Iyi filime Iminsi y’Igisambo inyura ku muyoboro wa YouTube wa Manely Entertainment, iri rikaba ari itsinda rigari rikina amafilime atandukanye arangajwe imbere n’iyi y’uruhererekane igiye kujya ikinwamo n’umukunnyi w’icyamamare ‘Uwamahoro Antoinette’ uzwi cyane ku izina ry’ Intare y’Ingore. Hamaze gusohoka imikino myinshi (episodes) igera kuri 21 yo mu gice cya mbere (season), uwa 21 ukaba ari wo Denys Creator yahereyeho yandika.

Mu miterere, uyu mwanditsi Denys Creator (yitwa Creator kuko to create bivuga kurema, guhanga cyangwa guhimba ikitari kiriho, bigendanye n’ibyo akora byo kwandika no gutoza filime n’ibindi bigendanye na byo bizwi nka Content Creator) ameze nka ba bagabo bavugwa muri Bibiliya bakoreraga Imana bafite n’ibindi bakora ku ruhande byatumaga babaho, urugero nka Pawulo wabohaga amahema, Amosi wari umushumba, Petero wari umurobyi, Yesu (hamwe na Yozefu wamureze) wakoraga ububaji, n’abandi.

Ikiganiro yagiranye na Paradise kirashishikaje cyane. Gikubiyemo ibigendanye n’akazi akora ko kwandika filime, by’umwihariko kuri iyi yitwa Iminsi y’Igisambo iragaragaza abantu bamwe biyitirira abakozi b’Imana kandi batari bo, ahubwo bashaka indoke, kikaba kinakubiyemo uko ahagaze mu kwizera nk’Umukristo.

Ikiganiro Paradise yagiranye n’umwanditsi wa filime w’inzobere Iranzi Denys uzwi nka Denys Creator:

Paradise: Uri nde, amazina n’icyo ushinzwe muri filime.
Denys Creator: Amazina yange ni Iranzi Denys nkaba nzwi nka Director Denys Creator. Ndi Umwanditsi wa filime nkaba n’umuyobozi wazo.
Paradise: Filime wandika yitwa ngo iki, iri mu buhe bwoko, ni uruhererekane cyangwa irarangira? Ni zo zonyine wandika?
Denys Creator: Filime nandika yitwa Iminsi y’Igisambo ikaba mu bwoko bwa filime z’uruherekane. Si ibyo gusa kandi kuko hari n’izindi zirangira nandika ziba zifite igitekerezo kimwe.
Paradise: Mu bwanditsi bwawe wibanda kuki?
Denys Creator: Mu bwanditsi bwange nibanda kuri rubanda muri rusange.
Paradise: Filime yitwa Iminsi y’Igisambo ni wowe uyandika. Ni wowe wayitangije? Igitekerezo cyakujemo gite?
Denys Creator: Filime yitwa Iminsi y’Igisambo ubu ni nge uri kuyandika, gusa si nge wayitangije. Yatangijwe na mugenzi wange, gusa nge nari umwunganizi we (Script Director) bitewe n’uko nta mwanya uhagije nari mfite, nyuma yaho mboneye umwanya nandika guhera kuri Ep 21. Iyo ni nge wayanditse ngenyine. Na ho ikijyanye n’imvano y’igitekerezo cyayo, yavuye ku myitwarire igaragara ku bagabo bafite amafaranga ariko ntibanyurwe n’abo bashakanye.

Paradise: Ni iki wavuga ku buryo cyashishikaza umuntu utarareba iyo filime akayireba?
Denys Creator: Ikintu navuga cyashishikariza abantu kuyireba, ni igitekerezo kiyigize cy’uburyo abantu batanyurwa bishobora kurangira babuze byose bakisanga hasi barahoze hejuru. Na ho ku bakunda guca inyuma abo bashakanye, birangira bisenye umuryango.
Paradise: Watangiye ubwanditsi ryari? Utandukaniye he n’abandi banditsi?

Denys Creator: Natangiye ubwanditsi mu wa 2017 niga mu Cyiciro Rusange cy’Amashuri Yisumbuye. Icyo gihe nandikaga ikinamico n’urwenya (comedy). Nge iyo nandika nibanda ku bibazo bikunze kugaragara mu muryango.

Paradise: Ni iki Iminsi y’Igisambo ije gukosora muri rubanda?
Denys Creator: Filime Iminsi y’Igisambo ije kwerekana cyane ingaruka zo gucana inyuma ku bashakanye. Ikindi iragaragaza abantu bamwe biyitirira abakozi b’Imana kandi batari bo, ahubwo bashaka indoke.
Paradise: Uri Umukristo, cyangwa ukaba ufite ahandi usengera? Niba hahari ni he?
Denys Creator: Ndi Umukiritso, nemera Imana n’Umwana wayo Yesu Kristo, nkaba nsengera mu idini rya ADEPER, Ururembo rwa Gihundwe, Paruwasi ya Cyirabyo, ho mu Karere ka Rusizi.
Paradise: Kuba Umukristo byaba bigufasha kwandika filime zirimo amasomo yakwigisha rubanda?
Denys Creator: Yego. Kuba Umukiritso bimfasha kwandika filime zirimo amasomo yakwigisha rubanda, urugero: hari ukuntu umuntu ashobora kuba afite inshingano runaka ashinzwe mu itorero, ugasanga ubwo bubasha ahabwa abukoresha mu nyungu ze bwite, aho kuba itara rimurikira abandi. Icyo gihe nshobora gukora Filime ngambiriye gukosora uwo muntu.
Paradise: Ni iki ushimira Imana kuva watangira kwandika Iminsi y’Igisambo, ugendeye ku buryo yakiriwe?
Denys Creator: Ikintu cya mbere nshimira Imana ni uko yanshoboje gutanga ibindimo bikagira abandi bifasha. Ikindi ni uko yatumye urwego rwange ruzamuka ngahura n’abandi basitari muri filime nyarwanda.
Paradise: Ni iyihe mishanga muri guteganya imbere?
Denys Creator: Turi guteganya gukora indi Filime y’uruhererekane ishingiye kumibereho yabamwe mubaturage batuye mukarere ka Rusizi by’umwihariko.
Paradise: Kuki mwahisemo kuzanamo Intare y’Ingore? Ni iki aje kongera muri iyi filime kitari gihari?
Denys Creator: Impamvu twahisemo kuzanamo Uwamahoro Antoinette uzwi nk’Intare y’Ingore ni uko imikinire ye yahuraga n’umukinnyi twifuza, ikindi kandi arashoboye yanagufasha n’ibindi mu gihe cyo gufata amashusho. Muri make nta gishya azanye kitari gihari, ahubwo aje gutuma ibihari birushaho kuba byiza kuko ni umukinnyi umaze igihe muri filime, akaba afite ubunararibonye.

Paradise: Ni izihe nzitizi muri guhangana na zo?
Denys Creator: Inzitizi ya mbere ni uko abareba ibihangano byacu bakiri bake. Ikindi abashoramari nabo nibake muri Filime.
Paradise: Nk’umwanditsi, cinema nyarwanda y’uyu munsi ubona igeze he ugereranyije n’iminsi yashize.
Denys Creator: Urebye uyu munsi cinema nyarwanda imaze gutera imbere kuko abantu bamaze gusobanukirwa ko ari umwuga wagutunga nk’iyindi ugereranyije n’iminsi yashize.
Paradise: Gira icyo uvuga kuri Team ya Manely Entertainment, unagire icyo ubwira ababakurikira bazasoma iyi nkuru.

Denys Creator: Ikintu nabwira Team ya Manely Entertainment ni uko mbakunda cyane, ikindi kandi ndabashima nkababashimira byimazeyo ku bw’ubufatanye bubaranga; bazabuhorane. Nanone sinabura gushimira abakunzi bacu badukurikirana umunsi ku wundi ndeste nanabararikira kuzakurikirana ibihangano byiza turi kubategurira.

Kwandika no gukina filime ni umurimo utunze abantu benshi mu Rwanda, kandi abo bose baba biganjemo Abakristo bo mu matorero atandukanye. Abakina muri filime Iminsi y’Igisambo, hafi ya bose bifatanya n’Itorero rya ADEPR mu kuramya Imana.

Ibihangano byabo si byiza gusa ku bwo kuba bibereye ijisho kandi bifite amashusho meza, ahubwo binahindura ubuzima bw’ababireba, bikigisha abantu kubana n’abandi, haba ku bbakiri bato, ku rubyiruko, ku bakuru no ku miryango.
RYOHERWA N’UMUKINO WA 21 W’IMINSI Y’IGISAMBO DENYS CREATOR YANDITSE AKANATOZA ABAKINNYI

Iranzi Denys (Denys Creator), umwanditsi wa filime akaba n’umutoza wayo

Ibumoso (Manely), hagati (Intare y’Ingore), iburyo (Director Denys Creator)