Ku isi hose, abantu bapfa bazize imyuzure, kugwa mu migezi, cyangwa kurohama mu mazi menshi y’imvura. Hari ibimenyetso bifite ibisobanuro bifatika bya siyansi bigaragaza uko amazi yica umuntu nabi, nyuma tubihuze n’umwuzure wa Nowa.

Uko umuntu yicwa n’amazi – Ibisobanuro bya siyansi
Kurohama (Drowning)
Kurohama ni imwe mu mpamvu nyamukuru y’urupfu ruterwa n’amazi. Ibi biba iyo amazi arengeye umuntu, cyangwa akagwa mu mugezi adashoboye koga, umubiri we wose, by’umwihariko umutwe, ukibira.

Icyo gihe, amazi yinjira mu bihaha by’umuntu, agasimbura umwuka (oxygen) yagombaga guhumeka, bigatuma umuntu abura umwuka agapfa. Mu byiciro byabyo:
• Inhale reflex: Iyo umuntu arohamye, aguye mu mazi, agira reflex yo guhita ahumeka (yifuza gukurura umwuka), agahumeka amazi aho guhumeka umwuka.
• Hypoxia: Umwuka uba muke mu maraso; ni bwo ubwonko n’umutima bitangira gupfa gahoro gahoro.
• Cardiac arrest: Umutima uhagarara burundu kubera kubura umwuka.

Hypothermia (Gucika intege kubera ubukonje bwinshi)

Iyo umuntu aguye mu mazi akonje cyane (nk’ay’imvura cyangwa umugezi utemba), ubushyuhe bw’umubiri buragabanuka bikabije (hypothermia). Umubiri iyo ugeze munsi ya 35°C, imikorere yawo ihungabana cyane:
• Umutima utangira gutera nabi.
• Ubwonko butakaza ubushobozi bwo gutekereza no kwirwanaho.
• Iyo adatabawe vuba, bishobora gutuma apfa.

Trauma- Imvune zikabije

Mu gihe cy’imyuzure cyangwa umuntu aguye mu mazi menshi cyane, ashobora kwikubita ku biti, ku mabuye, cyangwa ku bindi bintu biba biri mu mazi. Ibi bigira uruhare mu rupfu rwe bitewe n’imvune zaturutse ku mutwe cyangwa umubiri wose (trauma). Ajya gupfa yihebye, yataye ubwenge kubera kugenda yisekura ku bintu biri mu mazi.

Imyuzure n’ingaruka zayo

Imyuzure ituruka ku mvura nyinshi, ibura ry’imiyoboro y’amazi ikora neza, cyangwa gusenyuka kw’ibice bifata amazi (nk’ibiyaga n’imigezi). Amazi y’imyuzure akwirakwira ku muvuduko mwinshi ashobora:
• Gusenya inzu, gutwara abantu n’ibintu.
• Gutuma abantu babura aho bahungira, bamwe bakagwamo.

Imyuzure ikunze guteza urupfu binyuze mu buryo bukurikira:
• Guhura n’umuraba w’amazi mwinshi utunguranye.
• Gukubitwa n’ibintu byatwawe n’amazi (nk’ibiti, amabuye).
• Gutwarwa n’umuvu w’amazi udasanzwe (flash flood). Aho n’imodoka ntizihagarara zemye.

Ingero zifatika
• Mu Rwanda: Abantu benshi barapfa mu gihe cy’imvura cyane cyane abaturiye ibice bikikijwe n’imigezi n’imisozi. Mu mujyi wa Kigali, imyuzure yateje ibura ry’ubuzima bw’abantu mu bihe bitandukanye.
• Ku isi: WHO ivuga ko abantu barenga 236,000 bapfa buri mwaka bazize kurohama, benshi muri bo bakaba ari abo mu bihugu bikiri mu nzira y’amajyambere.

Urupfu ruterwa n’amazi si igitangaza, ni ikintu gifite ibisobanuro bifatika bya siyansi. Ibi byerekana ko hakenewe ubukangurambaga, ubwirinzi, imyubakire myiza, n’ubumenyi ku bijyanye n’umutekano w’amazi.

Kwigisha abantu uko bakwirinda no kumenya kwitabara, byafasha gukumira ibi byago. Igitangaje, ni uko hari igihe cyabayeho abantu ntibabe bafite ubushobozi bwo gukoresha ubwo bwirinzi. Ubukangurambaga bwo bumvaga ari bushya, ntibabuha umwanya.

Ihuriro riri hagati y’urupfu rw’abantu bazize amazi mu gihe cya Nowa n’isesengura rya siyansi
Inkuru ya Nowa dusanga muri Bibiliya (Itangiriro 6–9) ivuga ku mfu nyinshi zagwiriye isi yose maze amazi agatwikira ibihugu byose, bigatuma abantu bose batari mu nkuge ya Nowa bapfa. Nubwo iyi nkuru ifite igisobanuro cy’imyizerere, hari ibintu bihura neza n’isesengura rya siyansi:

Kwibira mu mazi menshi

Nk’uko byasobanuwe haruguru, iyo umuntu ahuye n’amazi menshi aruta ubushobozi bwe bwo koga, amubuza guhumeka, akarohama. Ibyanditswe kivuga ko amazi yazamutse hejuru y’imisozi miremire (Itangiriro 7:19–20). Ibi byerekana ko abantu batari bafite ubwirinzi cyangwa uburyo bwo kurokoka amazi yaje atunguranye, nk’uko biba no mu myuzure y’ubu.

Imyuzure nk’icyorezo cy’isi yose
Mu gihe cya Nowa, amazi yari imyuzure y’isi yose. Mu buryo bwa siyansi, ibi byagereranywa n’ingaruka za flash floods cyangwa tsunamis ku rwego runini – ibintu bishobora gukuraho ubuzima n’ibintu byose bidafite uburyo bwo kwirwanaho.

Kudasobanukirwa n’icyago kije

Abantu bo mu gihe cya Nowa ntibigeze bemera ko umwuzure uzaza (2 Petero 2:5), kimwe n’uko abatuye mu duce dukunze guhura n’imyuzure uyu munsi bagira ubushake buke bwo kwimuka cyangwa gufata ingamba zo kwirinda. Ubusobanuro bwa siyansi bw’uyu munsi butwereka ko kudategura neza cyangwa kutubaka ahatekanye bishyira ubuzima mu kaga.

Amazi nk’igihano, ibiza n’igihamya cy’uburangare

Mu myizerere ya gikirisitu, amazi y’imyuzure yo ku gihe cya Nowa yari igihano cy’Imana kubera ububi bw’abantu. Mu gihe cya none, imyuzure myinshi itungura abantu batabigizemo uruhare cyangwa ikaba ingaruka z’uburangare bw’abantu ku bidukikije, harimo:
• Gutema amashyamba (bikabangamira ubutaka bwo gufata amazi),
• Kudategura imiyoboro y’amazi,
• Gukomeza kwangiza ibidukikije, bigatera imihindagurikire y’ibihe (climate change).

Bityo, amazi si igihano cyo mu buryo bw’umwuka gusa nko mu bihe bya Nowa, ahubwo ni igihamya cy’uko kudaha agaciro ibidukikije n’ubuzima bishobora gutera akaga gakomeye muri iki gihe.

Kuba imyuzure yica abantu si ibya none. Bivugwa kuva kera mu nkuru y’igihe cya Nowa kugeza no muri iki gihe cyacu.

Siyansi itwereka uburyo amazi yica nabi cyane, Bibiliya ikatwereka impamvu abantu bomu gihe cya Nowa bapfuye. Bapfuye urupfu rubi, kuko nta hantu ho guhungira bari bafite.

Reka imbabazi z’Imana zigire umumaro. Kwihana no gukora ibyiza byatuma umuntu ava mu mubare w’abazapfa nabi mu gihe kiri imbere. Iyo Imana ifashe umwanzuro wo kwica abatumvira, yica nabi.

Urugero rw’imyuzure y’amazi muri iki gihe