Clapton Kibonge wamaze kwibikaho itike yo kwinjira muri “Easter Jubilee Music Gathering”, igitaramo cya Ben na Chance kizabera muri BK Arena kuri Pasika, ahangayikishijwe n’uko yashira utaragura iyawe.
Umunyarwenya, umukinnyi wa filime ndetse n’umuramyi Mugisha Emmanuel yatumiye abakunzi b’umuziki n’Abakristo muri rusange kuzitabira igitaramo gikomeye cyiswe Easter Jubilee Music Gathering cyateguwe n’abahanzi Ben na Chance. Icyo gitaramo kizabera muri BK Arena ku munsi wa Pasika, tariki ya 05 Mata 2026.
Clapton Kibonge usanzwe ari n’umuhanzi mu ndirimbo zo kuramya no guhimbaza Imana, urugero nk’iyo yise “Isengesho”, aho agaragaza ukwizera kwe n’ukuntu umuntu akwiriye kwiringira Imana mu buzima bwa buri munsi, yashishikarije abantu kugura amatike hakiri kare, agaragaza ko iki gitaramo kizaba ari umwanya wihariye wo guhura, kuramya no kwishimira Imana.
Iki gitaramo kizaririmbwamo n’indirimbo nshya ya Ben na Chance yitwa “Igikombe Cyanjye”, yasohotse mu ntangiriro za Werurwe 2026, ndetse izahurizwa hamwe n’izindi ndirimbo zabo zakunzwe zirimo “Zaburi Yanjye”, “Yesu Arakora”, “Amarira”, “Impano y’Ubuzima” na “Mu Nda y’Ingumba”.
Ku bijyanye n’amatike, hari ibyiciro bitandukanye birimo Upper Room, Stage View, Premium, Altar Zone, CIP Zone na Executive Zone, buri kimwe kikagira igiciro cyacyo bitewe n’aho umuntu azicara n’igihe azagurira itike. Wifuza kuyagura wayasanga ku rubuga rwa ticqet.rw.
