Abinyujije ku rubuga rwe rwa Instagram, Aline Gahongayire yasabye abanyempano kwitabira gukora challenge y’indirimbo "Yesu ashimwe". Yagize ati: "Nyuma ya Mvura nkuvure, Blessed show, Talk with Dr Alga, Purple connect n’ibindi n’ibindi...Ngarutse guhesha amahirwe abanyempano kuri Album nshya yitwa Yesu ashimwe".

Akomeza agira ati: "Indirimbo Yesu ashimwe imaze gusohoka. Ese uramushima? Ese wadusangiza ubuhamya?Ese wifuza kumwakira?"

Icyo abanyempano basabwa.

Ku bantu bifuza gukora iyi challenge y’iyi ndirimbo barasabwa kuririmba indirimbo "Yesu ashimwe" mu ijwi ryabo ry’umwimerere hakazarebwa challenge yahize izindi.

Umunyempano wifitiye icyizere arasabwa koherereza video ye Aline Gahongayire ku mbuga akoresha nka Instagram cyangwa se kuri WhatsApp :07883160002 uwayohereje akayiherekesha amazina ye.

Iyi ndirimbo Yesu ashimwe kuri ubu iboneka ku mbuga nkoranyambaga zirimo na YouTube.

Bimwe mu bihembo biteganyijwe

Uyu muramyi yahisemo kudabagiza umunyempano uzahiga abandi dore ko azakorerwa amajwi n’amashusho meza y’indirimbo kandi bifite ’quality’ nk’uko byatangajwe na Aline Gahongayire. Harimo kandi gukorerwa promotion ndetse n’amafaranga atavuzwe umubare.

Impamvu Alga yakoresheje iyi challenge.

Avuga ku mvano y’iyi challenge yagize ati: "Iyi album nifuza guhesha benshi umugisha uko buri ndirimbo isohotse nifuza gufatanya n’abatari bake kumenya no gushyigikira impano nshya mu ruganda rw’umuziki wa Gospel".

Yasabye abakurikirana imbuga nkoranyambaga ze kumufasha guhitamo video zihiga izindi.

Aline Gahongayire asanzwe ari umwe mu bahanzi b’icyitegererezo mu muziki wa Gospel mu Rwanda, wamamaye mu bihangano bikora ku mitima y’abantu benshi, byiganjemo indirimbo zishimangira ukwizera n’ihumure.

Ni umuhanzikazi w’indirimbo zihimbaza Imana (Gospel). Azwi cyane kubera ijwi rye rikomeye, indirimbo zifite ubutumwa bwimbitse, ndetse n’uruhare rwe mu gufasha no guteza imbere abandi bahanzi.

Yavutse mu muryango w’abakirisitu, bikaba byaramugiriye ingaruka nziza ku muziki we. Ni umwe mu baririmbyi batangiye umuziki wo kuramya no guhimbaza Imana akiri muto.

Indirimbo ze nka "Warampishe", "Ndanyuzwe", "Nzakomeza", n’izindi zakomeje izina rye. Afite ubuhanga mu kuririmba no kwandika indirimbo zifasha abantu mu bihe bitandukanye by’ubuzima.

Yashinze umuryango ufasha abana b’imfubyi n’abari mu buzima bugoye. Akunze gukoresha umuziki nk’uburyo bwo gutanga ubutumwa bw’ibyiringiro, gukangurira abantu kugira ukwizera no gukomera ku Mana.

Aline Gahongayire agiye gukorera indirimbo umunyempano

REBA INDIRIMBO "YESU ASHIMWE" YA ALINE GAHONGAYIRE