Amakuru aravuga ko Genzi ari bubatirizwe mu Itorero Noble Family Church riyobowe na Apôtre Mignonne Kabera, umugore waciye uduhigo twinshi two kwakira abayobozi bakomeye barimo na Madamu Jeannette Kagame.

Iki cyamamare mu gukina filime no kuzandika, Ngenzi, amazina ye nyakuri ni Gaga Daniel, akaba aherutse gutangira ubuhamya muri uru rusengero rwa Noble Family Church bw’inzira ye yanyuzemo yo kwakira agakiza ari kumwe na mushiki we.

Muri iyo nzira yo kwakira agakiza nk’uko yabitanzemo ubuhamya, hari ibintu byinshi yaretse gukomeza gukora birimo kunywa inzoga n’itabi, nubwo agifite inshuti zitafashe umwanzuro nk’uwe ngo zibireke.

Gusa nk’uko yabitangaje, gukizwa ntibizamutandukanya n’inshuti ze, ngo bimubuze kwishimana na zo, ngo ni uko zitarakira agakiza nka we. Ahubwo icyo azakora ni ukugira umurongo agenderaho w’ibyo atarenga mu gihe ari kumwe na zo.

Muri ubwo buhamya, yavuze ko inyungu iri mu gukizwa atari iyo kujya mu Ijuru gusa. Nyuma yo gucika ku nzoga n’itabi, yabonye ko gukizwa bigirira akamaro uwabikoze.

Izo ni inyungu ziyongera ku Ijuru kuko kureka ibibi uba wirokoye ubwawe, ukirinda ibyago byinshi byari kukugwirira. Yavuze ko ari ikintu uba wikoreye nubwo byitwa gukorera Imana.

Mu byo yahagaritse kandi harimo umushinga wa filime yari yise "Amanda" kuko atari ari mu nzira nziza. Ubu yumva atekanye kandi ni bwo agiye gukora imishinga myinshi ya filime ari mu nzira nzima.

Umwaka wa 2023 ugiye kurangira ari umwe mu Bakristo bagize Itorero rya Noble Family Church, riyobowe na Apotre Mignonne, umugore uzwiho guhora amwenyura, urangwa n’ibikorwa by’urukundo no gusetsa abantu bababaye mu buzima kandi akabakorera ibyiza!

Gaga yiyongereye ku byamamare byinshi bya hano mu Rwanda bibarizwa muri Noble Family Church, nka Miss Rwanda 2020 Nishimwe Naomie, Miss Queen Kalimpinya, Ntarindwa Diogene wamamaye nka Atome/Gasumuni, Antoinette Niyongira n’abandi.

Gaga ni umukristo muri Noble Family Church