Paradise igiye kubagezaho urugendo rwa Muzika rw’abahanzi Alicia na Germaine kuva i Rubavu mu itangira ry’urugendo kugera BK Arena imbere y’imbaga.

Inzira z’abagenzi zisa n’izisa, itandukaniro rikaba uburebure bwazo. Aba bahanzikazi nabo mu ntangiriro bisa n’ibitaranyungutikaga ndetse hari n’aho bageraga bagasanga na "Cira birarura" nk’uko twabitangarijwe.

Tariki 17 Mata 2024 ni bwo inkuru nziza yasesekaye mu Rwanda. Icyo gihe Gospel yakiranye yombi aba bakobwa babiri bavukana, Alicia na Germaine. Iri tsinda ryinjiranye indirimbo "Urufatiro" ryakiranywa amashyi y’urufaya, impundu ndetse n’ingoma nk’uko Umwami Dawidi yakiranywe ibisingizo n’imbyino nyuma yo kunesha Goliyati.

Kugira amajwi meza ndetse no kwandikana ubuhanga ku bwo guhumekerwamo n’Imana ibi ntibyari bihagije ngo ubufindo bwerekere i Yerusalemu.

Mbere gato y’igitaramo "Easter Jubile" cyateguwe na Ben & Chance, Innocent Ufitimana umubyeyi wa Ufitimana Alicia na Ufitimana Germaine yavuze ko mu ntangiriro z’urugendo rwabo inzira itari nyabagendwa.

Ati: "Imwe mu mbogamizi twahuye nayo ni Bad Reactions (mu Kinyarwanda cyo ku Kamonyi ni nk’ibitekerezo bisenya) aha yavugaga ko harimo bamwe mu bantu batangaga ibitekerezo bitubaka hirya no hino ku mbuga nkoranyambaga aho gushyigikira iri tsinda.

Gusa ariko n’ubwo byari bimeze gutyo iri tsinda ntiryahaye umwanya umubare udashyitse n’igitonyanga mu nyanja wifuzaga ko bagumana ubutumwa bahawe.

Aba basenze Imana nk’uko umubyeyi wabo yakomeje abivuga ubundi bakura amajwi mu mihogo bakora amanywa n’ijoro kugira ngo abakunzi babo batazagwa isari.

Uku kwiminjiramo imbaraga kwashibutsemo indirimbo zifite amavuta zirimo Uriyo, Rugaba, Urufatiro, Ndahiriwe, Ibendera, Ihumure ndetse na Wa Mugabo. Uko niko mu muryi hajya havumbukamo ibiryoshye (mu mibabaro havumbukamo umunezero).

Buri muntu wese yabyumva ukwe ariko guhuza Dr Alicia wiga muri Kaminuza y’u Rwanda ishami rya Huye na Germaine murumuna we wabaga arimo kwirira inyuguti muri Ecole de lettres de Gatovu mu karere ka Nyabihu, si ibintu byari byoroshye.

Mu bihe by’ibiruhuko aba bombi bakoranaga umurava. Ibi byavumbutsemo igikundiro gitangaje indirimbo zabo zihinduka umuti womora nk’amavuta akuze.

Matayo 5:15 hagira hati: "Nta bakongeza itabaza ngo baritwikirize intonga, ahubwo barishyira ku gitereko cyaryo rikamurikira abari mu nzu bose’’. Uko niko igikundiro cya Alicia na Germaine cyarengeje umugabo impinga!

Ku wa Gatandatu tariki ya 07 Werurwe 2026, mu Rwanda hatangiwe ibihembo mpuzamahanga bya Shining Star Africa Awards 2026 mu birori byabereye kuri Olympic Hotel mu Mujyi wa Kigali.

Mu bihembo birenga 50 byatanzwe muri ibi birori harimo ibyegukanywe n’abanyarwanda barimo Alicia na Germaine bakora umuziki wo kuramya no guhimbaza Imana.

Mu gihe The Ben yegukanaga igihembo mu cyiciro cya "Best Star Artist East Africa", Alicia na Germaine batwaye igihembo cy’umuhanzi mushya mwiza wa Gospel muri Afrika [Best Star New Gospel Artist]

Tubibutse ko iki gihembo cyari icya kabiri aba baramyi batwaye nyuma y’igihembo cya Rubavu Music Awards and Talent Detection Edition 1.

Amaherezo y’inzira ni mu nzu! BK ARENA izabakumbura

Ku Cyumweru tariki ya 05 Mata 2026ku munsi mukuru wa Pasika, ni bwo Alicia na Germaine banditse andi mateka bataramira muri BK Arena inyubako buri muhanzi wese wo muri East Africa aba yifuza nibura kuzatereramo ikorasi. Ku butumire bwa Ben and Chance, aba baramyi b’i Rubavu babashije gukandagiza ibirenge byabo mu byasezeranyijwe.

Alicia na Germaine abahanzi babarizwa muri ABA Music

Mu munezero mwinshi watenderaga ku maso yabo, aba baramyi bahembuye imitima y’abiganjemo ibyamamare nka Aline Gahongayire, David Kega, Kamikazi Dorcas wananiwe kwiyumanganya agafatanya n’iri tsinda bakaririmbana indirimbo "Ibendera".

Dorcas wo muri Vestine na Dorcas, yaragaragaje ko azi iyi ndirimbo yose. Amakuru Paradise ikesha umuntu wa hafi wo mu muryango wa Vestine na Dorcas avuga ko Dorcas ari umufana ukomeye w’iri tsinda kikaba ikimenyetso cy’ubufatanye muri Gospel.

Imihigo kuri aba bahanzi irakomeje kandi baharanira gufatanya ubuhanzi n’ubuhanga. Kuri Alicia umukuru muri iri tsinda yemera ko kuba Dogiteri w’umuhanzi atari ikibazo dore ko hari n’indwara zivurwa n’umuziki.

Paradise mu busesenguzi bwayo twasoza iyi nkuru tuvuga ko ’Escalier yakuye aba bakobwa i Rubavu ikabageza muri BK Arena’, ni Rugaba yabashoboje nyuma y’urugendo rutoroshye banyuzemo mu muziki wabo ariyo twise Guterera Escaliers zinyerera, aho harimo kurara amajoro bakora umuziki, gucibwa n’ibindi.

Icyakora hamwe n’Imana yabahaye ingabire yo kuririmba, gukora cyane, gukunda ibyo bakora, gusenga, gukora umuziki usukuye, itsinda ryiza ribafasha [Management Team], byagize uruhare rukomeye mu iterambere ryabo ryigaragaza buri munsi. Kuri ubu baritegura kuzuza Miliyoni y’abarebye indirimbo yabo "Uriyo" mu gihe gito cyane imaze igiye hanze.

Ubuhanuzi muri BK Arena ubwo Alicia na Germaine bari barimo kuririmba

Alicia na Germaine bahereye ku ndirimbo yo mu gitabo ivuga ngo ndashima umusaraba, bakurikizaho "Uriyo" na "Ibendera" iri mu njyana y’amapiyano. Ubwo aba bakobwa bavukana bari ku ruhimbi barimo kuririmba, bari bambaye inkweto zishinguye, bituma Germaine atisanzura neza, akuramo inkweto kugira ngo atambire Imana yirekuye.

Mu gihe ibi bihe byo kuramya byari bikomeje, umwe mu bahanuzi wari witabiriye iki gitaramo yahawe ubutumwa, arerekwa. Nyuma, yatanze ubwo buhamya bwakoze ku mitima ya benshi, agaragaza uko yumvise ayobowe n’Umwuka w’Imana mu buryo budasanzwe.

Yagize ati: “Igihe Germaine yari ari kuririmba yakuyemo inkweto, nge nari ndi gusenga. Twari twazanye na mushiki wange, mushiki wange afata video ye nge ntabizi ndi gusenga. Umwuka wera arambwira ngo ‘itegereze iyo Arena yose, Imana ihaye umugisha ibirenge byanyu, muzakandagira kuri stage nyinshi nka ziriya ku bw’ubuntu bw’Imana.’”

Uyu muhanuzi yakomeje asobanura ko nyuma yo gusenga, mugenzi we yamweretse amashusho yafashe, akabonamo Germaine ari kuzenguruka ku rubyiniro nta nkweto yambaye, ibintu yahise ahuza n’ubutumwa yari amaze kwakira mu buryo bw’umwuka.

Yakomeje asobanura ati: “Nasoje gusenga, sister anyeretse video mbona koko Germaine yambaye ibirenge ari kuzenguruka stage, mpita mbihuza n’ibyo Umwuka wera yambwiye”.

Ku ruhande rw’abahanzi Alicia na Germaine, na bo bagaragaje ko kuririmbira muri BK Arena ari intambwe ikomeye mu rugendo rwabo, cyane ko ari igitaramo cya mbere bakoreye imbere y’imbaga nini kuriya. Baririmbye indirimbo zirimo “Uriyo”, “Ibendera”…, bakaba baravuze ko byari inzozi zabaye impamo.

Igitaramo “Easter Jubilee” cyari cyuzuyemo amarangamutima akomeye, aho uretse kuramya no guhimbaza Imana, cyabaye n’umwanya wo guhindura ubuzima bwa benshi, nk’uko byanagarutsweho n’abandi bahanzi barimo Alicia na Germaine bavuze bati: “Byari birenze gutarama, Imana yigaragaje, kandi imitima myinshi yabohotse.”

Alicia na Germaine mu gitaramo cya Pasika muri BK Arena

Alicia

Germaine

Aba baramyi bakomeje guhesha izina rya Kristo icyubahiro

Reka tubasigire ibendera by Alicia & Germaine

Uko Alicia na Germaine bitwaye mu gitaramo cya Pasika muri BK Arena