Korali Alliance Choir yo kuri ADEPR Gisenyi, yamaze gushyira hanze indirimbo nshya yitwa “Mpa Kukwegera”, yasohotse mu buryo bw’amajwi n’amashusho kuri uyu wa 10 Mutarama 2026.
Iyi ndirimbo yakiriwe neza n’abakunzi b’indirimbo zo kuramya no guhimbaza Imana, kuko imeze nk’isengesho rifite amagambo akomeye agaragaza inyota yo kwegera Imana no kugirana na Yo ubucuti bukomeye.
Mu butumwa bwayo, bararirimba bagira bati: “Ndashaka kukwegera Mana kuruta uko nakwegeraga, ndashaka kuganira nawe kurusha uko twaganiraga, ongera umbwire ijambo ry’ihumure ry’ururutsa umutima ndusheho kwegera aho uri.”
Mu kuyitunganya, Valens na Amani bacuranze piano, Jado acuranga guitar solo, Benny acuranga saxophone, Rukundo bass, Danny rhythmic guitar naho Mugisha acuranga ingoma, bituma indirimbo irushaho kuryohera amatwi ya buri wese ubasha kugira amahirwe yo kuyumva.
Amajwi yayo, yakozwe by’umwihariko na Ben, amashusho ayoborwa na Musinga, mu gihe ba sound engineers ari Olivier na Richard, aho Kundwa Sound and Lighting System bari bahabaye mu gutuma amashusho arushaho kugira umucyo.
Kuvuga aba bantu bose, ni mu rwego rwo kutirengagiza ko ari bo batumye iba umwihariko haba mu majwi no mu mashusho, ibiri gukora ku marangamutima ya benshi bagasuka amarira y’ibyishimo.
Abakunzi b’iyi korali bakomeje kugaragaza ko bishimiye iyi ndirimbo, aho benshi mu bitekerezo bagaragaza ko yababereye isengesho ribafasha kwegera Imana no kuyiringira kurushaho. Alliance Choir Gisenyi isanzwe izwi cyane ku ndirimbo nka “Urugendo rurimo Yesu,” “Urera Mana,” “Agira Neza” na “Wanciye Iki?”
Indirimbo “Mpa Kukwegera” iri kuboneka kuri YouTube ya Alliance Choir Gisenyi, ikaba ikomeje gukundwa n’abatari bake mu bakunzi b’indirimbo zo kuramya Imana muri ADEPR no hanze yayo.
MPA KUKWEGERA | ALLIANCE CHOIR ADEPR GISENYI. Yirebe kuri YouTube
