Umuramyi Danny Mutabazi uzwiho gutambutsa ubutumwa mu ndirimbo ziva ku mutima w’Imana yamaze gushyira ku mbuga zicuruza umuziki indirimbo 7 nk’uko yari yabisezeranyije itangazamakuru.
Kuwa 5 tariki ya 06 Werurwe 2026 wari umunsi udasanzwe kuri Danny Mutabazi, Itangazamakuru ndetse n’abakunzi be bari bamukumbuye cyane. Kuri uwo munsi uyu muramyi yateye ibuye rimwe rihamya inyoni ebyiri.
Ku ikubitiro yagiranye ikiganiro n’Itangazamakuru cyibanze mu kubamurikira imishinga ye ategura ndetse no kubasonanurira impamvu muri iyi minsi atabonekaga neza.
Muri Iki kiganiro uyu muramyi ntabwo yari wenyine dore ko yari kumwe na bamwe mu bafatanyabikorwa be barangajwe imbere na Dove Ltd yari ihagarariwe na Bwana Philbert; Shema Trading Ltd ikora udukombe dukoreshwa inshuro imwe yari ihagarariwe na Prince Shumbusho;
Bijoux umuyobozi wa Honor Events Company yaje guca akajagari kabonekaga mu mitegurire y’ibitaramo n’ibirori ndetse na Sam wari uhagarariye Uwera Fashion Yambitse Danny Mutabazi kuri uriya munsi.
Uhereye Ibumoso: Mc Fidele Gatabazi, Esperance Ufitubugingo (Umucyo FM) Muteterazina (Imvaho nshya), Danny Mutabazi, Obededomu wa Paradise na Bonheur Niyonkuru.
Muri Iki kiganiro Danny Mutabazi yavuze ku mvano za Album nshya "Waranzuye".
Ati: "Waranzuye yaturutse ku mvamutima zanjye".
Yakomeje avuga ko iyi Album ye ya kabiri atari album yateguye igihe kirekire ikaba ije ikurikira Calvary yakozwe mu mwaka wa 2019.
Waranzuye ni album ikubiyemo ubutumwa bushimangira urukundo rwa Kristo dore ko indirimbo 5 muri 7 ziyigize aribwo butumwa zitanga.
Danny Mutabazi yagarukanye imvumba yuzuye impamba mu ndirimbo 7 zisize ubuki
Bijoux wa Honor Event akomeje gushimirwa ku bwa Serivisi nziza n’impinduka yazanye mu gutegura ibitaramo.
Dany Mutabazi kuri ubu umaze gusohora indirimbo 16 yavuze ko kimwe mu bintu bimuha imbaraga zo gukomeza ivugabutumwa mu ndirimbo ari message Yagiye yakira mu ndirimbo yasohoye mbere.
Yavuze ko yakira message nyinshi z’abantu bavugaga ko bari bateguye imigozi bagiye kwiyahura abandi bamaze kugura ibinini byo kwiyahura bamara kumva izi ndirimbo bikarangira baretse kwigirira nabi. Ku bwo kumva ubutumwa yatambikije mu ndirimbo zirimo impamba y’urugendo ,amarira y’ibyishimo abantu bazizereyemo barakizwa
Ibaze Dudu Rehema abuze muri iki kiganiro, ni nko gutaha ubukwe bw’abarokore butarimo fanta!
Avuga ku cyo Imana yamutumye ku bantu bayo muri iyi minsi yagize ati: "Icyo Imana ishaka kubwira ubwoko bwayo inyuze muri jye ni ukugirango abantu bamenye urukundo rwa Kristo. Yavuze ko indirimbo ahabwa n’Imana akazitambutsa amaze kuzisengera ati: "Indirimbo sipfa kuza, mfata ibihe bihagije byo gusenga."
Bijou umuyobozi wa Honor yashimiwe kubwa serivisi nziza akomeje gutanga ndetse n’impinduka yazanye mu mitegurire y’ibirori n’ibitaramo. Ubwo yabazwaga niba atazagera aho agacika intege nka bamwe mu bamubanjirije yavuze ,mu ijambo rimwe ati"Honor Event ni company yaje izi icyo ishaka, iyo umuntu azi icyo ashaka nta kurekura,abaclients bacu bamenye ko tuzi icyo dushaka bityo tutazarekura.
Bijou yatanze ihumure ku bakunzi be. Nta gahunda yo kurekura ihari.
Philbert uhagarariye Dove Hotel ati: "Kuri ubu Dove Hotel binyuze muri Dove LTD ni iwabo w’abahanzi [dore ko kuri ubu umaze gutera inkunga ibitaramo birimo icya Alexis Dusabe, Jesca Mucyowera, Bosco Nshuti na Danny Mutabazi]. Yavuze ko kandi bateganya gukomeza gukorana n’abahanzi batandukanye hagamijwe kwamamaza ubutumwa bwiza bwa Yesu Kristo.
Bwana Philbert wa Dove Ltd ati: "Muhawe ikaze muri Dove Hotel, muhabwe serivisi nziza zirimo amacumbi, Sauna, Sale zikodeshwa ndetse n’igisope cya gikristo.
Nyuma y’iki kiganiro hakurikiyeho umuhango wo gusangiza abakunzi ba Danny Mutabazi album nshya "Song listening" witabiriwe n’abantu batandukanye nk’uko tuzabigarukaho mu nkuru itaha.
Mc Fidele Gatabazi niwe waruyoboye ibi birori. Hejuru cyane.
Inganda zifite abavugizi b’abanyamakuru zirahirwa. Prince Shumbusho wa Trading Ltd yasobanuye akamaro ko gukoresha udukombe dukoreshwa inshuro imwe (usage unique) abantu barumirwa.
Danny Mutabazi ni umwe mu baramyi beza akaba n’umwanditsi w’umuhanga dore ko ari we wanditse indirimbo z’abaramyi bakunzwe Vestine nda Dorcas zirimo Iriba, Umutaka n’izindi. Yanditse indirimbo zirimo Urugendo na Irembo za Divine Nyinawumuntu n’izindi.
Danny Mutabazi uvuka mu karera ka Rwamagana azwi mu ndirimbo nka Carvaly, Amarira y’ibyishimo, Impamba y’urugendo n’izindi. Kuri ubu wabasha kubona indirimbo zigize album 7 ku mbuga zicuruza umuziki mu buryo bw’amajwi.
Danny Mutabazi yatanze umushongi womora mu ndirimbo 7 zigize album ye ya kabiri
