arimo Jehovah Jireh na Bonheur.
Iki giterane giteganyijwe kuwa 10/09/2023 kikazabera ku rusengero rwa ADEPR Kamuhoza. Ni igiterane cyatumiwemo Korali Bonheur ibarizwa ku itorero rya Runda Paroisse Kamonyi.
Korali Bonheur yanditse amateka akomeye. Abenshi bibukira iyi Korali ku ndirimbo yakundaga gusabwa kuri Radio Rwanda yitwaga "Yesu ni inshuti Yanjye". Ni Korali izwiho kugira abaririmbyi b’abahanga mu kuririmba mu buryo bwa live ndetse ikagira ibyuma bya muzika byinshi n’abacuranzi b’abahanga.
Korali Bonheur izifatanya na Korali zibarizwa ku itorero rya Kamuhoza arizo Korali Jehovah Jireh ikaba korali nkuru, Korali Yakini na Korali y’abanyeshuli yitwa "The Voice of Angels" ikaba ari korali igizwe ahanini n’urubyiruko rwiga mu mashuri yisumbuye, za Kaminuza ndetse n’aba Posts.
The Voice of Angels ni korali ikunzwe bikomeye mu karere ka kamonyi ahanini bitewe n’imiririmbire irimo imbaraga ndetse n’amajwi ayunguruye doreko igizwe ahanini n’urubyiruko.
Amakuru dukesha urubuga ruhuriraho aba Postes ba Kamuhoza avuga ko iki giterane kigamije ivugabutumwa hakaba hitezwe ko abatuye mu nkengero za Kamuhoza bazakitabira ku bwinshi ndetse hakaboneka iminyago.
Ni igiterane kandi cyo gushyigikira umurimo w’Imana no gukomeza kuzamura inyubako y’uru rusengero. Nyuma yo kwakira abimukira benshi baturutse hirya no hino bakaza gutura mu murenge wa Runda ndetse no kwakira umubare munini w’abakizwa, Urusengero rwa ADEPR Kamuhoza rwaje kuba ruto.
Ubuyobozi bw’iri torero riyoborwa na Rev Pastor Mwungeri Marcel waje asimbura Rev Pastor Faustin, bwakomeje umushinga wo kubaka urusengero rujyanye n’icyerekezo ruzabasha kwakira umubare munini w’abakizwa. Abakristo ba Kamuhoza bakoze ibishoboka byose bakusanya amafaranga yazamuye urusengero.
Kuri ubu amakuru Paradise.rw ifite avuga ko hagezweho gushaka amafaranga yo gusakara ndetse no gukinga.
Nk’uko intego y’iki giterane ibivuga (Nehemiah 2:18) "Nimuhaguruke twubake", Ubuyobozi bw’iri torero bukaba bukomeje kushishikariza abakristo ndetse n’abandi biyumvamo umuhamagaro wo kubaka inzu y’uwiteka kuzitabira no gushyigikira iki giterane kugirango abakizwa bakomeje kwiyongera babone aho kwicara.
Amakuru tugitohoza aravuga ko Korali Bonheur nayo yaba ikomeje imyiteguro yo gutegura igiterane. Tuzakomeza kuyakurikirana.
Kuri ADEPR Kamuhoza hagiye kubera igiterane gikomeye
