Iyi ndirimbo yasohotse ku itariki ya 3 Ukuboza 2024, mu kwezi kwa nyuma k’umwaka, ikaba yitezweho gufasha abantu gusoza umwaka bafite icyizere n’ihumure.

Indirimbo “Ihema” igaruka ku ngingo z’ukwizera, kwihangana, no kurindwa n’Imana. Mu magambo akubiyemo ubutumwa ayigize, aba baririmbyi bagaragaza urugendo rw’umuntu ukomeza kwizera Imana mu bibazo, akarindwa, kandi akagobokwa.

Iyi ndirimbo ikubiyemo ingingo zivuga uko habaho ibihe by’imibabaro ariko ikanashimangira intsinzi ituruka mu bubasha bw’Imana.

“Ubwo intambara zazaga umusubirizo, nabonaga kwambuka ari ihurizo.
Isoko y’indirimbo yari yarakamye, umuraba ukambwira ko wantereranye.
Erega nubwo ntakubonaga wari uhari, ahubwo ni uko nari naguye isari...”
Mu nyikirizo yayo, humvikana ishimwe rikomeye rivuga ngo:
“Uri Yhaweh, n’aya mashimwe ni ayawe.
Unkuye mu mwijima unyomoye inguma,
Yesu we, umbambiye ihema.”

Aya magambo akubiyemo ubutumwa bukomeye, azakora ku mutima w’uzumva iyi ndirimbo wese.

Vestine na Dorcas ni abakobwa bakomoka mu Karere ka Musanze mu Ntara y’Amajyaruguru. Bombi ni Abakristo bo mu Itorero ADEPR, kandi bazwiho kuba abaramyi bakomeye bashimisha abantu binyuze mu majwi yabo meza n’ubutumwa bwiza batanga.

Vestine aherutse kurangiza amashuri yisumbuye ku manota meza, mbere gato y’uko iyi ndirimbo isohoka, bikaba byerekana ko yitangiye umurimo w’Imana ntiyirengagize amasomo ye, dore ko ubwamamare, gukorera Imana n’amasomo hari abo bigora mu kubihuza kandi ntihagire icyangirika.

Vestine na Dorcas ni bamwe mu bahanzi bakunzwe cyane mu muziki wa Gospel, cyane cyane binyuze mu ndirimbo nka “Ibuye,” “Simpagarara,” “Adonai,” “Nahawe Ijambo,” n’izindi. Mu kwezi kwa Nyakanga tariki ya 21, 2024, bashyize hanze indirimbo “Neema” mu rurimi rw’Igiswayile, na yo yakiriwe neza cyane mu bihugu bikoresha uru rurimi.

Aba bahanzi bashyigikiwe na Murindahabi Irene, umunyamakuru wa The Choice Live ndetse akaba ari na we washinze MIE Music, ishyirahamwe (label) ribafasha mu muziki wabo. Irene yagize uruhare runini mu iterambere ryabo no kumenyekanisha ibikorwa byabo mu Gihugu no hanze yacyo.

Binyuze mu ndirimbo “Ihema,” Vestine na Dorcas bongeye kugaragaza ko ari bamwe mu bahanzi bakomeye b’umuziki wa Gospel. Ubutumwa bwabo bwimbitse, amajwi yabo meza, n’ukwizera bafite, byose bikomeza gutera abantu icyizere no kwiyegurira Imana, bakakira agakiza, bagakizwa mu buryo bukomeye.

Nk’uko umwaka urimo gusozwa, iyi ndirimbo ni urwibutso rw’uko Imana ihora irinda abayiringiye, ikabaha ihumure, ikababambira ihema ry’uburinzi bwayo.

Unshobora kumva indirimbo “Ihema” ku mbuga zitandukanye, ukifatanya na bo mu kuramya Imana no gushimira ubuntu bwayo buhindura ubuzima.