Aba bakirisitu bakomoka mu bihugu 45 birimo Argentina, Brazil, Afurika y’Epfo, u Buhinde n’ibindi bihugu bikomeye biri muri Belt and Road Initiative (BRI) cyangwa BRICS.

Iki ni cyo gihe cya mbere abakirisitu bo hirya no hino ku isi bafatanyije mu ijwi rimwe bashyigikira itorero riri mu bibazo mu Bushinwa hashingiwe ku mubano igihugu cyabo gifitanye na China, nk’uko Bill Drexel wo mu Bushakashatsi bwa Hudson Institute, akaba n’umukwe wa Pasiteri Jin, yabitangaje.

Iri sengesho ryanditswe rigatangizwa n’umuryango wa Jin, risaba abayobozi b’u Bushinwa kumenya ko ukwemera n’ubwisanzure bwo gusenga bitabangamira igihugu, ahubwo bikigirira akamaro, no kurekura ako kanya Pasiteri Jin n’abandi bafashwe, bityo hazavuke ejo hazaza aho Abakirisitu basenga badafite ubwoba cyangwa igitutu.

Mu gice cy’isengesho hagaragaramo amagambo agira ati: “Dusengera abizera bose bari mu gihugu cya China bakomeje guhatirwa, kugenzurwa no guhura n’akarengane. Turabatangariza ko batibagiranye kandi ko tubari inyuma mu mwuka no mu masengesho.”

Leta ya Amerika yasabye ko barekurwa

Kuri uyu wa Gatatu, Sena ya Amerika yemeje umwanzuro w’impuzandego usaba Guverinoma y’u Bushinwa guhagarika ifungwa rya Zion Church no kurekura abayobozi bayo. Ibi bibaye mu gihe mu ntangiriro z’icyumweru China yari imaze kurekura abayobozi bane ku ngwate, mu gihe abandi 18 bakiri mu buroko bw’i Beihai. Biteganyijwe ko bashobora guhabwa urubanza mu cyumweru gitaha.

Sean Long, uyobora Zion Church by’agateganyo, yavuze ko Pasiteri Jin ahagaze bwuma mu mubiri, mu mwuka no mu bitekerezo. Ku wa 19 Ukwakira, Jin yoherereje itorero ibaruwa yandikiye muri gereza, abasaba gukomera no kudacogora mu kwizera.

Yagize ati: “Ntumpumpangayikire. Mfite ihumure riva mu kwemera ko iyi mibabaro mito nkikorera Yesu.”

Drexel avuga ko iri sengesho rusange rihurije hamwe amajwi y’amatorero yo ku isi rituma China ibona ko ikibazo cy’itorero ritari icya Amerika yonyine, ahubwo cy’umubiri wose w’Abakristo ku isi yose—by’umwihariko mu bihugu China iteganya kuyobora muri BRI na BRICS, aho umubare w’abizera ugeze ku rugero rwo hejuru cyane.

Impuzamatorero zo muri America y’Epfo zafashe iya mbere mu gusengera Daniel Bianchi wo muri Argentina, umwe mu basinye ku isengesho rusange, yabwiye itangazamakuru ko yamenye Pasiteri Jin mu nama ya Lausanne mu 2017. Yigeze kumutumira mu nama yabereye muri Argentina kugeza ubwo mu 2018 Zion Church yafunzwe na Polisi, Jin ntiyongera kwemererwa gusohoka mu gihugu.

Bianchi yavuze ko abakirisitu bo muri America y’Epfo bakwiye gukoresha ubwisanzure bafite mu gutabariza abavandimwe babo bo muri China barimo kunyura mu bihe bikomeye. Yagize ati: “Koinonia ivugwa muri Pawulo ivuze ko dusenyera umugozi umwe. Ububabare bw’abizera bo muri China ni ubwacu twese.”

Nubwo abayobozi bayo bafashwe, Zion Church ikomeza guterana buri cyumweru. Amasengesho ahora abera ku mbuga nka Zoom no mu matsinda mato y’abantu 5–50 mu ngo no mu maresitora. Gusa Pastor Long avuga ko kubungabunga ubumwe bitoroshye kuko itorero riri mu mijyi irenga 40.

Nubwo hari bamwe bahisemo kuva mu itorero kubera ubwoba, ntibyahagaritse abandi benshi bashya kwiyunga kuri Zion Church no kwiyemeza kubatizwa. Pastor Long yagize ati: “Aba ni abigishwa biteguye kwitanga no gutanga ikiguzi cy’ukwemera; kubona uburyo bitanga muri ibi bihe bigoye biradutera imbaraga n’ishimwe.”

Itorero rifite n’ikigo cy’ubujyanama gifasha imiryango y’abapasiteri bafunzwe guhangana n’ibibazo by’ihungabana, agahinda n’ihungabana rishingiye ku ihohoterwa. Guhuza amajwi ku isi bishobora kugira ingaruka ku mwanya wa China ku rwego mpuzamahanga

Sean Long n’abandi bayobozi bavuga ko imbaraga z’amasengesho zituruka mu bihugu bifite ijambo muri politiki mpuzamahanga, by’umwihariko mu BRI na BRICS, bishobora kugira uruhare mu guhindura icyemezo cya China.

Bill Drexel yagize ati: “Niturushaho gukangurira abapasiteri bo mu bihugu bya BRI na BRICS, ijwi ryabo rizumvwa—si ku Mana gusa, ahubwo no ku bayobozi ba China.”

Nyamara David Ro, umuyobozi wa Arise Asia, avuga ko hari abapasiteri batinye gusinya ku busabe bw’amasengesho kubera ubwoba bw’uko byababuza kwinjira muri China. Gusa ku bwe, ibyo ni uburemere buke: “Ari wowe wafashwe, ntiwakwifuza ko abandi bahaguruka ngo bagusabire uburenganzira?”.

Ro yavuze ko Pasitari Jin yari yarateguye Zion Church hakiri kare, azi ko igihe cyo guhura n’ibitero kizagera, bityo arishingira ku muryango mugari w’itorero ku isi. Iyo mbaraga y’ubusabane n’Itorero mpuzamahanga ni yo ituma ubu ubutumwa bwo guhamagarira amahanga yose kugira uruhare no gusengera Zion Church bufite ingaruka zikomeye kandi bukumvwa henshi.

Ro asoza avuga ko nubwo abizera mu Bushinwa bari mu bihe bikomeye byo gutotezwa, Imana iri gukoresha ibi bihe nk’uko byagenze mu Ibyakozwe n’Intumwa 8, ubwo gutotezwa kw’itorero ry’i Yerusalemu kwatumye ubutumwa bwambukiranya imipaka.

“Imana iri gukoresha ibi bihe mu guteza imbere Mission China 2030 Pasiteri Ezra yatangije".

Src: Christianity Today