Mu mateka yose y’abantu, umuziki wahoze ari ururimi rutangaje rugera ku mutima, aho amagambo asanzwe ananirwa kugera. Habaho indirimbo zisanzwe, hakabaho izivuga ku Mana, kandi zose zirakundwa. Ariko se, Isi yaba isa ite abahanzi bose bafashe umwanzuro wo kuramya Imana mu ndirimbo?
Uhereye mu nsengero zo mu bihe bya kera no mu muco w’ibihugu bitandukanye, abantu bagiye bafata umuziki nk’ikintu kimwe cyahuriza imitima ya bose hamwe.
Ariko se, isi yose iramutse ifite abahanzi bahuje intego imwe yo kuramya Imana mu ndirimbo, ubuzima bw’abantu bwaba bumeze bute? Ese imiterere y’isi, imyifatire, n’imibereho byahinduka bite? Iki gitekerezo kiradufasha kureba uburyo umuziki ufite imbaraga zo kubaka cyangwa guhindura imitima y’abantu, ndetse no gutuma isi igira icyerekezo kimwe.
Iyo umuhanzi ashyize umutima we mu kuramya no guhimbaza Imana, indirimbo ahanga ziba zifite intego yo kubyutsa icyizere, gukomeza imitima y’abantu, no guhamagarira abantu kwiyegurira Uwiteka. Imbaraga nk’izi ziramutse zishyizwe ku rwego mpuzamahanga, buri muhanzi akabisabwa, isi yaba ifite umugambi umwe, ikamera nk’ishuri rinini ryigisha kubana mu mahoro.
Indirimbo z’ubu ziba zirimo amagambo ashukana, imvugo yo kwiyemera, cyangwa zamamaza ibikorwa Imana yanga nk’umusambanyi. Ibi bikaba byongerera isi kuba mu mwijima w’imyitwarire itarangwa n’indangagaciro nziza.
Ariko mu gihe abahanzi bose baba bahisemo kuramya Imana, ubutumwa bw’indirimbo zaba ziri mu isi bwaba bushingiye ku rukundo, ku kubabarirana, ku gutabarana no kutibagirwa inshingano zo kubaha Umuremyi.
Ubuzima bw’urubyiruko bwahinduka cyane. Aho gusohoka bakajya kuririmbana indirimbo zivuga ku guhemukirana zo mu njyana za Rap, injyana z’abantu baba bafite ishaza, zishimagiza kunywa ibiyobyabwenge, ubusambanyi cyangwa urugomo, babasha gufashwa n’abahanzi babo kwiyubaka no gushakisha inzira y’umunezero w’ukuri.
Nta gushidikanya ko indirimbo zirimo ubutumwa buvuga ku Mana zishobora kurandura umujinya, intonganya n’amacakubiri, bityo no mu bihugu bitandukanye hagatera imbere umuco wo kwishyira hamwe mu kuyoboka Imana no guharanira kugira umutima w’amahoro.
Ikindi kandi, umuziki wo kuramya Imana warwanya ubushukanyi bw’ubutunzi n’ibyubahiro byo kuririmba gusa kugira ngo abantu bakome amashyi. Iyo abahanzi babaye abaririmbyi b’Umuremyi aho kuba abashakisha igikundiro, ubuhanzi bwabo bubera abandi imbuto y’agakiza.
Kuramya mu ndirimbo biha umuziki umurongo umwe: gusubiza Imana icyubahiro cyayo. Isi yakomeza kwiteza imbere mu ikoranabuhanga, mu bukungu cyangwa mu buhanga, ariko umutima wayo ukaba ufite icyerekezo gifatika cyo kumvira no kubaha Imana.
Iby’isi bitwereka ko umuziki ari igihugu kigari kitagira imipaka. Kiramutse cyuzuyemo ubutumwa bwo kuramya no guhimbaza Imana, cyatuma habaho abantu biyoroshya mu mitima.
Isi irimo iramutse irimo abahanzi bose batambutsa ubutumwa bwo gutumbira ijuru, ntishobora kuba aho ibibi byimikirwa. Ahubwo yaba isi y’abafite urukundo rudahemuka, amahoro adashira, n’icyizere kidacogora.
N’ubwo bitashoboka ko isi yose ihindukira icyarimwe, umuhanzi umwe ufashe umukoro wo kuramya Imana ashobora gutangiza impinduka zikagera kure kurusha uko yatekerezaga. Bityo, ubutumwa bw’indirimbo bugahinduka imbarutso yo kuganisha isi mu rumuri rwayo nyakuri.
