Mu nyigisho za Pastor Christian Gisanura zo ku wa 24 Gashyantare 2026, yagarutse kuri Yesu nk’isoko yo gukiranuka no gusubizwa mu byo twifuza.
Ni inyigisho zishingiye muri Yohana 15:4–8 hagira hati: “Mugume muri jye, nanjye ngume muri mwe. Nk’uko ishami ritabasha kwera imbuto ubwaryo ritagumye mu muzabibu, ni ko namwe mutabibasha nimutaguma muri jye.”
“Ni jye muzabibu, namwe muri amashami. Uguma muri jye nanjye nkaguma muri we, uwo ni we wera imbuto nyinshi, kuko ari nta cyo mubasha gukora mutamfite.”
“Umuntu utaguma muri jye ajugunywa hanze nk’ishami ryumye, maze bakayateranya bakayajugunya mu muriro agashya.”
“Nimuguma muri jye amagambo yanjye akaguma muri mwe, musabe icyo mushaka cyose muzagihabwa.”
“Ibyo ni byo byubahisha Data, ni uko mwera imbuto nyinshi, mukaba abigishwa banjye.”
Yesu ni we udushoboza gukiranuka; twe ubwacu ntitwabishobora. Kuguma muri Yesu ni yo soko yo kubohoka no gusubizwa mu byo twifuza byose. Nk’uko bivugwa muri Yohana 15:7, kuguma muri we bifite inyungu ebyiri: iya mbere ni ukubohoka, iya kabiri ni ukubona ibyo dukeneye.
Ariko kuguma muri Yesu si ugushaka inyungu zacu cyangwa amanota, ni ugushaka ibyo we ashaka no kubaho ubuzima twaremewe, ubuzima bwo kuguma muri we.
Imana yatuje umuntu muri Edeni ikimurema, ngo abe hafi yayo. Edeni risobanura ukuhaba kw’Imana; ariko umuntu amaze gucumura, yakuwe aho Imana iri.
Yesu araza adusubizamo, atwereka ko kuguma mu ijambo rye no kurishyira mu bikorwa ari bwo buryo bwo gutura muri Edeni yo mu mwuka, aho Imana iba. Kumenya Ijambo ry’Imana no kushyira mu bikorwa ni bwo buzima bwo kuguma muri Kristo.
Ni nk’igice cya matera gishyizwe mu mazi: amazi yinjira muri cyo, na cyo kikaba kiri mu mazi. Natwe tugomba kuguma muri Yesu, na we akaguma muri twe. Iyo wizeye ko Kristo agutuyemo, ubaho witwararika, wiyubaha kandi wirinda icyaguhumanya, kuko uba uzi uwo uri muri we.
Imana idushoboza byinshi mbere na mbere. Hari n’igihe igisubizo kiza umutima utarasaba, kuko iba izi ibyo dukeneye. Ni na yo mpamvu ishobora kurinda umuntu ibyago atabizi, kuko iyo tugumye muri Yesu, na we atugumamo, ubuzima bwacu bukayoborwa n’imbaraga ze.
Umuntu uri muri Yesu ameze nk’uwambaye umwambaro wera! Yirinda kwiyanduza, mu gihe uwambaye imyenda yanduye we n’ubundi atanamenya ko yiyanduje. Nitubaho dutyo, Yesu azatubera isoko yo gukiranuka no kubaho neza ubu, dutegereje kuzabaho neza kurushaho mu hazaza.
