Abaramyi Rene Patrick na Agasaro Tracy batangaje ko imyiteguro y’igitaramo "In Christ Now Worship Experience" igeze ku musozo, banashimangira ko intego yacyo atari ugukora igitaramo gisanzwe, ahubwo ari ugushyiraho umwanya wihariye wo kuramya Imana, kuyisenga no gusabana na Kristo.

Ibi babitangaje mu kiganiro bagiranye n’itangazamakuru cyabaye ku mugoroba wo kuri uyu wa 20 Nyakanga 2026, cyitabiriwe n’abafatanyabikorwa b’iki gikorwa barimo Honor Events ari nayo Mufatanyabikorwa Mukuru, Rebirth Creative, DB Sound, Yego Innovation Transport Agency, Diana Beauty Academy, Saltel, ZLD, Stractora, Prime Couture, Jeannette Florist na Eagle Art Rda.

Igitaramo "In Christ Now Worship Experience"kizaba ku wa 25 Nyakanga 2026 muri Camp Kigali guhera saa kumiz’amanywa (4:00 PM).

Mu ijambo rye, Patrick (Rene)yavuze ko iki gikorwa kigamije gufasha abantu kugirana ubusabane bwimbitse n’Imana.

"Jye na madamu turi abaramyi. Iyi si concert isanzwe, ni umwanya wo kuramya Imana no gusabana nayo. Turifuza ko abazaza bazaryoherwa n’ubuzima buri muri Kristo."

Yakomeje avuga ko iki ari igikorwa ngarukamwaka kandi ko kizakomeza no kugeza ubutumwa bwiza mu mashuri, kugira ngo urubyiruko rumenye Kristo.

Ku ruhande rwa Tracy uzwi ku izina rya Ikibaju cya Kristo, yavuze ko abazitabira bazagira amahirwe yo kuramya Imana hamwe n’abaramyi batandukanye barimo Bella Kombo wo muri Tanzania, uzwi mu ndirimbo zirimo "Ameniona" na "Una Nguvu", ndetse na Ben & Chance, Zoravo wo muri Tanzania, Kenneth wo mu Rwanda na Ebuka Songs wo muri Nigeria.

Tracy yanashimiye umuramyi Chance, avuga ko yamubereye urugero rukomeye ku bijyanye no kwitwara neza ku rubyiniro.

"Chance namwigiyemo byinshi cyane cyane ku bijyanye na stage presence. Nubwo atari abizi, ndamushimira kuko yanteye imbaraga."

Yatangaje kandi ko abazitabira iki gitaramo bazamara amasaha arindwi yose baramya Imana nta guhagarara, ibintu yavuze ko bizatanga umwanya uhagije wo kugirana ubusabane bwihariye n’Umwami Yesu Kristo.

Imyanya y’ubuntu 1,000 yashize mu minsi itatu gusa

Rene Patrick yavuze ko bateganyije imyanya 1,000 y’ubuntu kugira ngo abafite inyota yo kuramya Imana ariko badafite ubushobozi bwo kugura amatike na bo babashe kwitabira.

Yagize ati: "Twashyizeho imyanya y’ubuntu 1,000, ariko mu minsi itatu gusa yari yamaze gushira yose."

Yongeyeho ko ubutumwa nyamukuru bw’iki gikorwa bushingiye ku nkuru ya Pawulo ageze muri Atenayi agasanga igicaniro cyanditseho ’Imana itamenywa’, ashimangira ko abantu bakwiye gusobanukirwa uwo bari we muri Kristo.

Tracy na we yavuze ko intego yabo ari ugufasha abantu kumenya identity yabo muri Kristo. "Turifuza ko buri wese uzitabira amenya uwo ari we muri Kristo kandi amenye ko yuzuye muri We. Twifuza ko buri muntu azava muri iki gikorwa afitanye n’Imana ubusabane bwimbitse."

Abafatanyabikorwa bagaragaje impamvu bashyigikiye iki gikorwa

Umuyobozi Mukuru wa Honor Events, Honorata Ishimwe Bijoux, yavuze ko bahisemo kuba umuterankunga mukuru wa In Christ Now kubera ukwizera bafite no gushyigikira umurimo wo kwamamaza ubutumwa bwiza.

Yagize ati: "Dutanga serivisi zo gutegura ibitaramo n’ibirori ndetse na hospitality. Twizera Imana, ni yo mpamvu twahisemo gufatanya na Rene na Tracy muri iki gikorwa."

Uwari uhagarariye Salty, Christophe Mazimpaka, yavuze ko nubwo ikigo cyabo gitanga serivisi za IT, bishimiye gushyigikira iki gikorwa kuko bakunda Ijambo ry’Imana.

Emmanuel wari uhagarariye Yego Innovation Transport Agency, yavuze ko ikigo cyabo kimaze imyaka 10 gikorera mu Rwanda kandi ko kubona gifatanya n’iki gikorwa ari umugisha.

Ku ruhande rwa DB Sound, yavuze ko usibye gutanga serivisi za sound system na studio, ubufatanye bafitanye na Rene na Tracy bushingiye ku ntego yo kugeza ubutumwa bwa Yesu Kristo ku bantu benshi.

Uwinema Diane wa Diana Beauty Academy yavuze ko Tracy yababereye umugisha mu bihe bitandukanye, bityo na bo babona bikwiye kumushyigikira muri iki gikorwa.

"Muze turyoherwe n’ubuzima buri muri Kristo"

Mu gusoza ikiganiro n’itangazamakuru, Rene Patrick yongeye gutumira abakristo n’abandi bose bazitabira iki gikorwa, agira ati: "Nimuze dufatanye turyoherwe n’ubuzima buryoshye buri muri Yesu Kristo."

In Christ Now Worship Experience izaba ku wa Gatandatu tariki ya 25 Nyakanga 2026 muri Camp Kigali, ikazahuza abaramyi mu masaha arindwi y’ubusabane, kuramya no guhimbaza Imana, hagamijwe gufasha abantu gusobanukirwa uwo bari we muri Kristo no gukomeza umubano wabo n’Imana.

Imyanya y’ubuntu 1,000 yamaze gushira. Amatike ari kugurishwa ku rubuga www.renetracy.com cyangwa kode ya *550*2*2*111#. Amatike ni 10,000 Frw na 25,000 Frw.

Muri Kigali hagiye kubera igitaramo mpuzamahanga "In Christ Now"