"Ubundi cyera inzu zikomeye zabaga zirimo imiziki y’isi Church zitinya no gukoreramo, ariko Imana ishimwe ko yamaze gusobanurira abakozi bayo ibanga ryo gufata umujyi! Atari mu nsengero gusa ahubwo no mu nyubako zikomeye" - Aya ni amagambo yavuzwe n’umwe mu bavugabutumwa b’i Kigali.
Ijoro rya tariki 31 Ukuboza 2022 rishyira tariki 01 Mutarama 2023 ni umunsi w’amateka muri Kigali. Ni ijoro ryateguweho ibitaramo bikomeye cyane yaba muri Kigali no hanze yayo.
Zion Temple izaba iri muri BK Arena izwi nk’inyubako y’imyidagaduro ya mbere mu Rwanda no mu Karere naho Women Foundation Ministries izaba iri muri Kigali Conventional Centre izwi nk’inyubako ihenze kurusha izindi mu gusohokerwamo muri Kigali. Aha hose kwinjira bizaba ari ubuntu.
Igitaramo cy’amacyesha [Cross Over] cyateguwe na Zion Temple iyoborwa na Apotre Dr. Paul Gitwaza, kizabera muri BK Arena iherutse kuberamo igitaramo cya Israel Mbonyi wanditse amateka yo kuzuza iyi nyubako akaba umuhanzi wa mbere ubikoze. Kizaririmbamo Aime Uwimana, Prosper Nkomezi na Asaph.
Zion Temple nayo yamaze kwandika amateka yo kuba Itorero rya mbere rikoreye igitaramo muri iyi nyubako ndetse bikaba byitezwe ko kizitabirwa n’abarenga ibihumbi icumi kuko kugeza uyu munsi imyanya yose yo kwicaramo yamaze kuzura. Kwandika abazitabira byahagaritswe nk’uko amakuru agera kuri Paradise.rw abihamya.
Women Foundation Ministries iyoborwa na Apostle Mignonne Kabera, yamaze gutangaza ko izasoreza umwaka muri Kigali Convention Centre, inyubako izwi nk’iy’abasirimu bo ku rwego rwo hejuru. Ni igitaramo kizatangira saa tatu z’umugoroba kugeza mu rucyerera rwa tariki 01 Mutarama 2023. Imiryango izaba ikinguye kuva saa moya z’umugoroba.
Niba ukunda umuntu, ukaba umwubaha cyane unabifitiye ubushobozi, uzamubwire uti "Nzagusohokana Convention Centre". Niyo mpano mu buzima azishimira cyane kubera ubwiza n’agaciro gakomeye iyi nzu ifite muri Kigali. Byumve neza muri ubu buryo, Women Foundation Ministries ihaye Bonane ihumura cyane abakristo n’abandi bose bazitabira iki gitaramo gisoza umwaka kininjiza abantu mu 2023.
Apotre Gitwaza Umuyobozi wa Zion Temple
Apotre Mignonne Umuyobozi wa Women Foundation Ministries
Women Foundation irasoreza umwaka muri Convention Centre
Zion Temple izasoreza umwaka muri BK Arena
Imyanya yamaze gushira, bivuze ko abarenga 10,000 bamaze kwiyandikisha
