Iyi nkuru igaruka ku bibeshya ko intambara ya none hagati ya Isirayeli na Irani yahanuwe, ikanasesengura uko Isirayeli ivugwa mu Isezerano Rishya atari igihugu cya politiki, ahubwo ko ari ubwoko bw’Imana buvugwa mu buryo bw’umwuka.
Mu gihe intambara hagati ya Isirayeli n’ibihugu by’Abarabu irushaho gufata indi ntera, cyane cyane hagati ya Isirayeli na Irani, bamwe bari kwibeshya bavuga ko "ubuhanuzi bwo mu Byanditswe busohoye." Ariko se, ni byo koko ibi bibazo bya politiki n’intambara byari byaranze? Kandi se, igihugu cya Isirayeli cya politiki ni yo “Isirayeli y’Imana” ivugwa mu Isezerano Rishya?
Isirayeli y’ubu ni iki?
Isirayeli y’ubu yashinzwe mu mwaka wa 1948 n’Abayahudi baje baturutse mu mpande zose z’isi nyuma ya Jenoside yakorewe Abayahudi (Holocaust). Ni igihugu gifite ubutegetsi bwigenga, cyubatswe nk’igihugu cy’amategeko ya demokarasi n’idini ya Kiyahudi.
Ariko mu Byanditswe Byera, cyane cyane mu Isezerano Rishya, ijambo “Isirayeli” rihabwa ibisobanuro birenze kuba igihugu cyangwa ubwoko bw’amaraso. Pawulo intumwa avuga mu buryo bweruye ko:
"...Atari Abisirayeli bose bavuka kuri Isirayeli... ahubwo abana b’isezerano ni bo bibarwa ko ari urubyaro.” — Abaroma 9:6-8
Isirayeli y’Imana ni bande?
Mu Bagalatiya 6:16, Pawulo yaranditse ati:
"Nuko abazajya bakurikiza ibyo amahoro n’imbabazi bibe muri bo, bibe no mu Bisirayeli b’Imana."
Aha, Isirayeli y’Imana ni abantu bose bizeye Kristu, batakibarwa ku gisekuru cy’amaraso cyangwa ku mategeko ya Mose, ahubwo babarwa binyuze ku kwizera. Abo ni Abakristo , baba Abayahudi cyangwa Abanyamahanga, babatijwe muri Kristo.
Ibi bivuga ko Isirayeli y’Imana itari igihugu cya politiki, ahubwo ni Itorero ry’Imana, abantu bejejwe n’amaraso ya Yesu.
Ese intambara za none hagati ya Isirayeli na Irani ni ubuhanuzi buri gusohora?
Nta hantu na hamwe mu Isezerano Rishya cyangwa mu buhanuzi bw’Isezerano rya Kera havugwa ku mugaragaro intambara izahuza Isirayeli na Irani. Irani yo mu bihe bya Bibiliya yari izwi nk’Ubuperesi.
Hari abashaka gushingira ku buhanuzi bwo muri Ezekiyeli 38-39, ahavugwa umwami wa “Gogi wo mu gihugu cya Magogi” uzatera igihugu cy’Imana. Ariko:
Ibi ntibivuga ku buryo bweruye Isirayeli y’ubu.
Ezekiyeli yahanuye mu buryo burimo amarenga, ndetse ibihugu n’abami avugamo bimwe ntibikibaho.
Ibi bice byinshi bifatwa nk’ubuhanuzi bufite igisobanuro cy’umwuka ku itorero n’ibihe bya nyuma, si ibya geo-politiki y’isi.
Icyo Bibiliya itwigisha ku ntambara n’amahoro
Yesu yavuze ko mu minsi ya nyuma hazabaho:
Matayo 24:6
Muzumva iby’intambara n’impuha z’intambara, mwirinde mudahagarika imitima kuko bitazabura kubaho, ariko imperuka izaba itaraza.
Matayo 24:7
Ishyanga rizatera irindi shyanga, n’ubwami buzatera ubundi bwami, hazabaho inzara n’ibishyitsi hamwe na hamwe.
Ariko ibi ntibisobanura ko intambara runaka ari yo buhanuzi nyirizina. Yesu yasobanuye ko ibyo ari ibimenyetso rusange, si ubuhanuzi bwihariye ku gihugu runaka.
Icyo twakwitaho:
Isirayeli y’Ubuhanuzi si igihugu cya politiki, ahubwo ni abantu b’Imana bizeye Kristu.
Intambara z’isi ntizikwiye kuduhuma amaso ngo twitiranye politiki n’ubuhanuzi bw’umwuka.
Icyo Yesu yasabye abamwemera ni ukumenya ibihe, bagakomeza kwitegura, aho kujya mu mpaka z’intambara za geo-politiki bazihuza n’ubuhanuzi.
Irani (Ubuperesi), Isirayeli, Amerika n’ibindi bihugu biri mu ntambara zishobora guturuka ku nyungu za politiki, ubukungu, cyangwa intambara z’ukwemera, ariko ibyo byose ntibihindura ishusho ya Isirayeli y’Imana.
Nubwo ibiri kubera mu Burasirazuba bwo hagati bihangayikishije isi, Abakristo basabwa gusobanukirwa itandukaniro riri hagati ya Isirayeli ya politiki na Isirayeli y’Imana, kandi ntibahubuke mu gusobanura ubuhanuzi batabanje kwiga neza ibindi bifite aho bihuriye n’ibyo basomye muri Bibiliya.
Isirayeli y’Imana ivugwa mu Isezerano Rishya si iyi iri mu ntambara na Irani (Ubuperesi)
