Ibi biba biteye inkeke kuko bigira ingaruka mbi ku Bakristo ndetse no ku isura y’ubutumwa bwiza. Dore ibintu bitanu nyamukuru bituma abapasiteri bo mu madini atandukanye barwana intambara zitagaragara, bamwe bakanga abandi urunuka:

1. Guhangana ku bubasha no gushaka abayoboke benshi

Abapasiteri bamwe babona abandi nk’abahanganye na bo mu bikorwa byo gushaka abayoboke. Iyo umwe atangiye kubona mugenzi we nk’umuntu ukurura abantu benshi, akagira insengero zuzuye Abakristo, bitera ishyari no kurakarira undi. Buri wese aba yumva ko agomba kuba ari we uri imbere, bityo bigakurura guhangana kurusha gukorera hamwe.

2. Gutandukana mu myizerere n’inyigisho z’amadini

Buri dini rifite inyigisho zaryo, rimwe na rimwe zishobora kutajyana n’iz’irindi. Iyo pasiteri umwe yumvise mugenzi we yigisha ibintu atemera cyangwa abona ko bidahuye n’ukuri, bituma amuca intege, akamunenga mu ruhame, ndetse rimwe na rimwe akamufata nk’umukozi w’umwanzi (Satani). Aho gukemura ibyo batumvikanaho mu rukundo, bahitamo gutukana no gutandukana.

3. Ishyari ku iterambere ry’umwe muri bo

Iyo pasiteri umwe atangiye kubona undi agira iterambere, nko kubona imodoka nshya, kubaka urusengero runini, kubona abafatanyabikorwa mpuzamahanga, bikurura ishyari. Uwo utaratera imbere yumva ahangayikishijwe n’ubwamamare bw’undi, bikavamo amagambo y’inzangano n’itotezwa ritagaragara.

4. Gutegura ibiterane cyangwa ibikorwa mu gihe kimwe no mu gace kamwe

Hari igihe pasiteri umwe ategura igiterane mu gace runaka, undi na we agategura ikindi mu gihe kimwe, bose bifuza ko abantu baza mu cyabo. Ibi bitera guhangana, bamwe bagatangira kuvuga nabi bagenzi babo kugira ngo babace intege. Umwuka w’amakimbirane uhita winjira mu nshingano bari bahawe n’Imana.

5. Ubutumwa bukocora cyangwa busebanya mu nyigisho

Hari abapasiteri bigisha bagamije kwibasira bagenzi babo, babahindura insanganyamatsiko y’ubutumwa, nko kuvuga ngo “hari bamwe bigize abakozi b’Imana nyamara barimo gukorera inyungu zabo,” cyangwa “abakora ibitangaza bya baringa.” Nubwo batavuga amazina, iyo ubutumwa bujya gusa n’ubw’undi pasiteri, bituma abandi bumva baciriweho urubanza, bikabyara inzangano.

Icyitonderwa:

Ibi si ngombwa ko biba mu madini yose cyangwa mu bapasteri bose. Hari benshi bubahana, bakorana mu mahoro, kandi bafashanya. Gusa aho ibi bibazo biboneka, bigira ingaruka zikomeye ku Itorero ry’Imana n’umuryango mugari.

Umurimo w’Imana ugomba gukorwa mu rukundo, ubumwe no kwicisha bugufi. Iyo abakozi b’Imana batangiye guhangana nk’abashoramari, ubutumwa bwiza burangirika, imitima y’Abakristo igakomereka, kandi abayoboke bashya bagacika intege. Gusenyera umugozi umwe no gushakira hamwe ukuri ni byo bizubaka Itorero ry’ukuri.

Ndagira ngo mbagezeho ifoto yerekana abapasiteri baturutse mu matorero atandukanye bitabiriye amahugurwa yateguwe na PEACE PLAN Rwanda mu mwaka wa 2017. Aya mahugurwa yibanze ku gukemura amakimbirane ari hagati y’abapasiteri bize n’abatarize, ibibazo by’ubuhanuzi bw’ibinyoma ndetse n’abarwanira imitungo y’amatorero. Iyi foto yafashwe ubwo basozaga amahugurwa yabereye ku Gisozi muri Dove Hotel. Yifashishijwe gusa.