Umuhanzi Sam Gitangaza usengera muri ADEPR wazanye agashya ko gusabira abanyamakuru ko Imana yabaha umuceri, ubu yasohoye ivuga ngo "Mu rugo".
Sam Gitangaza ubwo yaganiraga na Paradise.rw yatangaje ko akomeje gukora cyane, aragira ati "Nasohoye igihangano gishya, indirimbo nise Mu rugo". Akomeza avuga ko abakunzi be atazabicisha inyota kuko inganzo ye idakama afite ibihangano byinshi yanditse.
Yavuze ko ubutumwa muri muri iyi ndirimbo ni uko "nanyuzwe n’ibyo Imana yankoreye ari naho mvuga ko naryohewe. Ikindi ngaragaza rya jambo riri muri Yohana 1:-12 mvuga ko nageze mu rugo akangira umwana, bivuze ngo narabatuwe".
Akomeza ati "Ariko nawe uko ubyumva indirimbo yose ndirimbye iba ifite message ariko imbogamizi ngira ni studio zintenguha kuko ntabasha kubona uko nza ngo nkorere i Kigali".
RYOHERWA N’INDIRIMBO NSHYA YA SAM GITANGAZA
Uyu musore wifuza kugera ku rwego rwa Israel Mbonyi, yatanze urugero avuga ko nk’ubu indirimbo yitwa "Manuel" na "Dawidi" "nashakaga kuzishyira hanze ariko mba numva studio z’i Rusizi rwose zitujuje ubuziranenge".
Sam Gitangaza arasaba inkunga y’amasengesho, ati "Gusa mukomeze kunsengera nzi ko icyo Imana yambwiye ko hari igihe message ntanga izagera ku banyarwanda bose ndetse ikagera no hanze y’igihugu murakoze cyane".
Sam Gitangaza yamamaye mu ndirimbo "Ikibemeza" aririmbamo amagambo yihanganisha abakozi b’Imana bakora akazi kabo mu kwitanga kwinshi ariko bagacibwa intege n’ubuzima n’abantu yise abanyamakuru, babita ba Morodikayi, nyamara bakibagirwa ko basenga Imana ihindura amateka.
Yabwiye abageragezwa kwirinda kwihorera ku babishongoraho n’ababakomerekesha amagambo yabo aryana, ahubwo abasaba kujya babifuriza ineza, bakabaha umuceri n’igikoma. Hari aho aririmba ati "Abo banyamakuru ubahe ku muceri ubabwire ko nzarema ikibemeza".
[Luka 6:29 Ugukubise mu musaya umuhindurire n’uwa kabiri, uzakwaka umwitero ntuzamwime ikanzu. 30Ugusaba wese umuhe, unyaga ibyawe ntuzabimwake ukundi].
Ahumuriza ababuze urubyaro, bakunze kubwirwa na rubanda [ba bandi yise abanyamakuru] bati "Niba ari umuhanga niyihe umwana", ndetse akanibasira abavuga ko abantu basenga bameze nk’injiji, abo bose abasubiza ko Imana izarema ikibemeza.
Sam Gitangaza azwi cyane mu ndirimbo yise ’Ikibemeza’
REBA INDIRIMBO YA SAM GITANGAZA YITWA "IKIBEMEZA"
