Mu gusobanura iyi nyigisho, Pastor Gisanura yifashishije ijambo ry’Imana riri mu Itangiriro 3:4-6, rigaragaza uko inzoka yashutse umugore muri Edeni. Muri uwo murongo, inzoka yabwiye umugore ko batazapfa nibarya ku mbuto z’igiti Imana yari yarabujije, ahubwo ko amaso yabo azahweza bakamenya icyiza n’ikibi bagahinduka nk’Imana.

Ariko Pastor Gisanura yasobanuye ko iyo umuntu asesenguye neza uwo murongo, abona ko ikibazo kitari ugushukwa gusa, ahubwo hari irari ryari mu mutima w’umugore. Yagaragaje ko umugore yari azi neza amabwiriza Imana yari yaratanze kuko yasubije inzoka ko bemerewe kurya ku mbuto zose zo mu ngobyi ya Edeni uretse ku giti kimwe. Ibi byerekana ko yari afite amakuru y’ibyemewe n’ibibujijwe.

Icyakora, nubwo yari azi ukuri, irari ryo kurya kuri icyo giti ryatumye atumvira. Ikindi kandi, Satani yaje kumutera gushidikanya ku wo ari we. Yamubwiye ko aramutse ariye kuri icyo giti cy’ubwenge yahinduka nk’Imana. Ibi byagaragazaga ko umugore atanyuzwe n’umwanya Imana yari yamushyizeho wo kuba umuntu waremwe mu ishusho yayo.

Pastor Gisanura yavuze ko iki kibazo cyo kutanyurwa n’uwo umuntu ari we ari kimwe mu bituma abantu benshi bagwa mu byaha. Iyo umuntu atanyuzwe n’uwo Imana yamugize cyangwa n’umwanya afite, ashobora gutinyuka gukora ibyo atemerewe. Ibyo byatumye Eva atakaza umwanya yari afite nk’ushinzwe ingobyi ya Edeni [Manager], agatakaza inshingano yari yahawe zo guhagararira Imana.

Yavuze ko iyo umuntu atazi icyo apfana n’Imana, ashobora guhora yifuza ibintu bitari ibye cyangwa akagerageza gukora ibyo atemerewe. Ni yo mpamvu yahamagariye abakristo kwisuzuma no kumenya neza abo bari bo imbere y’Imana.

Yakomeje asobanura ko Imana yaduhaye Yesu Kristo kugira ngo atubere umuhuza hagati yacu n’Imana. Binyuze kuri Yesu ni ho ’duhinduka abana b’Imana kandi tukaba abaragwa bayo’.

Pastor Gisanura yavuze ko buri muntu ari uwihariye. Nta muntu n’umwe umeze nk’undi. Yatanze urugero ku gikumwe cyangwa ku maso y’umuntu, avuga ko iyo bakoze isuzuma (scan) bahita bamenya ko ari wowe. N’ijwi ry’umuntu ririhariye. Nubwo ku isi hari miliyari nyinshi z’abantu, buri wese afite umwihariko we n’imigambi yihariye Imana yamugeneye.

Yifashishije kandi ijambo ryo mu Abaroma 8:16-18, rigira riti: “Umwuka w’Imana ubwe ahamanya n’umwuka wacu ko turi abana b’Imana.”

Yasobanuye ko Umwuka Wera ari we uhamya kandi ugakomeza igihango kiri hagati yacu n’Imana, akadwibutsa ko turi abana bayo. Kuba turi abana b’Imana bituma tuba n’abaragwa bayo. Ndetse yavuze ko abamalayika batari abaragwa; abaragwa b’Imana ni abafite Kristo Yesu kuko ari bo bana bayo.

Yongeyeho ko umwana w’Imana abonera umurage we muri Kristo Yesu. Binyuze kuri Kristo ni ho Imana itwitaho nk’abana bayo, ikaturinda nk’uko umubyeyi arinda umwana we.

Mu gusobanura neza iyi sano, Pastor Gisanura yavuze ko igihango kiri hagati y’umukristo n’Imana ari nk’igihango kiri hagati y’umubyeyi n’umwana.

Yatanze urugero ku buzima busanzwe bw’umuryango, aho umwana atajya yibutsa umubyeyi amafaranga y’ishuri, inkweto cyangwa ibyo kurya. Umubyeyi ubwe abitekerezaho kandi akabikora kuko ari inshingano ze.

Yavuze ko ari na ko Imana ibana n’abana bayo. Hari ibintu byinshi idakeneye ko duhora tuyibwira kuko ibizi kandi ibitekerezaho. Ni yo mpamvu yasabye abakristo kugabanya gusenga basaba ibyifuzo gusa, ahubwo bagaharanira kugirana n’Imana ibiganiro byimbitse nk’iby’umwana n’umubyeyi.

Yagize ati iyo umuntu asabye Imana ikintu akabyizera, aba agomba kwizera ko Imana yamwumvise. Ibyo ni byo bigaragaza ukwizera gukomeye.

Pastor Gisanura yagaragaje ko igihango dufitanye n’Imana atari icyo gusaba gusa, ahubwo ari icyo kubana na yo, kuyumvira no kuyiringira nk’umubyeyi. Iyo umuntu azi ko afite Imana imwitaho nk’umubyeyi, ntacyo aba agomba gutinya mu buzima.

Yanagarutse ku buryo Satani yagerageje Eva muri Edeni, akamushidikanyisha ku wo ari we. Yavuze ko ari na ko Satani yagerageje Yesu Kristo, ashaka kumutera gushidikanya ku kimuranga (identity). Ariko Yesu we yari azi neza uwo ari we mu Mana, bityo ntiyashoboye kumunesha.

Pastor Gisanura yibukije abakristo ko Satani akomeza kugerageza abantu kuri identity yabo, ashaka kubatera gushidikanya ku byo Imana yabagize. Ariko yababwiye ko bagomba kumenya uwo bari bo mu Mana no kuguma mu gihango cyabo na yo.

Mu gusoza, yabwiye abakristo ati: “Ntuzashidikanye ku wo uri we. Menya uwo uri we mu Mana kuko ufite igihango gikomeye na yo. Ntuzave mu kwizerwa, ahubwo ukomeze uhagarare ushikamye muri Kristo Yesu.”

Yasoje inyigisho ashimangira ko umuntu uguma muri iki gihango aba afite umutekano mu Mana kandi akabaho afite ibyiringiro bikomeye.

Amen.