Nubwo Harmonize ari Umusilamu, iyi ndirimbo yuje amagambo atanga icyizere, yihanganisha ndetse anahamya urukundo rudasaza rw’Imana, aho we ubwe yigaragaza nk’uwabayeho mu mwijima w’ubuzima ariko akabona urumuri rubonerana mu kwemera.

"Yeye" bisobanura iki?
Mu magambo ya Harmonize, ijambo “Yeye”, ari na ryo zina ry’indirimbo, ni ijambo ry’Igiswahili risobanura “We” mu Kinyarwanda, cyangwa “Him” mu Cyongereza, rifite igisobanuro cyihariye kuko rihagarariye “Imana”. Mu ndirimbo, “Yeye” ni Imana ubwayo, yihariye, idasimburwa, kandi ikaba ari yo yonyine Harmonize avuga ko imubera igisubizo iyo byose byangiritse.

Yagize ati:“‘Yeye’ is a powerful and vulnerable expression... From moments of pain, addiction, and loneliness, to a profound realization of God’s unfailing love.”

Tugenekereje mu Kinyarwanda:“‘Yeye’ ni ishusho ikomeye y’ukuri no kwiyoroshya, igaragaza ibihe bikomeye narimo by’ububabare, kwishora mu biyobyabwenge no kwigunga, ariko byose bikarangira nsanze urukundo rw’Imana rudahinduka na rimwe.”

Indirimbo yahuriranye na Pasika ku bushake cyangwa ni impanuka?
N’ubwo Harmonize adakurikira imyemerere ya gikirisitu, guhitamo gusohora iyi ndirimbo kuri Pasika nta bwo ari impanuka. Mu muco wa gikirisitu, Pasika ni umunsi w’intsinzi y’ubuzima ku rupfu, ibyiringiro bishya no gukomera ku kwizera.

Ubutumwa bw’indirimbo “Yeye” buhuye neza n’iyo ntego, kuko Harmonize agaragaza ko nubwo yahuye n’ibigeragezo bikomeye mu buzima, Imana yamubereye ihumure n’agakiza. Ni nk’inyigisho ya Pasika isubiwemo mu buryo bwa muzika — aho umuntu atabarwa, agatangira ubuzima bushya.

Ubuhamya bw’urugendo rw’akababaro n’ukwizera
Mu buryo butavangiye, Harmonize aririmba ku buzima bwamushenguye: iminsi y’ubwigunge, umubabaro watewe n’abantu bamutereranye, imyenda (amadeni) yamubanye myinshi, n’ibitekerezo byo kwiheba. Avuga ko yashatse ituze mu byishimo by’isi, ibirori, n’icyubahiro, ariko byose bikamusiga ashonje mu mutima. Ariko urukundo rw’Imana, rudasaba igihembo, rwamuhaye amahoro no gusobanukirwa n’intego y’ubuzima.

Nta gukabya: ni indirimbo itari iyo kubyina gusa, ahubwo ni yo kumva mu gihe cyo kurira, gutekereza, no gusubira mu mwuka.

Kuki iyi ndirimbo ari iy’umwihariko?
“Yeye” ni indirimbo y’ihumure, isaba abayumva kwiyambura urwikekwe no kwemera ko bafite intege nke, ariko ko Imana ari inyembaraga ibarengera. Ni ubutumwa bushobora guhuza abantu bose — baba Abakirisitu, Abasilamu, abataragira idini — kuko igaruka ku ndangagaciro ziremereye: urukundo, imbabazi, ubwiyunge, n’icyizere.

Harmonize ahamya ko:“Whether facing rejection, debt, or even thoughts of death, He finds strength in knowing that God never turns away.”

Mu Kinyarwanda: “Nubwo naterwa umugongo, ngahura n’imyenda cyangwa n’ibitekerezo byo gupfa, nkura imbaraga mu kumenya ko Imana itigera imvaho.”

Indirimbo nk’isengesho
“Yeye” si indirimbo isanzwe. Ni ubuhamya. Ni isengesho. Ni igihamya cy’uko muzika ishobora kwambuka imbibi z’amadini n’imico, igafata umuntu mu mutima no mu bitekerezo. Harmonize yambuye umutima imbere y’abakunzi be, atanga ubuhamya bw’uko yahinduriwe ubuzima n’Imana atari asanzwe asenga.

Nubwo ari Umusilamu, indirimbo yasohotse kuri Pasika ifite ubutumwa buhuje n’icyo uyu munsi usobanura. Kandi bitwereka ko Imana, uko wayita kose, yigaragaza mu ndimi nyinshi — n’iyo yaba ari injyana ya Bongo Flava.
Umva/reba indirimbo "Yeye" kuri YouTube: