Uyu muhango w’itangwa ry’impamyabumenyi wabaye ku nshuro ya mbere kuri kampisi y’i Masaka, waranzwe n’ubusabane n’ibitekerezo byubaka bireba ejo hazaza h’aba banyeshuri.

Mu banyeshuri bahawe impamyabumenyi, harimo abagabo 147 n’abagore 117. Muri bo, 11 basoje amasomo mu ishami ryihariye ry’Ubuforomo n’Ububyaza, rikaba rifatwa nk’iry’ingenzi cyane mu rwego rwo guteza imbere ubuvuzi bufite ireme mu Rwanda.

Indangagaciro zubakiye ku bukristo ni ishingiro ry’icyizere

Mu butumwa butandukanye bwatanzwe n’abayobozi, ababyeyi n’inshuti za kaminuza, icyagarutsweho cyane ni indangagaciro za Gikristo aba banyeshuri basabwa kujyana mu mirimo bazakora. Dr. Papias Malimba Musafiri, Umuyobozi wa EACC, yavuze ko iyi kaminuza yiteguye gukomeza gutanga umusanzu ukomeye mu burezi bufite ireme.

Yagize ati: “Ni iby’agaciro kubona uyu munsi dukura ku ntebe y’ishuri abanyeshuri bize amasomo yihariye kandi akenewe ku isoko ry’umurimo. Twizeye ko bazatanga umusanzu wabo mu iterambere ry’igihugu, ariko bakanaba n’abamamyi b’indangagaciro z’Imana aho bazakorera hose.”

Gukoresha ubumenyi butanzwe mu guhindura sosiyete

Umwe mu banyeshuri barangije, agaragaza ibyishimo n’umurava wo gutangira ubuzima bushya bwo gukorera igihugu. Yagize ati: “Ndishimye cyane kuko narangije. Icyo nifuza ni ugukoresha neza ibyo nize, kugira ngo binyure mu bikorwa bifatika mu buzima bwa buri munsi.”

Archbishop Dr. Laurent Mbanda, Umuyobozi w’Itorero Anglican mu Rwanda, yasabye abarangije kugira uruhare rutaziguye mu iterambere ry’imiryango bakomokamo n’igihugu muri rusange. “Abarangije amasomo tubitezeho kuzana impinduka nziza aho batuye. Bafite amahirwe yo kuba ibikoresho by’iterambere n’indorerwamo ya Gikristo mu byo bazakora byose.”

HEC irasaba aba banyeshuri kuba indorerwamo y’ubunyamwuga

Dr. Ndikubwimana Theoneste, Umuyobozi ushinzwe gahunda muri HEC, yagaragaje ko aba banyeshuri bafite inshingano zo kuzamura ireme ry’umurimo mu Rwanda. Yagize ati: “Turasaba abarangije gukomeza gushyira imbere ubunyamwuga, kuzuza inshingano zabo neza, no kuba isoko y’udushya, haba mu gihugu ndetse no ku rwego rwa Afurika.”

Uyu muhango wabereye kuri kampisi ya Masaka witabiriwe n’abantu batandukanye barimo ababyeyi, abayobozi mu nzego zitandukanye, abarezi n’inshuti za kaminuza. Wari n’umwanya wo gusangira intambwe yatewe, ndetse no gutanga icyizere cy’ejo hazaza heza habakiye ku bumenyi n’indangagaciro.

Mu bitabiriye harimo na Drayton Nabers, Jr., umunyamategeko wamenyekanye ku rwego mpuzamahanga, uzwi cyane nk’uwigeze kurahiza Barack Obama ubwo yari agiye kuba Perezida wa Leta Zunze Ubumwe za Amerika.

Indangagaciro zubakiye ku bukristo ni ishingiro ry’icyizere muri East African Christian College