Itsinda rya Healing Music ribarizwa mu Itorero rya Healing Center Church riherereye i Remera inyuma ya Gare, ryamaze gushyira hanze EP y’indirimbo 5 ari zo: "Umugabane wanjye", "Uwambambiwe", "This I Promise", "Cya Gitaramo" na "Mountain of Love".
Mu kiganiro n’itangazamakuru cyo kuri uyu wa 22/10/2023, Abayobozi b’iri tsinda Healing Music basobanuye byinshi ku cyerekezo gishya bihaye banagaragaza ko binjiranye imbaraga n’ingamba nshya mu kwamamaza ubutumwa bwiza.
Iri tsinda ryatangiye mu mwaka wa 2007, kuri ubu rikaba rigizwe n’abaririmbyi babarizwa hagati ya 50-70. Ryagiye rigaragara mu bikorwa bitandukanye birimo igiterane cyakozwe kuva mu mwaka wa 2017 cyari gifite ubutumwa buvuga ko Kristo ariwe ndirimbo y’abizera.
Babajijwe impamvu Healing Music yatinze gusohora indirimbo, Umuyobozi wayo Nsengiyumva Innocent, yavuze ko bafashe umwanya uhagije wo gutegura urugendo rw’ivugabutumwa aho babanje kwisuganya begeranya abaririmbyi, abacuranzi ndetse no kwiyubaka mu bushobizi.
Ikindi yavuze ko igihe cya Covid 19 cyakomye iri tsinda mu nkokora bava muri ibi bihe binjira mu gutegura izi ndirimbo 5. Yavuze ko nyuma y’iyi EP bafite izindi ndirimbo nyinshi bitegura gusohora ndetse n’ibindi bikorwa by’ivugabutumwa.
Umwe mu banyamakuru yabajije ati "Ese ni iki mwiteguye gukora kugira ngo mudahita musubira inyuma? (muzima)". Umwe mu bayobozi b’iri tsinda yasubije ko badateganya gusubira inyuma ahubwo barangajwe imbere no kwamamaza ubutumwa bwiza bahamagariwe.
Bibukije ko bafite ibikorwa bihoraho aho buri kwezi iri tsinda riba rifite umugoroba wo kuramya no guhimbaza Imana. Imwe mu mishinga iri tsinda rifite irimo gukora amashusho y’indirimbo eshanu bashyize hanze aho bateganya gukora ayo mashusho umwaka utaha.
Iri tsinda ryirebera mu ndorerwamo y’ijambo riboneka muri Matayo 28:19-20 "Nuko mugende muhindure abantu bo mu mahanga yose abigishwa, mubabatiza mu izina rya Data wa twese n’Umwana n’Umwuka Wera".
Umuyobozi wa Healing Music, Bwana Innocent Nsengiyumva, yavuze ko basanzwe bakorana n’amatsinda atandukanye ndetse no muri izi ndirimbo harimo ukuboko kw’abaririmbyi batandukanye bagiye bakorana mu bihe bitandukanye
Yavuzeko bifuje kuzirekurira icyarimwe kugira ngo uwumvise indirimbo 1 yumve n’izikurikiyeho.
Ijambo ry’umunsi ryatumye benshi babona ko iri tsinda rifite umurongo muzima ni iryavuzwe n’umwe mu bayobozi b’iri tsinda ushinzwe imiririmbire ari we Bizimungu Brian [Brian Blessed] ubwo hasozwaga iki kiganiro aho yagize ati: "Ntidushaka gukora indirimbo za Hit, Turashaka gukora indirimbo zihembura imitima y’abantu".
Izi ndirimbo zose zakorewe muri Capital Record Studio isigaye yitwa Faith Zone izwiho gukorana n’amazina aremereye akaba ari nayo yakorewemo indirimbo "Amakamba" ya Maombi Honette Muhoza ubarizwa muri Leta Zunze Ubumwe za Amerika.
RYOHERWA N’INDIRIMBO 5 ZA HEALING MUSIC
Healing Music igizwe n’abaririmbyi bagera kuri 70
Bamwe mu baririmbyi ba Healing Music hamwe n’abanyamakuru batandukanye
