Apôtre Mignonne Kabera yatanze inyigisho ikomeye igaruka ku myitwarire y’abavuga ubutumwa bwiza basabiriza, abakebura ko kuvuga ubutumwa uri mu bukene bwo gusabiriza bidahesha Imana icyubahiro kandi bigatesha agaciro umuhamagaro.

Yagaragaje ko hari aho ubuhanuzi bwagiye buhinduka inzira yo gushaka imibereho aho kuba umurimo wo gukorera Imana.

Yatanze urugero rw’abahamagara abamama bababwira amagambo aryoshye ngo “Imana yejeje ibirenge byawe” cyangwa “Imana irakwishimiye,” ariko intego nyamukuru ari ukubakuraho amafaranga make. Yavuze ko ubwo buryo atari ubuhanuzi buzima, ahubwo ko ari ubuhanuzi bw’uburofa bugamije kuyobya no kunyaga abizera.

Yashimangiye ko uwahawe amavuta y’umuhamagaro adakwiye guhindura igicaniro isoko yo gusabiriza. Abavuga Imana bakennye mu mitekerereze no mu myitwarire, bagakoresha amayeri yo gusunikira abantu gutanga, baba bagaragaza isura itari yo y’Imana.

Ubutumwa bwiza ntibugomba kuvugwa mu buryo bwo kwiyandarika cyangwa bwo gusabiriza, kuko Imana yatanze umuhamagaro inatanga n’ibikenerwa kugira ngo uwo murimo ushyirwe mu bikorwa.

Apôtre Mignonne yibukije ko hari “amavuta y’ubutambyi” n’“ay’ubwami,” bivuze ko umukozi w’Imana akwiriye kubaho mu cyubahiro, atabayeho ategereje ko abantu bamugirira impuhwe.

Yavuze ko n’iyo habaho ibihe bikomeye, uwahamagariwe umurimo atagomba kugwa mu mutego wo gusabiriza, ahubwo akiringira Imana nk’isoko y’ibyo akeneye. Gutanga kw’abizera bigomba kuba igisubizo cy’umutima ushaka gufasha, si igitutu cyangwa uburiganya.

Yasoje asaba abizera kutagwa mu mutego wo gutakambira abantu bababwira ko byabarangiranye, ahubwo bakiringira Imana ihoraho. Ubutumwa nyakuri bukwiye kubaka ukwizera no kwigisha abantu kwiringira Imana, aho kubatoza gutinya cyangwa kubashuka.

Ku bwe, igihe ubuhanuzi bwita ku kuri no ku cyubahiro cy’umuhamagaro, ni bwo Itorero riba rifite ubuzima kandi rikubaka abizera mu mucyo no mu kuri.

Apôtre Mignonne yakebuye abahanuzi basabiriza