Impundu ni zose mu muryango mugari wa Gospel mu Rwanda aho abanyamakuru batatu bakomeye bibarutse abana b’abakobwa.
Muri iki cyumweru turimo, abanyamakuru batatu bakorera ibitangazamakuru by’ibikomerezwa mu Rwanda bari mu mashimwe yo kwibaruka, by’akarusho bose bibarutse abakobwa kandi bibaruka mu minsi itatu ikurikirana.
Umwe muri abo banyamakuru akorera Televiziyo yubatse izina mu gihugu, uwa kabiri akorera Radiyo ikomeye cyane, naho uwa gatatu yandikira ikinyamakuru cya Gikristo gikomeye mu Rwanda ndetse gifatwa nk’icya mbere mu Karere ka Africa y’Uburasirazuba.
Kuwa Mbere w’iki cyumweru tariki 18 Nzeri ni bwo Paradise yamenye ko umunyamakuru Justin Belis wa Flash Fm - Radiyo y’ubukombe mu Rwanda - yibarutse umwana w’umukobwa, akaba ubuheta bwe n’umugore we Alice Uwumutima barushinze mu 2017.
Justi Belis akora ikiganiro "Gospel Talent Show" kuri Flash Fm. Ni ikiganiro gikomeye dore ko amaze kugitumiramo ab’amazina akomeye muri Gospel yaba abahanzi n’abapasiteri. Mu bo twibuka harimo Bishop Rugagi, Pastor Julienne, Tonzi, Alex Dusabe, Bosco Nshuti n’abandi.
Undi munyamakuru wa Gospel wibarutse muri iki cyumweru ni Olivier Baganizi wa Isango Star Tv, ukora ikiganiro "Church Service". Baganizi Olivier na Iragena Fabiola bibarukiye mu bitaro bya King Faisal kuwa kuwa Kabiri tariki 19 Nzeri 2023. Imfura yabo bayise Mpano Or.
Kuwa 11/12/2022 ni bwo Baganizi na Iragena basezeranye imbere y’Imana mu muhango wabereye ku rusengero rw’Abadivantiste rwa Muhima. Ni umuhango wabereye umunsi umwe n’uwo gusaba no gukwa wabereye kuri Juru Park (Rebero) muri Kigali.
Kuwa Gatatu tariki 20 Nzeri 2023 mu masaha ya mu gitondo impundu zatashye mu muryango wa Ev. Frodouard Obededum wa Paradise.rw wibarutse umukobwa, akaba umwana we wa kane. Uyu mwana bamwise Imena Basia Pedrina aho Pedrina bisobanura Rock (Urutare).
Frodouard Uwifashije uzwi ku izina ya Obededomu, yashakanye na Emerance Wihogora tariki 05/12/2015. Yakuze arota kuzakinira Rayon Sports, ariko bimaze kwanga aza kwisanga yabaye umutoza mwiza dore ko yagejeje ikipe ye kuri Final ku rwego rw’Akarere.
Aba banyamakuru bose tubifurije gukomeza kwishimira umugisha w’abana b’abakobwa Imana yabahaye muri iki cyumweru.
Justin Belis yarushinze mu 2017
Olivier Baganizi yarushinze mu 2022
Frodouard yakoze ubukwe mu 2015
Frodouard yibarutse umukobwa yise Imena Basia Pedrina
Frodouard ni umunyamakuru wa Paradise kuva mu 2022
