Bahati Manigabe avuka mumuryango w’abana 7, abakobwa ni 4 n’abahungu ba 3 akaba ari umwana wa 6. Ni umwe mu bakabije inzozi arota neza nka Yozefu wajyaga arota izuba, ukwezi ndetse n’inyenyeri byikubita imbere ye.

Gusa umunyarwanda yaravuze ati: "Ahakomeye niho hava amakoma".

Bitewe n’amateka akomeye u Rwanda rwanyuzemo, ababyeyi be baje guhunga mu mwaka wa 1959 bityo aza kwisanga mu buhungiro mu gihugu cya Congo Kinshasa cyahoze kitwa Zaire.

Uyu muramyi wajyaga arota aririmba inzozi ze zaje gusohora ku myaka ine gusa yisanga ari umwe mu baririmba muri korali y’abana akaba yaragiraga ishyaka ryo kuririmbana n’abaririmbyi bamurusha Imyaka.

Uyu muririmbyi wavukiye mu itorero rya ADEPR we n’umuryango we baje kugaruka mu Rwanda mu mwaka wa 2000.

Mu kiganiro na Paradise.rw, yatangaje ko nyuma yo kugaruka mu Rwanda yakomereje inzira y’agakiza mu itorero ry’Abadivantiste b’Umunsi wa Karindwi ariko mu ijwi rituje, Mwuka Wera aza kumwumvisha intego yahawe muri ADEPR itararangira.

Yaje kubatizwa mu mazi menshi mu mwaka wa 2006 icyo gihe yaririmbaga muri korali y’urubyiruko yabarizwaga mu itorero rya ADEPR Ruhango ku cyicaro cya paruwase.

Iyerekwa ry’uyu musore ryakomeje kwaguka dore ko mu mwaka wa 2007 yagizwe umutoza w’amajwi wa korali y’urubyiruko akaba yarakoze izi nshingano imyaka itanu kugeza mu mwaka wa 2012 ari bwo yazamuwe muri korali nkuru.

Uko bwije n’uko bukeye, uyu musore yazamurwaga nk’uri muri essenseur dore ko mu mwaka wa 2014 yaje kugirwa umutoza w’amajwi wa korali nkuru akaba yarayifashije gukora Albamu y’amajwi n’amashusho.

Mu mwaka wa 2017, yaje gukomereza ubuzima i Kigali ubufindo bukaba bwaramushyize mu rusengero rwa ADEPR Kicukiro shell kugeza magingo aya. Kuri ubu uyu musore ni umwe mu nkingi za mwamba za kirali yaho yitwa Abaragwa akaba naho ari umutoza w’amajwi nk’uko n’ahandi yanyuze ahasiga aka kamero.

Abajijwe ku ndirimbo yasohoye yitwa "Kugukurikira" yagize ati "Ni indirimbo yaje mu gitondo nicuye ahagana saa kumi n’ebyiri". Yakomeje agira ati "Nkunda kubyuka ngatekereza ku magambo amwe n’amwe Yesu Kristo yavuze".

Yakomeje avuga ko iyi ndirimbo yashibutse ku ijambo riboneka muri Matayo 16:24-26 ahagira hati" Maze Yesu abwira abigishwa be ati “Umuntu nashaka kunkurikira yiyange, yikorere umusaraba we ankurikire, kuko ushaka kurengera ubugingo bwe azabubura, ariko utita ku bugingo bwe ku bwanjye, azabubona. Kandi umuntu byamumarira iki gutunga ibintu byose byo mu isi, niyakwa ubugingo bwe? Cyangwa umuntu yatanga iki gucungura ubugingo bwe?.

Ku bijyanye n’inzozi afite mu muziki nk’umuhanzi ku giti cye, yagize ati "Inzozi nzanjye ni uko abantu bose bamenya Yesu nk’uko byanditswe ngo mugende mumahanga yose mubabwire ubutumwa bwiza.

Zimwe mu mbogamizi abona mu baririmbyi bagitangira avuga ko hakigaragara kwisuzugura ku banyempano no kudashyigikirwa bikwiye.

Avuga ko aririmba umurimo wa Kristo wo gucungura umuntu, kuramya Imana no gukumbuza abagenzi ijuru tujyamo.

Mugabe Manigabe akomeje gukabya inzozi
RYOHERWA N’INDIRIMBO NSHYA YA MUGABE MANIGABE