Umuryango w’ivugabutumwa mpuzamahanga A Light to the Nations uyobowe na Evangelist Dana Morey, wagaragaje ko ubutumwa bwiza atari amagambo gusa, ahubwo bugaragarira no mu bikorwa bifatika bifasha abaturage.

Ibi byagarutsweho mu butumwa bashyize ahagaragara berekana uko bitegura ibiterane bikomeye bya Miracle Gospel Harvest, bizabera mu bice bitandukanye bya Uganda muri Nyakanga 2025.

Bubatse ubwiherero i Bweyale: Urukundo rutari mu magambo

Mu gace ka Bweyale, mu Majyaruguru ya Uganda, A Light to the Nations yavuze ko ibikorwa bya Mercy Ministry byahise bigaragaza urukundo rw’Imana binyuze mu gusana no kuvugurura ubwiherero rusange.

Ibi bikorwa bitari mu magambo, ahubwo bigamije gufasha abaturage mu mibereho yabo ya buri munsi, byagize uruhare mu kwerekana ko ivugabutumwa rigomba kugera ku buzima rusange bw’umuntu.

“Umurimo wacu, ni ubutumwa bw’urukundo rw’Imana butari mu magambo. Bugaragara mu buryo butandukanye bitewe n’uko Imana ituyobora, hashingiwe ku byo abaturage b’aho bakeneye,” ni ko byatangajwe n’uyu muryango.

Imyiteguro y’ibiterane bikomeye

Iki gikorwa cyabaye kimwe mu bikorwa byo gutegura ibiterane bibiri bikomeye:
• Bweyale: kuva tariki ya 3 kugeza ku ya 6 Nyakanga 2025
• Lugazi: kuva tariki ya 11 kugeza ku ya 13 Nyakanga 2025

A Light to the Nations yatangaje ko ibikorwa byo kwigisha, gusengera abaturage, kuganira n’abapasiteri n’abandi bayobozi b’amatorero ndetse n’ubukangurambaga (publicity) biri mu cyiciro cya nyuma cy’imyiteguro.

“Aho hose tujya, haba hari ibyiza byihariye ndetse n’imbogamizi zaho. Ariko Imana ntijya idusiga. Twabonye ineza yayo mu buryo bwihariye, bitwemeza ko turi mu bushake bwayo.”

Impinduka mu mwuka no mu buzima

Uyu muryango uvuga ko hari impinduka igaragara mu buryo bw’umwuka aho bageze hose, abantu bakaba bumva ko hari ikintu gikomeye cy’umugisha n’ibitangaza kiri hafi kuba. Ibi bituma ubwitabire bw’ibikorwa byabo bukomeza kwiyongera ndetse n’ubutumwa bwiza bukagera ku bantu benshi.

Ubutumwa bw’ukuri bujyanye n’ibikorwa

Mu butumwa bwabo, Evangelist Dana Morey n’itsinda rye bagaragarije abayoboke ko ibyo bakora byose bigamije guhesha Imana icyubahiro kandi bikazana umunezero mu mitima yabo. Ibi ni ibigaragaza ko ivugabutumwa nyaryo ridakwiye kuguma mu nsengero gusa, ahubwo rigomba kugera no ku buzima busanzwe bw’abantu.

A Light to the Nations ikomeje kwagura umurimo wayo muri Uganda no mu karere, igakora ibikorwa bitandukanye bifasha abaturage, byaba mu buryo bw’umwuka cyangwa se mu mibereho yabo ya buri munsi.

Kugeza ubutumwa bwiza binyuze mu gusana ubwiherero, gukora ubuvugizi, kwigisha no gukomeza abayobozi b’amatorero, ni intambwe ikomeye igaragaza ivugabutumwa rifite ishingiro n’icyerekezo.